پرەمەر-مينيستردىڭ ورىنباسارى ەرمەك كوشەربايەۆ ءماجىلىس دەپۋتاتتارىنىڭ ساۋالىنا جاۋاپ رەتىندە قازاقستاندا ورتا مەديسينالىق قىزمەتكەرلەرگە دارىگەردىڭ تاعايىنداۋى بويىنشا دارىلەر رەسەپتىن جازۋعا رۇقسات بەرۋ جوسپارلانىپ وتىر.
ەرمەك كوشەربايەۆتىڭ ايتۋىنشا، 2023 جىلدىڭ شىلدەسىنەن باستاپ ديسپانسەرلىك ەسەپتە تۇرعان پاسيەنتتەرگە ءۇش ايعا دەيىنگى مەرزىمگە رەسەپت جازۋعا مۇمكىندىك بەرىلگەن. ەمحانالاردا دارى-دارمەك پەن مەديسينالىق بۇيىمدار QR-كود، SMS كود نەمەسە قاعاز تۇرىندە بەرىلەدى. بۇگىندە بۇل جۇيە 744 مەديسينالىق ۇيىمدى قامتيتىن "الەۋمەتتىك ءاميان" جوباسى ارقىلى جۇزەگە اسىرىلىپ وتىر.
"ءقازىر مينيسترلىك دارىگەردىڭ تاعايىنداۋى بولعان جاعدايدا دارىلىك زاتتارعا رەسەپتتەردى ورتا مەديسينا قىزمەتكەرلەرىنىڭ جازۋ ماسەلەسىن پىسىقتاپ جاتىر. ياعني سوزىلمالى اۋرۋلارى بار ناۋقاستارعا رەسەپت الۋ ءۇشىن دارىگەرگە بارماي-اق، مەدبيكەگە جۇگىنۋ جەتكىلىكتى بولادى"، – دەدى كوشەربايەۆ.
سونىمەن قاتار ول دەنساۋلىق ساقتاۋ مينيسترلىگى ساتىپ الىناتىن دارى-دارمەكتەر ءتىزىمىن قايتا قاراعانىن اتاپ ءوتتى. وندىرىستەن الىنعان دارىلەر تىزىمنەن شىعارىلىپ، ولاردىڭ ورنىنا جاڭا يننوۆاسيالىق پرەپاراتتار ەنگىزىلگەن. ءقازىر بۇل بۇيرىق جوباسى مەملەكەتتىك ورگانداردا كەلىسۋ ساتىسىندا تۇر. جاڭارتىلعان تىزىمگە 19 ءدارى ەنگىزىلىپ، 172 دارىلىك زات پەن مەديسينالىق بۇيىم الىپ تاستالدى.
2025 جىلدىڭ ساۋىرىندە امبۋلاتوريالىق قامتاماسىز ەتۋ تىزىمىنەن ءولىم-جىتىم مەن ءومىر ءسۇرۋ ۇزاقتىعىنا اسەر ەتپەيتىن 32 اۋرۋ ءتۇرى (نوزولوگيا) شىعارىلدى. ءقازىر مينيسترلىك 12 الەۋمەتتىك ماڭىزى بار اۋرۋدى تمككك (تەگىن مەديسينالىق كومەكتىڭ كەپىلدىك بەرىلگەن كولەمى) پاكەتىنەن ءمامس (مىندەتتى الەۋمەتتىك مەديسينالىق ساقتاندىرۋ) جۇيەسىنە كوشىرۋ بويىنشا وزگەرىستەر ازىرلەدى.
