تارازدىق  24 جاستاعى ديانا ايماحان — ومىرگە كەلگەن ساتىنەن باستاپ كۇرەسپەن كۇن كەشىپ كەلە جاتقان قايسار قىز. بالالىق شاعى قاتارلاستارى سەكىلدى قۋانىش پەن ەركەلىكتە ەمەس، اۋرۋحانا توسەگىندە، اق حالاتتىلاردىڭ ءۇمىتى مەن كۇمانى اراسىندا ءوتتى. بۇگىندە ول جۇڭگو حالىق رەسپۋبليكاسىنداعى الەم مويىنداعان دارىگەر، مەديسينا عىلىمدارىنىڭ دوكتورى جاسارات جالەل ۇلىنىڭ كومەگىمەن قايتا ءجۇرۋ ءۇشىن كۇرەسىپ ءجۇر.

ديانانىڭ اناسى نارگيزا امانتاي قىزىنىڭ ايتۋىنشا، بۇل تۋا بىتكەن دەرت ەمەس، بۇل تاعدىر تاۋقىمەتى ءبىر ساتتىك قاتەلىكتەن باستالعان.

> "مەن تۇڭگى ۋاقىتتا بوسانۋعا كەلدىم. تولعاعىم باستالعاندا قاسىمدا بىلىكتى دارىگەر ەمەس، تاجىريبەدەن ءوتىپ جۇرگەن 20 جاسار قىز عانا بولدى. قىزىم اياقپەن كەلىپ تۇرعان، سول كەزدە ۇرشىعى شىعىپ، جامباسى قيسايىپ كەتتى. بۇل ءبىر ءساتتىڭ قاتەلىگى ەدى، ءبىراق ونىڭ سالدارى – ومىرلىك سىناققا اينالدى…"

سونداي-اق اناسىنىڭ ايتۋىنشا، ديانا ءتاي-تاي باسقاندا-اق وزگەشەلىگى كوزگە ۇرىپ تۇرعان ەكەن.
- ءبىر اياعى العا تارتىپ، ەكىنشىسى كەرى كەتىپ، ءجۇرىسى قيسالاڭ ەدى. بالالار ونى تۇسىنبەدى. "اقساق قىز" دەپ مازاقتادى، - دەيدى اناسى.
ديانا مەن اناسى ەلىمىزدىڭ ءتۇرلى ەمحانالارىن شارلاپ، ەم ىزدەپ كەلگەن. ءبىرى "اياعىن كەسەمىز" ، ءبىرى "ءۇمىت جوق" دەپ شىعارىپ سالىپتى. قىزدىڭ ءۇمىتى ءسونىپ، ومىردەن باس تارتقىسى كەلگەن كەزدەرى دە بولىپتى. ءبىراق انا ماحابباتى – ءۇمىتتىڭ ءتىرى وشاعى ەدى.

سول ءۇمىت ولاردى قىتايداعى ايگىلى دارىگەر جاسارات جالەلۇلىنا جەتەلەپ اپاردى. پروفەسسوردىڭ زاماناۋي  ەمدەۋ ادىسىمەن سۇيەكتەر تۇزەلە باستاعان كورىنەدى. بۇگىندە ديانانىڭ ومىرگە دەگەن قۇلشىنىسى قايتا ويانعان-دى.

"قىزىم ءوز اياعىمەن تىك تۇرىپ، شاۋىپ جۇرسە ەكەن"، – دەيدى نارگيزا انا جانارىنداعى جاسىن جاسىرىپ.

دياناعا الدا كۇردەلى وتا جاسالماق.
ءقازىر وتباسىعا قارجىلاي قولداۋ قاجەت. ديانانىڭ ماقساتى دا، ارمانى دا – ءوز اياعىمەن نىق باسىپ، ەركىن ءجۇرۋ. وسى ءبىر ارماننىڭ ورىندالۋىنا ءاربىر جاننىڭ ۇلەسى قاجەت.

قولداۋ بىلدىرەمىن دەگەن جاندار ءۇشىن دينانانىڭ اناسى نارگيزا امانتاي قىزىنىڭ Kaspi Gold ءنومىرى

8 775 871 0297