تالدىقورعاندا شەرزات بولاتتىڭ قازاسى بويىنشا سوت وتىرىسى جالعاسىپ جاتىر. 

سوت وتىرىسى وقيعا بولعان كۇنى جاراقات العان نۇرقانات عايىپبايەۆقا ساراپتاما جۇرگىزگەن سوت-مەديسينالىق ساراپشى ومىربەك جولىمبەتوۆتىڭ جاۋاپ بەرۋىمەن باستالدى.

تەكسەرۋ بارىسىندا عايىپبايەۆتىڭ سول كوزىنىڭ استىندا قاباعىندا مولشەرى 3،0 جانە 1،5 سم كوگەرگەن ءتۇستى قانتالاۋ بولدى. وڭ جاق قۇلاق قالقانىنداعى وسىندىسىندە ءدال وسىنداي سيپاتتا قانتالاۋ بولعان. مولشەرى – 2،0 جانە 1،0 سم. شۇيدە بولىگىندە جۇمساق تىندەرىنىڭ ءىسىنىپ قابىنۋى تىركەلدى. بەل تۇسىندا سىزىقتى فورمالى تەرىسى سىدىرىلعان جارا بولدى. ونىڭ بەتى قىزىل ءتۇستى جۇقا قابىقپەن قاپتالعان. ونىڭ مولشەرى 15 جانە 4،0 سم. وڭ جاق جامباسى تۇسىندا قيعاش تىك جارا بولعان، ونىڭ جيەكتەرى تەگىس، ۇشتارى دوعال كەلگەن، مولشەرى – 1،2 جانە 0،1 سم، - دەدى ومىربەك جولىمبەتوۆ.

مەديسينالىق تەكسەرۋدەن كەيىن عايىپبايەۆقا كلينيكالىق دياگنوز قويىلعان.

باس-سۇيەك ميىنىڭ جابىق زاقىمى، باس ميىنىڭ شايقالۋى، باسىنىڭ ماڭداي بولىگى تۇسىنداعى جۇمساق تىندەرىن سوعىپ الۋى جانە تەرىسى سىدىرىلعان جارالارى، باسىنىڭ شۇيدە بولىگىندەگى قانتالاۋ، كەۋدە قۋىسى مۇشەلەرىنىڭ جابىق زاقىمى، وڭ جامباسىنداعى كوپتەگەن شانشىلا كەسىلگەن جارالار، وڭ تىزەسى بۋىنى تىندەرىن سوعىپ الۋى، جامباس بولىگىنىنىڭ وڭ جاعىندا شانشىلا كەسىلگەن جارالار، - دەپ ءسوزىن تولىقتىردى ول.