جامبىل وبلىسىنىڭ تۇرعىنى بانك قوسىمشاسىنداعى «مەملەكەتتىك قىزمەتتەر» ءبولىمىن اشىپ، 1991 جىلى ءوز اتىنا نەكە تىركەلگەنىن كورىپ، ەسەڭگىرەپ قالدى. جارتى عاسىرعا جۋىق «ۇيلەنىپ جۇرگەنىن» سول ساتتە بىلگەن ول جازبانى جويۋ ءۇشىن سوتقا جۇگىندى.

قىسقا تانىستىق، ۇزاق «نەكە»

ءىستىڭ ءمان-جايىن سوت ماتەريالدارى اشىپ بەردى. ەر ادام 1991 جىلى قىزبەن ءتورت اي عانا كەزدەسىپ، كەيىن ايىرىلىسىپ كەتكەن. احات بولىمىنە بارىپ، نەكە تىركەتپەگەن، ەشقانداي قۇجاتقا قول قويماعان.

ودان كەيىن اركىم ءوز جولىمەن كەتكەن: قىز 1994 جىلى باسقا ازاماتپەن رەسمي نەكەگە تۇرعان، ال ەر ادام 2021 جىلى وتباسىن قۇرعان.

الايدا 2025 جىلى بانك قوسىمشاسىنان 1991 جىلعى نەكە تۋرالى دەرەك شىققانىن كورىپ، ازامات تىركەۋدى جويۋدى سۇراپ، سوتقا ارىز بەرگەن.

سوت نە انىقتادى

سوت اكت جازباسىنداعى قولتاڭبالاردى تەكسەرىپ، ولاردىڭ ني ەر ادامدىكى، ني ايەلدىكى ەمەس ەكەنىن انىقتادى. قولتاڭبالاردى ءۇشىنشى تۇلعا قويعانى بەلگىلى بولدى.

سول جىلعى ازاماتتىق حال اكتىلەرىنىڭ ءتۇپنۇسقا كىتابىن ارحيۆتىك ساقتاۋ مەرزىمى ءوتىپ، جويىپ جىبەرگەنى انىقتالدى. دەگەنمەن ىستەگى كوشىرمەلەر مەن وزگە دالەلدەر جەتكىلىكتى دەپ باعالاندى.

ەر ادامنىڭ جاقىن دوسى مەن كورشىسى كۋا رەتىندە تىڭدالىپ، ەشقانداي تىركەۋگە بىرگە بارماعانىن جانە قۇجاتقا قول قويماعانىن راستادى. ىسكە ءۇشىنشى تۇلعا رەتىندە تارتىلعان احات وكىلى سوت وتىرىسىنا كەلمەدى.

شەشىم قانداي شىقتى

سوت 1991 جىلعى نەكە تىركەۋىن زاڭ تالاپتارى ورەسكەل بۇزىلىپ جۇرگىزىلگەن دەپ تانىدى: تاراپتار تىركەۋگە جەكە قاتىسپاعان، ال مۇنداي «قاشىقتان نەكە» زاڭدا جوق. سونىڭ نەگىزىندە اكت جازباسىن جارامسىز دەپ تانىدى.

وقيعا ازاماتتىق حال اكتىلەرىن جۇرگىزۋدە جانە دەرەكقورلاردى سيفرلاندىرۋدا قاۋىپسىزدىك پەن تەكسەرۋ راسىمدەرىن كۇشەيتۋ قاجەتتىگىن ايقىن كورسەتتى.

بۇل تۋرالى Qamshy.kz اقپارات اگەنتتىگى حابارلايدى.