AIF-2025 فورۋمىندا سويلەگەن سوزىندە پرەزيدەنت قاسىم-جومارت توقايەۆ جاھاندىق قاۋىپسىزدىككە تەك گەوساياسي تۇرعىدان قاراۋ جەتكىلىكسىز ەكەنىن اتاپ ءوتتى. ونىڭ ايتۋىنشا، الەمدەگى جاعداي تۇبەگەيلى وزگەرىپ جاتىر: مۋلتيلاتەراليزم السىرەپ، پروتەكسيونيزم كۇشەيىپ كەلەدى.

– وسىنداي بەيبەرەكەت كەزەڭدە ءبىزدىڭ مىندەتىمىز – ىنتىماقتى ساقتاۋ، ىدىراعان تۇستاردى قالپىنا كەلتىرۋ، – دەدى مەملەكەت باسشىسى.

توقايەۆ قازاقستان قازىرگى كۇردەلى احۋالدى سىندارلى ىقپالداستىق ارقىلى شەشۋگە ۇمتىلاتىنىن مالىمدەدى.

– سىرتقى ساياساتتا ءبىز جىككە بولىنبەي، ديالوگتى تاڭداۋدى جانە بارلىق ەلدەردىڭ ەگەمەندىگىن قۇرمەتتەۋدى باستى ۇستانىم ەتىپ كەلەمىز. اسىرەۇلتشىلدىققا، وزگە حالىقتاردىڭ تاريحى مەن مادەنيەتىن مەنسىنبەۋگە جول بەرىلمەيدى. ءار حالىقتىڭ انا ءتىلى مەن مادەنيەتىن قۇرمەتتەۋ – باستى قاعيدات. سوندىقتان قازاقستاندا "بىرلىگىمىز – ءارالۋاندىقتا" قاعيداسى قاتاڭ ساقتالادى، – دەدى ول.

ايتا كەتەيىك، AIF-2025 فورۋمى استانادا ءوتىپ جاتىر. پرەزيدەنت توقايەۆ بۇل ءىس-شارانىڭ الەمدە بەلگىسىزدىك كۇشەيىپ تۇرعان كەزەڭدە ءوتىپ وتىرعانىنا جانە قازاقستاننىڭ ءالى كۇنگە دەيىن 450 يادرولىق سىناقتىڭ زاردابىن تارتىپ وتىرعانىنا نازار اۋداردى.