شىمكەنتتە كاسىپكەرلەر "قيال الەمى" ساياباعىن سۇرۋگە قارسى شىقتى

شىمكەنتتە كاسىپكەرلەر "قيال الەمى" ساياباعىن سۇرۋگە قارسىلىق تانىتىپ، جۇمىسشىلار مەن اۋىر تەحنيكانىڭ جۇمىسىنا كەدەرگى كەلتىردى. وقيعا ورنىندا جاعداي ۋشىعىپ، پوليسيا شاقىرۋعا تۋرا كەلدى.

كاسىپكەرلەر دەمالىس ورنىندا ونداعان جىل بويى تابىس تاۋىپ كەلگەندەرىن ايتىپ، ءسۇرۋ جۇمىستارىنا ۋاقىتشا كىدىرىس بەرۋدى سۇرايدى. ايتۋلارىنشا، جاڭا ورىنعا كوشۋ ءۇشىن ۋاقىت پەن قاراجات قاجەت.

– "ەندى جەر بەرسىن. جەر بەرگەن سوڭ ۋاقىت بەرسىن. سەبەبى بىزگە ونى قۇراستىرۋ ءۇشىن قاراجات كەرەك. ءبىز وسى جەردە جۇمىس ىستەپ، تابىس تاۋىپ، جاڭا ورىندى قۇراستىرعىمىز كەلەدى"، – دەيدى كاسىپكەر ايمان اشىربايەۆا.

كاسىپكەرلەر 4 گەكتار جەردى 49 جىلعا جالعا العاندارىن، ال كەلىسىم مەرزىمىنىڭ اياقتالۋىنا ءالى 19 جىل بار ەكەنىن ايتادى. الايدا قالا اكىمدىگى بۇل جەر زاڭسىز پايدالانىلعان دەپ، سوتقا جۇگىنىپ، جەڭىسكە جەتكەن. شەشىمگە سايكەس، ساياباقتاعى 30-عا جۋىق نىسان بۇزىلۋى ءتيىس.

– "نەسيەم بار، وسى ماۋسىمدا جارتىسىن جابامىن دەگەن ءۇمىتىم بولعان. ءبىراق جوسپارىمنىڭ ءبارى ءبىر كۇندە قيراتىلىپ وتىر"، – دەيدى كاسىپكەر شولپان تۇربايەۆا.

قالا اكىمدىگىنىڭ مالىمدەۋىنشە، اتتراكسيوندار زاڭسىز سالىنعان. ساياباقتىڭ اۋماعى قوعامدىق دەمالىس ورنى رەتىندە قايتا جاڭعىرتىلماق.

– "باسىندا دۇرىس بەرىلمەگەن. سوت شەشىمى بار. بۇل جەردە حالىققا ارنالعان ساياباق بولادى. قۇجاتى بار 9 نىساننىڭ سىرتىندا قالعاندارىنىڭ ەشقايسىسى زاڭداستىرىلماعان"، – دەدى شىمكەنت قالالىق ورتا ساپاسى جانە باقىلاۋ باسقارماسىنىڭ باسشىسى مەرلان كەرىمجانوۆ.

قازىرگى تاڭدا ساياباقتا 300-گە جۋىق ادام جۇمىس ىستەيدى. جوسپار بويىنشا، زاڭسىز دەپ تانىلعان 30 نىسان ءسۇرىلۋى ءتيىس. الايدا كاسىپكەرلەردىڭ نارازىلىعىنان كەيىن تەك ءبىر عانا نىساننىڭ بۇرىشى بۇزىلىپ، جۇمىس ۋاقىتشا توقتادى.