ق ر ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك الەۋمەتتىك ساقتاندىرۋ قورىنان (ءماسق) تولەنەتىن كەيبىر الەۋمەتتىك تولەمدەرگە قاتىستى شەشىم قابىلداۋ پروسەستەرىن — تاعايىنداۋ، باس تارتۋ، قايتا ەسەپتەۋ، توقتاتا تۇرۋ جانە توقتاتۋ — اۆتوماتتاندىرۋ بويىنشا پيلوتتىق جوبانى ىسكە قوسۋدى كوزدەپ وتىر.

مينيسترلىكتىڭ تۇسىندىرۋىنشە، بۇل باستاما مەملەكەتتىك قىزمەت كورسەتۋ مەرزىمدەرىن قىسقارتۋعا باعىتتالعان. جوبا اياسىندا ءماسق فيليالدارىنىڭ قىزمەتكەرلەرى شەشىم قابىلداۋ پروسەسىنەن شەتتەتىلىپ، تولەمدەردى الۋشىلاردىڭ شوتىنا قاراجاتتى جىلدامىراق اۋدارۋعا، سونداي-اق الەۋمەتتىك تولەمدەردى ۋاقتىلى توقتاتا تۇرۋ مەن توقتاتۋدى قامتاماسىز ەتۋگە مۇمكىندىك بەرەدى.

پيلوتتىق رەجيمدە تەك مىناداي ارنالار ارقىلى كەلىپ تۇسكەن ەلەكتروندى وتىنىشتەر قارالاتىن بولادى:

• «ەلەكتروندىق ۇكىمەت» پورتالى،

• «ەلەكتروندىق ەڭبەك بيرجاسى» پورتالى،

• ەكىنشى دەڭگەيلى بانكتەر ارقىلى جولدانعان وتىنىشتەر،

• پرواكتيۆتى فورماتتاعى قىزمەتتەر.

اتالعان وتىنىشتەر الدىن الا كەلىسىلگەن جانە بەلگىلى ءبىر كريتەرييلەرگە ساي بولۋى ءتيىس. ناقتىراق ايتقاندا:

• الەۋمەتتىك اۋدارىمدار تەك ءبىر تولەۋشىدەن ءتۇسۋى ءتيىس (جك، شارۋا قوجالىعى باسشىسى نەمەسە جەكە پراكتيكامەن اينالىساتىن تۇلعالاردان باسقا)؛

• الەۋمەتتىك اۋدارىمدار ۋاقتىلى تولەنۋى قاجەت (ەسەپ بەرىلەتىن ايدان كەيىنگى ەكىنشى ايدىڭ 5-كۇنىنەن كەشىكتىرمەي)؛

• قىزمەتكەردىڭ الەۋمەتتىك اۋدارىمدارى كورسەتىلگەن تابىسىمەن سايكەس بولۋى شارت؛

• قاجەتتى مالىمەتتەردى الۋ ءۇشىن سيفرلاندىرىلعان قۇجاتتاردىڭ تولىق توپتاماسى بولۋى ءتيىس.

مينيسترلىك بۇل كريتەرييلەر اۆتوماتتاندىرۋدىڭ تيىمدىلىگىن باعالاپ، بيزنەس-پروسەستەردى وڭتايلاندىرۋعا مۇمكىندىك بەرەدى دەپ ەسەپتەيدى.

پيلوتتىق جوبانىڭ ناقتى باستالۋ كۇنى تۋرالى قوسىمشا حابارلاناتىن بولادى.

قۇجات 2025 جىلعى 27 ماۋسىمعا دەيىن قوعامدىق تالقىلاۋ ءۇشىن «اشىق نقا» پورتالىندا جاريالانعان.