الماتى قالاسى ناۋرىزباي اۋداندىق سوتى اقىن مۇقاعالي ماقاتايەۆقا ءتىل تيگىزگەن بلوگەر الىشەر تەمەنوۆكە قاتىستى قىلمىستىق ءىستى توقتاتتى. بۇل شەشىم جابىرلەنۋشى — اقىننىڭ ۇلى جۇلدىز ماقاتايەۆتىڭ كەشىرىم بەرۋىنە بايلانىستى قابىلداندى. ءىستى سۋديا بەينەگۇل كايسينا قارادى.

تەمەنوۆ ق ر قىلمىستىق كودەكسىنىڭ 131-بابى 2-بولىگى (قورلاۋ) بويىنشا ايىپتالعان بولاتىن. سوت وتىرىسى 16 ماۋسىم كۇنى ءوتتى. وندا جۇلدىز ماقاتايەۆ ايىپتالۋشىنى كەشىرگەنىن ايتىپ، ءىستى توقتاتۋدى سۇرادى. بۇعان دەيىن ول مورالدىق شىعىن رەتىندە 10 ميلليون تەڭگە تالاپ ەتكەن ەدى.

ايىپتالۋشى ءوز كىناسىن تولىق مويىنداپ، كەشىرىم سۇرادى. ول جابىرلەنۋشىمەن كەلىسىمگە كەلگەنىن، قازىرگى ۋاقىتتا كولىگىندە 2 ميلليون تەڭگە بار ەكەنىن ايتىپ، قالعان 1 ميلليون تەڭگەنى ون كۇن ىشىندە تولەيتىنىن جەتكىزدى. ۋاقىتشا كەپىل رەتىندە كولىگىنىڭ كىلتىن قالدىردى.

سۋديا تاراپتاردىڭ تاتۋلاسۋىنا بايلانىستى ءىستى توقتاتىپ، تەمەنوۆتى قىلمىستىق جاۋاپكەرشىلىكتەن بوساتتى. سونىمەن قاتار ازاماتتىق تالاپتىڭ كۇشى جويىلدى. الايدا سوت شەشىمى زاڭدى كۇشىنە ەنگەنگە دەيىن بلوگەرگە ەلدەن شىقپاۋ جانە ءتيىستى مىنەز-قۇلىق ساقتاۋ تۋرالى مىندەتتەمە ساقتالادى.

تەمەنوۆ بۇعان قوسا مۇقاعالي ماقاتايەۆقا ءتىل تيگىزگەنى ءۇشىن حالىقتان كەشىرىم سۇراپ، ارنايى ۆيدەو جاريالاۋعا ۋادە بەردى.

ايتا كەتەيىك، 2024 جىلدىڭ 8 قازانىندا الىشەر تەمەنوۆ الەۋمەتتىك جەلىگە مۇقاعالي ماقاتايەۆتى بالاعاتتاپ، بەيادەپ سوزدەر ايتىلعان ۆيدەوسىن جاريالاعان بولاتىن.