مەملەكەت باسشىسى قحر توراعاسىمەن كەلىسسوز جۇرگىزدى
▪️مەملەكەت باسشىسىنىڭ ايتۋىنشا، قحر ءتوراعاسى قازاق جەرىندە قاي كەزدە دە ءقادىرلى قوناق سانالعان، ال ونىڭ بۇل جولعى ساپارى – شىنايى ءارى مىزعىماس دوستىعىمىزدىڭ ايقىن كورىنىسى.
– جۇڭگو حالىق رەسپۋبليكاسى – قازاقستاننىڭ تاتۋ كورشىسى، جاقىن دوسى جانە سەنىمدى سەرىكتەسى. سان قىرلى قازاق-قىتاي ىقپالداستىعى ءسىزدىڭ جەكە قولداۋىڭىزبەن ماڭگى ءارى جان-جاقتى ستراتەگيالىق ءارىپتeستىك رۋحىندا جانە بۇرىن-سوڭدى بولماعان قارقىنمەن دامىپ كەلە جاتىر. مۇنى ەرەكشە ىقىلاسپەن اتاپ وتكىم كەلەدى. ورتاق تاريحىمىزعا مۇقيات ۇڭىلسەك، ەلدەرىمىزدىڭ اراسىندا ەشقانداي تۇيتكىلدەر نەمەسە توسقاۋىلدار بولماعان. تەك قانا ءوزارا دوستىق پەن ىقپالداستىق، تۇسىنىستىك پەن جىلى لەبىزدەر باسىم بولدى. جۇڭگو حالقى قازاق حالقىنا ەشقانداي زيان كەلتىرگەن جوق،– دەدى قازاقستان پرەزيدەنتى.
▪️مەملەكەت باسشىسى ەكىجاقتى قارىم-قاتىناس جىلدان جىلعا نىعايىپ، جاڭا «التىن كەزەڭگە» قادام باسقانىن مالىمدەدى. دوستىق بايلانىس ەكى ەلدىڭ تۇراقتى الەۋمەتتىك-ەكونوميكالىق دامۋىنا جانە حالىقتاردىڭ ءال-اۋقاتىن جاقسارتۋعا زور سەپتىگىن تيگىزىپ جاتقانىنا نازار اۋداردى.
▪️مەملەكەت باسشىسىنىڭ ايتۋىنشا، ەكى ەلدىڭ قارىم-قاتىناسى تۇراقتى سيپاتقا يە ءارى وعان گەوساياسي سىن-قاتەرلەر مەن دۇربەلەڭدەر، سونداي-اق حالىقارالىق احۋال تەرىس اسەر ەتپەيدى.
– جۇڭگو قازاقستانمەن اراداعى ىنتىماقتاستىعىندا قانداي دا ءبىر ساياسي شارت قويماعان. ءبىزدىڭ ەگەمەندىگىمىز بەن قاۋىپسىزدىگىمىزگە كورسەتكەن قولداۋىڭىزدى باعالايمىز. قىتايدىڭ بەيبىتشىلىك باستامالارىن قولدايمىز. ەلىڭىزدىڭ ءادىل الەمدىك ءتارتىپ ورناتۋ ارەكەتتەرىن قۋاتتايمىز، – دەدى قازاقستان پرەزيدەنتى.
▪️قاسىم-جومارت توقايەۆ ەكى ەلدىڭ بۇۇ، شىۇ، اوسشك سەكىلدى حالىقارالىق جانە وڭىرلىك ۇيىمدار اياسىندا، سونداي-اق بريكس + جانە «ورتالىق ازيا – جۇڭگو» فورماتىندا جوعارى دەڭگەيدەگى ىقپالداستىق ورناتقانىن اتاپ ءوتتى.
▪️مەملەكەت باسشىسى قحر-دىڭ قازاقستاننىڭ ەڭ ءىرى ساۋدا-ەكونوميكالىق سەرىكتەسى ەكەنىن ەسكە سالدى. بىلتىرعى قورىتىندى بويىنشا ەكىجاقتى ساۋدا-ساتتىق كولەمى 44 ميلليارد دوللارعا جەتكەن. بۇل – رەكوردتىق كورسەتكىش.
▪️قاسىم-جومارت توقايەۆ اتوم ەنەرگەتيكاسى سالاسىنا ارنايى توقتالدى.
– ءبىز قازاقستاندا بىرنەشە، تىم بولماعاندا ەكى-ۇش اەس سالۋ تۋرالى شەشىم قابىلدادىق. وسى ماڭىزدى جوباعا ءىرى كومپانيالاردى تارتۋعا قاتىستى جۇمىس جۇرگىزىلىپ جاتىر. قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى قۇرىلدى. اەس قۇرىلىسى بويىنشا قىتايدىڭ CNNC كومپانياسىن سەنىمدى ستراتەگيالىق سەرىكتەس رەتىندە قاراستىرىپ وتىرعانىمىزدى ەرەكشە اتاپ وتكىم كەلەدى. الەمگە ايگىلى كومپانيا ءبىزدىڭ نارىقتا ءوز ورنىن تاباتىنى انىق. سونىمەن قاتار قازاقستان قىتايعا تابيعي ۋران مەن يادرولىق وتىن جەتكىزىپ وتىرعان سەنىمدى ەل، – دەدى پرەزيدەنت.
سي سزينپين قازاق جەرىندە كورسەتىلگەن سىي-قۇرمەت ءۇشىن پرەزيدەنتكە ريزاشىلىعىن ءبىلدىردى
▪️ول قاسىم-جومارت توقايەۆتىڭ باسشىلىعىمەن قازاقستان ۇلتتىق جاڭعىرۋ جولىنا تۇسكەنىن، ەل دامۋىندا تىڭ تابىستارعا قول جەتكىزىپ كەلە جاتقانىن اتاپ ءوتتى.
– تاتۋ كورشى ءارى ستراتەگيالىق سەرىكتەس رەتىندە ءبىز سىزدەردىڭ جەتىستىكتەرىڭىزگە ءتانتىمىز. سىزدەر ءۇشىن قۋانىشتىمىز. جۇڭگو مەن قازاقستاننىڭ قارىم-قاتىناسى قۇبىلمالى الەمنىڭ سىنىنا توتەپ بەرىپ، قارقىندى دامىپ كەلەدى. بۇل – تەك گەوگرافيالىق تۇرعىدان جاقىندىقتىڭ، عاسىرلارعا ۇلاسقان دوستىقتىڭ ارقاسى عانا ەمەس، ەلدەرىمىزدىڭ وركەندەۋ جولىنداعى تابيعي سۇرانىسى. سوڭعى جىلدارى بىرلەسكەن كۇش-جىگەردىڭ ناتيجەسىندە تاعدىرى ورتاق جۇڭگو مەن قازاقستان اراسىنداعى ىقپالداستىق جاڭا مان-مازمۇنمەن تولىعىپ جاتىر. ءبىرقاتار الەۋمەتتىك ماڭىزى بار جوبالاردىڭ جۇزەگە اسىرىلۋى قوس حالىققا ايتارلىقتاي پايدا اكەلدى. مەن وزىڭىزبەن تىزە قوسىپ، قىتاي-قازاقستان دوستىعىن نىعايتۋعا، ءوڭىردىڭ جانە جالپى الەمنىڭ دامۋىنا ەلەۋلى ۇلەس قوسۋ ءۇشىن ەكى ەلدىڭ سان قىرلى ىنتىماقتاستىعىن ودان ءارى ىلگەرىلەتۋگە ءازىرمىن، – دەدى قحر ءتوراعاسى.
▪️كەلىسسوز بارىسىندا ەكى ەل ىنتىماقتاستىعىنىڭ بارلىق باعىت بويىنشا پەرسپەكتيۆاسى تالقىلاندى. بايىرعى دوستىق پەن ءوزارا قۇرمەتكە ارقا سۇيەگەن ەكى ەل باسشىلارى ەمەن-جارقىن اڭگىمەلەستى.
