شىمكەنتتىك ارتىق دوسالييەۆ 120 توننا جۇكتەگى 5 ۆاگوندى جالعىز ءوزى سۇيرەپ، قازاقستان رەكوردىن جاڭارتتى
شىمكەنت قالاسىنىڭ تۇرعىنى، 52 جاستاعى ارتىق دوسالييەۆ سالماعى 120 توننا بولاتىن بەس جۇك ۆاگونىن جالعىز ءوزى سۇيرەپ، جاڭا قازاقستان رەكوردىن ورناتتى. تاۋەكەلى مەن تاباندىلىعىن دالەلدەگەن سپورتشى بۇل جەتىستىككە ءبىر جىل بويى دايىندالعان.
ول شويىن جول بويىنداعى ۆاگونداردى توقتاماستان 21 مەتر 40 سانتيمەترگە دەيىن جىلجىتتى. رەكوردتى تىركەۋگە كەلگەن قازاقستان رەكوردتار كىتابىنىڭ رەسمي وكىلى رەلستەردىڭ كولبەۋلىگىن، جۇكتىڭ ناقتى سالماعىن جانە اراقاشىقتىقتى مۇقيات تەكسەرىپ، ناتيجەنى رەسمي تۇردە راستادى.
ارتىق دوسالييەۆ پاۋەرليفتينگ سپورتىمەن سوڭعى ءۇش جىل بويى اينالىسىپ كەلەدى. وسى ۋاقىت ىشىندە ول 5 مارتە الەم چەمپيونى، 2 دۇركىن ەۋروپا جەڭىمپازى جانە 8 رەت ازيا جۇلدەگەرى اتانعان. ول بۇل ەرەكشە جەتىستىگىن جەڭىستىڭ 80 جىلدىعىنا، سونداي-اق ەل تاۋەلسىزدىگى جولىندا جانىن قيعان باتىرلار مەن ۇلى تۇلعالاردىڭ رۋحىنا ارنادى.
ارتىق دوسالييەۆ، پاۋەرليفتينگتەن الەم چەمپيونى:
«بۇل – مەنىڭ سوڭعى رەكوردىم ەمەس. الداعى جىلى جەڭىس مەرەكەسى قارساڭىندا 6-7، ءتىپتى 20 ۆاگونعا دەيىن سۇيرەۋدى جوسپارلاپ وتىرمىن. بۇدان بولەك، “بوينگ” ۇشاعىن، اقتاۋدا تانكەر سۇيرەۋ ويىمىزدا بار».
باقىتجان تاستۇلەكوۆ، قازاقستان رەكوردتار كىتابىنىڭ رەسمي وكىلى:
«بۇل ارەكەتتىڭ الەم رەكوردىنا اينالۋى ازىرگە بەلگىسىز. ويتكەنى ءبىز ول جايلى مالىمەتتەردى زەرتتەگەن جوقپىز. دەگەنمەن، ارتىق دوسالييەۆتىڭ جەتىستىگى – قازاقستانداعى رەسمي تۇردە تىركەلگەن جاڭا رەكورد».
