مەملەكەت باسشىسى قاسىم-جومارت توقايەۆ 2025 جىلدى "جۇمىسشى ماماندىقتار جىلى" دەپ جاريالادى. بۇل باستاما جۇمىسشى ماماندىقتارىنىڭ ماڭىزدىلىعىن ارتتىرۋعا، جاستاردى وسى سالاعا تارتۋعا جانە ەڭبەك نارىعىندا سۇرانىسقا يە ماماندىقتار بويىنشا بىلىكتى كادرلاردى دايارلاۋعا باعىتتالعان.

ايماعىمىزدا جۇمىسشى ماماندىقتارىن دارىپتەۋ مەن جاستاردى ەڭبەككە باۋلۋ ماقساتىندا ماڭعىستاۋ وبلىسىنىڭ اكىمى نۇرداۋلەت قيلىباي ءوڭىر جاستارىمەن اشىق فورماتتا كەزدەسۋ وتكىزدى. جيىندا جاستار ءوز ۇسىنىس-پىكىرلەرىن ورتاعا سالىپ، ايماق باسشىسىنا تىكەلەي ساۋالدارىن قويۋعا مۇمكىندىك الدى.

كەزدەسۋگە وبلىس اكىمىنىڭ ورىنباسارلارى، ءتۇرلى سالادا تابىسقا جەتكەن ەل ازاماتتارى قاتىسىپ،تاجىريبەلەرىمەن ءبولىسىپ، جاستارعا باعىت-باعدار بەرەر كەڭەستەرىن ايتتى.

ءۇش ساعاتقا جۋىق سوزىلعان باسقوسۋعا وبلىستىڭ ءار ايماعىنان كەلگەن 500-گە جۋىق جاس قاتىستى. ونىڭ ىشىندە ءتۇرلى سالادا ەڭبەك ەتىپ جۇرگەن ماماندار، جوعارى جانە ارناۋلى ورتا وقۋ ورىندارىنىڭ ستۋدەنتتەرى، «جاسىل ەل» ەڭبەك جاساعى مەن جاستار ۇيىمدارىنىڭ مۇشەلەرى بار.

ەركىن ءارى مازمۇندى فورماتتا وتكەن جۇزدەسۋدە ايماق باسشىسى ومىرلىك تاجىريبەسىمەن ءبولىسىپ، جەتىستىككە جەتۋ جولىنداعى تاباندىلىق پەن ىسكە ادالدىقتىڭ ماڭىزدىلىعىن اتاپ ءوتتى.

- قازىرگى تاڭدا جاستاردىڭ باسىم بولىگى مۇناي سالاسىندا جۇمىس ىستەۋدى قالايدى. بۇل سالادا بوس جۇمىس ورىندارى شەكتەۋلى. قوعامدا ۇلكەن جەتىستىككە جەتكەن ازاماتتاردىڭ ەشقايسىسى بىردەن مۇنايدان باستاعان جوق. بارلىعى قاراپايىم قىزمەتتەن باستادى. ماماندىققا دەگەن ادالدىق، ەڭبەكقورلىق پەن توزىمدىلىك – كەز كەلگەن سالادا جەتىستىككە جەتۋدىڭ باستى شارتى. بۇگىندە ءبىزدىڭ وڭىرگە كورشىلەس شەت ەلدەردەن مىڭداعان ادام كەلىپ جۇمىس ىستەيدى. ولاردىڭ سانى وبلىستاعى جۇمىسسىزدار سانىنان الدەقايدا كوپ. ەڭبەك ەتەمىن دەگەن جانعا جۇمىس بار. ەشتەڭەدەن قورىقپاي، دۇرىس ماماندىق تاڭداپ، ەل يگىلىگى ءۇشىن ەڭبەك ەتىڭىزدەر. سوندا ناتيجەسى بولادى، - دەدى نۇرداۋلەت قيلىباي.

كەزدەسۋدە جاستار ءوز يدەيالارى مەن باستامالارىن ورتاعا سالىپ، ءتۇرلى الەۋمەتتىك جوبالارعا قاتىسۋعا نيەتتى ەكەنىن ءبىلدىردى. اكىم ولاردىڭ ۇسىنىستارىن نازارعا الىپ، كەيبىر باستامالاردى قولداۋعا دايىن ەكەنىن ايتتى.

ايتا كەتەيىك، بۇگىندە ماڭعىستاۋ وبلىسىندا 14 پەن 35 جاس ارالىعىنداعى 240 مىڭنان اسا جاس بار. جاستار ساياساتىن جۇزەگە اسىرۋدا وڭىردە 7 جاستار رەسۋرستىق ورتالىعى جۇمىس ىستەيدى. سونىمەن قاتار، 26 كاسىپورىندا جاس ماماندار كەڭەستەرى قۇرىلعان.

ماڭعىستاۋ وبلىسى اكىمىنىڭ باسپا ءسوز قىزمەتى