19 جەلتوقسان كۇنى قاراقيا اۋدانىنا قاراستى قۇرىق اۋىلىندا تاۋلىگىنە 10 مىڭ تەكشە مەتر سۋ وندىرەتىن سۋ تۇششىتۋ زاۋىتى پايدالانۋعا بەرىلدى. سالتاناتتى شاراعا ماڭعىستاۋ وبلىسىنىڭ اكىمى نۇرداۋلەت قيلىباي، اۋىل اقساقالدارى مەن تۇرعىندار قاتىستى.

اتالعان نىسان مەملەكەت باسشىسىنىڭ سۋ تاپشىلىعىن جويۋ جانە اۋىلدىق اۋماقتاردى ساپالى اۋىز سۋمەن قامتاماسىز ەتۋ جونىندەگى تاپسىرماسى اياسىندا جۇزەگە اسىرىلدى. 

زاۋىتتى «الوكا» ج ش س جۇزەگە اسىردى. جالپى اۋماعى 5 گەكتاردى قۇرايتىن اۋماقتا 50 ۇڭعىمادان سۋ الىنادى. زاۋىتتا سۋ تازارتۋعا ارنالعان قۇم سۇزگىلەرى، بەتوندى رەزەرۆۋارلار جانە تاۋلىگىنە 5 000 تەكشە مەتردەن سۋ وندىرە الاتىن ەكى وسموس قوندىرعىسى ورناتىلعان.

جوبا اياسىندا قۇرىق اۋىلى تاۋلىگىنە 4 000 تەكشە مەتر اۋىز سۋمەن قامتىلىپ، سۋ كولەمىنىڭ قالعان بولىگى جىلى جاعاجاي باعىتىنا، اقتاۋ قالاسىنا جانە مۇنايلى اۋدانىنىڭ باتىر اۋىلىنا جەتكىزىلەدى.

سالتاناتتى شارا بارىسىندا نۇرداۋلەت قيلىباي سۋ تۇششىتۋ زاۋىتى ءوڭىردىڭ ينجەنەرلىك ينفراقۇرىلىمىن دامىتۋعا جانە اۋىز سۋ تاپشىلىعى ماسەلەسىن شەشۋگە زور ۇلەس قوساتىنىن ايتتى.

«قۇرىق اۋىلىندا ىسكە قوسىلعان سۋ تۇششىتۋ زاۋىتى – ءوڭىر تۇرعىندارىن ساپالى اۋىز سۋمەن قامتاماسىز ەتۋگە باعىتتالعان ماڭىزدى جوبا. بۇل جوبا مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، ءوڭىردى اۋىز سۋمەن قامتاماسىز ەتۋ باعىتىندا جۇزەگە اسىرىلىپ وتىر. اتالعان نىسان حالىقتىڭ تۇرمىس ساپاسىن ارتتىرۋعا مۇمكىندىك بەرەدى. الداعى ۋاقىتتا دا ەلدى مەكەندەردى تازا اۋىز سۋمەن قامتۋ باعىتىنداعى جۇمىستار جۇيەلى تۇردە جالعاسىن تابادى»، – دەدى وبلىس اكىمى.

ماڭعىستاۋ وبلىسى اكىمىنىڭ باسپا ءسوز قىزمەتى