بۇگىن، 18 جەلتوقسان كۇنى اقتاۋ قالاسىنىڭ 16-شاعىناۋدانىندا مەملەكەت باسشىسى قاسىم-جومارت توقايەۆتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى اياسىندا №35 جالپى ءبىلىم بەرەتىن مەكتەپ سالتاناتتى تۇردە اشىلدى. بۇل – ماڭعىستاۋ وبلىسىندا اتالعان جوبا بويىنشا ىسكە قوسىلعان ون ءۇشىنشى مەكتەپ.
جاڭا فورماتتاعى ءبىلىم بەرۋ ۇيىمى 1 500 وقۋشىعا ەسەپتەلگەن. جالپى اۋماعى 15 مىڭ شارشى مەتردەن اساتىن مەكتەپتە 77 ءپان كابينەتى قاراستىرىلعان. ولاردىڭ ىشىندە ديزاين جانە تەحنولوگيا، تاماقتانۋ مادەنيەتى، ۆيزۋالدى ونەر، ءۇي مادەنيەتى، روبوتوتەحنيكا، STEM جانە مۋزىكا باعىتىنداعى ارنايى سىنىپتار بار. ءبىلىم ورداسى زاماناۋي وقۋ قۇرال-جابدىقتارىمەن تولىق قامتىلىپ، وقۋشىلاردىڭ شىعارماشىلىق الەۋەتى مەن زياتكەرلىك دامۋىنا قولايلى ورتا قالىپتاستىرىلعان.
اشىلۋ راسىمىنە ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ، ۇستازدار مەن وقۋشىلاردى جاڭا مەكتەپتىڭ اشىلۋىمەن قۇتتىقتادى.
– مەملەكەت باسشىسىنىڭ تاپسىرماسىنا سايكەس وڭىرىمىزدە زاماناۋي ۇلگىدەگى مەكتەپتەر كەزەڭ-كەزەڭىمەن بوي كوتەرۋدە. بۇل باستاما بالالاردىڭ ساپالى ءبىلىم الىپ، بولاشاق ماماندىعىن ەرتەرەك تاڭداۋىنا جول اشادى. جاڭا مەكتەپتەر تەك ءبىلىم بەرۋ ورنى ەمەس، وقۋشىلاردىڭ قابىلەتىن اشىپ، ولاردىڭ جان-جاقتى دامۋىنا جاعداي جاسايتىن كەڭىستىككە اينالۋعا ءتيىس، – دەدى ايماق باسشىسى.
مەكتەپ عيماراتى ەرەكشە ءبىلىم بەرۋدى قاجەت ەتەتىن بالالارعا دا بەيىمدەلگەن. مۇندا سەنسورلىق بولمە، ينكليۋزيۆتى ءبىلىم بەرۋدى قولداۋ كابينەتى جۇمىس ىستەيدى، سونداي-اق مۇمكىندىگى شەكتەۋلى وقۋشىلار ءۇشىن ارنايى جەدەلساتى ورناتىلعان. سونداي-اق قاۋىپسىزدىكتى قامتاماسىز ەتۋ ماقساتىندا مەكتەپ ىشىندە 126 بەينەباقىلاۋ كامەراسى ورناتىلىپ، اۋماعىندا بالالارعا ارنالعان ويىن جانە سپورت الاڭدارى سالىنعان.
ايتا كەتەيىك، بۇعان دەيىن ماڭعىستاۋ وبلىسىندا «كەلەشەك مەكتەپتەرى» ۇلتتىق جوباسى اياسىندا 11 مىڭنان استام وقۋشىعا ارنالعان 12 مەكتەپ پايدالانۋعا بەرىلگەن. وسىلايشا، وڭىردە جوبا اياسىندا جوسپارلانعان بارلىق 13 مەكتەپ تولىق ىسكە قوسىلدى.
ماڭعىستاۋ وبلىسى اكىمىنىڭ باسپا ءسوز قىزمەتى
