بۇگىن، 15 جەلتوقسان كۇنى ماڭعىستاۋ وبلىسىنىڭ اكىمى نۇرداۋلەت قيلىباي مۇنايلى اۋدانىندا «Zero Waste Aktau» ءجشس-نىڭ تۇرمىستىق قاتتى قالدىقتاردى جيناۋ جانە شىعارۋ ءۇشىن ارنالعان جاڭا ارنايى تەحنيكالارىنىڭ تانىستىرىلىمىنا قاتىستى.

ءىس-شارا بارىسىندا اقتاۋ قالاسىنىڭ اكىمدىگى مەن «Zero Waste Aktau» ج ش س اراسىندا قالدىقتاردى جيناۋ جانە شىعارۋ قىزمەتىن جاڭعىرتۋعا باعىتتالعان كەلىسىمشارت جاسالعانى ايتىلدى. كەلىسىم اياسىندا قالا اۋماعى زاماناۋي ەۋرو-ستاندارتقا ساي كونتەينەرلەرمەن جانە ارنايى تەحنيكالارمەن كەزەڭ-كەزەڭىمەن جابدىقتالۋدا.

تانىستىرىلىمدا 2025 جىلى ساتىپ الىنعان «Dongfeng» ماركالى 25 قوقىس تاسىمالداۋ اۆتوكولىگى جانە كولەمى 1،1 تەكشە مەتر بولاتىن 2100 دانا ەۋرو-ستاندارتتاعى كونتەينەر ۇسىنىلدى. سوڭعى ۇلگىدەگى اۆتوكولىكتەر تۇرمىستىق قاتتى قالدىقتاردى جيناۋ، نىعىزداۋ جانە تاسىمالداۋعا ارنالعان، جوعارى جۇك كوتەرگىشتىگىمەن، ۇنەمدىلىگىمەن جانە قالاداعى قارقىندى جۇمىسقا بەيىمدىلىگىمەن ەرەكشەلەنەدى. ال تىعىز جابىلاتىن قاقپاعى بار كونتەينەرلەر قالدىقتاردى جيناۋ پروسەسىن وڭتايلاندىرىپ، جاعىمسىز ءيىستىڭ تارالۋىنا جول بەرمەيدى. قازىرگى تاڭدا 400-گە جۋىق كونتەينەر ورناتىلعان، جىل سوڭىنا دەيىن 2100 كونتەينەردى تولىق ورناتۋ جوسپارلانۋدا.

وبلىس اكىمى ءوز سوزىندە قالدىقتاردى باسقارۋ جۇيەسىن جەتىلدىرۋ ءوڭىردىڭ ەكولوگيالىق قاۋىپسىزدىگى مەن تۇرعىنداردىڭ ءومىر ساپاسىن ارتتىرۋعا باعىتتالعان ماڭىزدى قادام ەكەنىن اتاپ ءوتتى.

ايتا كەتەيىك، جاڭا تەحنيكالار قازاقستاندا قۇراستىرىلعان جانە «جاسىل دامۋ» ۇلتتىق جوباسى اياسىنداعى ينۆەستيسيالىق جوبا شەڭبەرىندە ساتىپ الىنعان. جوبا قالدىقتاردى باسقارۋ جۇيەسىنىڭ تيىمدىلىگىن ارتتىرۋعا جانە ەكولوگيالىق قاۋىپسىزدىكتى قامتاماسىز ەتۋگە باعىتتالعان.

ماڭعىستاۋ وبلىسى اكىمىنىڭ باسپا ءسوز قىزمەتى