بۇگىن، 8 جەلتوقساندا وبلىس اكىمى نۇرداۋلەت قيلىبايدىڭ توراعالىعىمەن ماڭعىستاۋ وبلىسىنىڭ توتەنشە جاعدايلاردىڭ الدىن الۋ جانە جويۋ جونىندەگى كوميسسيا وتىرىسى ءوتتى. جيىندا ءوڭىردىڭ قىس مەزگىلىنە دايىندىعى، كوپقاباتتى تۇرعىن ۇيلەر ماڭىنداعى ءورت قاۋىپسىزدىگى جانە بيولوگيالىق قاۋىپسىزدىك ماسەلەلەرى تالقىلاندى.

ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ مالىمەتىنشە، وڭىردە جىلىتۋ ماۋسىمى بەلگىلەنگەن مەرزىمدە باستالىپ، ءبىرقالىپتى ءوتىپ جاتىر. ينجەنەرلىك ينفراقۇرىلىمدى جوندەۋ جۇمىستارى جۇرگىزىلىپ، جىلۋ، سۋ، گاز جانە ەلەكتر جەلىلەرى جاڭارتىلدى. اقتاۋدا جىلۋ بەرۋ كەزىندە انىقتالعان 259 اقاۋدىڭ بارلىعى جويىلدى.

وڭىردەگى رەسپۋبليكالىق، وبلىستىق جانە اۋداندىق جولداردىڭ قىسقى كۇتىمگە ازىرلىگى ساقاداي ساي. قاجەتتى ماتەريالدار مەن تەحنيكالار دايىندالعان. ماڭعىستاۋ جولدارىن كۇتىپ-ۇستاۋ جۇمىستارىنا 412 جۇمىسشى مەن 155 تەحنيكا جۇمىلدىرىلعان. قىسقى جاعدايعا قارسى ينەرتتى ماتەريالدار، جانار-جاعارماي قورلارى تولىق دايىن، جولدار بويىنداعى سۋ وتكىزگىش قۇبىرلار تازارتىلعان.

سونداي-اق اقتاۋدا بيىك تۇرعىن ۇيلەردىڭ كوبەيۋىنە بايلانىستى ءورت ءسوندىرۋ تەحنيكالارىنىڭ اۋلالارعا ەركىن كىرۋى بويىنشا ماسەلە بار. وسىعان بايلانىستى قالا اكىمدىگىنە بيىك ۇيلەردىڭ اۋماقتارىندا ءورت تەحنيكاسىنا ارنالعان ارنايى جولدار مەن الاڭداردى بەلگىلەۋ ۇسىنىلعان.

سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحتار سەربايەۆ وڭىردە سانيتاريالىق-ەپيدەميولوگيالىق جاعداي جالپى تۇراقتى بولعانىمەن، جرۆي، تۇماۋ، تاعامنان ۋلانۋ جانە ۆ گەپاتيتى سياقتى اۋرۋلار بويىنشا ءوسىم بايقالعانىن باياندادى. سونداي-اق وبا، تىرىسقاق، ءسىبىر جاراسى، كوكجوتەل جانە ءبىرقاتار ءقاۋىپتى اۋرۋلار تىركەلمەگەن.

وتىرىس قورىتىندىسى بويىنشا وبلىس اكىمى جاۋاپتى مەكەمەلەرگە قىسقى قاۋىپسىزدىكتى قامتاماسىز ەتۋ، ءورت جانە بيولوگيالىق قاۋىپتەردىڭ الدىن الۋ بويىنشا ناقتى تاپسىرمالار بەردى.

«ءوڭىر تۇرعىندارىنىڭ قاۋىپسىزدىگىن قامتاماسىز ەتۋ – ءبىزدىڭ باستى مىندەتىمىز. ءاربىر ادامنىڭ ءومىرى مەن دەنساۋلىعى ماڭىزدى. وسىعان بايلانىستى بارلىق جاۋاپتى مەكەمەلەرگە وزدەرىنە جۇكتەلگەن مىندەتتەردى تولىق ءارى ۋاقىتىلى ورىنداۋدى تاپسىرامىن»، – دەدى ماڭعىستاۋ وبلىسىنىڭ اكىمى نۇرداۋلەت قيلىباي.

ماڭعىستاۋ وبلىسى اكىمىنىڭ باسپا ءسوز قىزمەتى