بۇگىن، 17 جەلتوقسان كۇنى اقتاۋ قالاسىندا «جاس تۇلپار – 2025» وبلىستىق جاستار پرەمياسىن سالتاناتتى تابىستاۋ ءراسىمى ءوتتى. ءىس-شاراعا وبلىس اكىمىنىڭ ورىنباسارى ەربول ىزبەرگەنوۆ قاتىسىپ، جەڭىمپازداردى ءوڭىر باسشىسىنىڭ اتىنان قۇتتىقتادى.

وبلىستىق پرەميا اياسىندا ءبىلىم مەن عىلىم، مەديسينا، كاسىپكەرلىك، سپورت، مادەنيەت، بۇقارالىق اقپارات قۇرالدارى جانە قوعامدىق قىزمەت سالالارىندا جەتىستىككە جەتكەن جاستار 12 نوميناسيا بويىنشا ماراپاتتالدى. اتاپ ايتقاندا، «ۇزدىك جاس عالىم»، «ۇزدىك جاس ءمۇعالىم»، «ۇزدىك جاس دارىگەر»، «جاس كوشباسشى»، «بەيبىت كۇننىڭ باتىرى»، «جىل جاڭالىعى» سىندى نوميناسيالار بويىنشا ۇزدىكتەر انىقتالدى.

ءىس-شاراعا ءوڭىردىڭ بەلسەندى جاستارى، ۆولونتەرلەر، سپورتشىلار، قوعامدىق ۇيىم وكىلدەرى مەن اۋدان-قالا جاستارى قاتىسىپ، جالپى سانى 300-گە جۋىق ادامدى قامتىدى.

سالتاناتتى جيىندا ءسوز سويلەگەن ەربول ىزبەرگەنوۆ وڭىردە مەملەكەتتىك جاستار ساياساتى جۇيەلى تۇردە ىسكە اسىرىلىپ جاتقانىن جەتكىزدى.

– مەملەكەت باسشىسى قاسىم-جومارت توقايەۆ جاستاردى قولداۋدىڭ، ولاردىڭ وتانشىل، ءبىلىمدى، ەڭبەكقور جانە ءادىل بولىپ قالىپتاسۋىنىڭ ماڭىزىن ۇنەمى اتاپ وتەدى. ماڭعىستاۋدا وبلىس حالقىنىڭ 30 پايىزدان استامى جاستار. جاستاردى قولداۋعا باعىتتالعان جوبالار مەن باعدارلامالارعا مەملەكەتتەن قارجى ءبولىنىپ، باسپانا، گرانتتار مەن ۆولونتەرلىك باستامالار ىسكە اسىرىلۋدا. بۇل ءۇردىس الداعى ۋاقىتتا دا جالعاسىن تابادى. «جاس تۇلپار» سىيلىعى – ەل دامۋىنا ۇلەس قوسىپ جۇرگەن جاستاردى ۇلىقتايتىن ماڭىزدى ماراپات. ەل يگىلىگى ءۇشىن جاساپ جاتقان قىزمەتتەرىڭىزگە العىسىمدى بىلدىرەمىن! ءاربىر باستامالارىڭىزعا ساتتىلىك تىلەيمىن! – دەدى ول.

ماڭعىستاۋ وبلىسى اكىمىنىڭ باسپا ءسوز قىزمەتى