ءماجىلىس دەپۋتاتى اسحات ايماعامبەتوۆ سالىق كودەكسىنە ەنگىزىلگەن تۇزەتۋلەردىڭ ۇكىمەت تاراپىنان قولداۋ تاپقانىن حابارلادى. ەندى الەۋمەتتىك ماڭىزى بار اۋرۋلاردى ەمدەۋگە ارنالعان مەديسينالىق قىزمەتتەر مەن دارى-دارمەكتەرگە 0% قوسىلعان قۇن سالىعى (ققس) مولشەرلەمەسى قولدانىلاتىن بولادى.

ارنايى ۇكىمەت قاۋلىسىمەن بەكىتىلەتىن تىزىمگە سايكەس، حالىق ءۇشىن اسا قاجەت جانە الەۋمەتتىك ماڭىزى بار دارى-دارمەكتەر ققس-تان تولىق بوساتىلادى. بۇل باستاما اتالعان دارى-دارمەكتەردىڭ كۇرت قىمباتتاپ كەتۋىنىڭ الدىن الۋعا باعىتتالعان.

دەپۋتاتتىڭ ايتۋىنشا، بۇل ۇسىنىستى ول بۇعان دەيىن دە كوتەرگەن، الايدا باستاپقىدا ۇكىمەت تاراپىنان قولداۋ تاپپاعان. الايدا ۇزاق تالقىلاۋدان كەيىن ەكى تاراپ ءوزارا ىمىراعا كەلىپ، وسىنداي شەشىمگە قول جەتكىزدى.

سونىمەن قاتار، ققس قولدانىلاتىن وزگە مەديسينالىق قىزمەتتەر مەن دارى-دارمەكتەر بويىنشا دا ماڭىزدى كەلىسىم جاسالدى:

• 2026 جىلدان باستاپ ققس مولشەرلەمەسى 5%-عا ۇلعايتىلادى؛

• 2027 جىلى تاعى 5%-عا وسەدى – بۇل وزگەرىس كەزەڭ-كەزەڭمەن ەنگىزىلەدى.

"ايتا كەتەتىن تاعى ءبىر جاعىمدى جاڭالىق — تەگىن مەديسينالىق كومەكتىڭ كەپىلدىك بەرىلگەن كولەمى (تمككك) مەن مىندەتتى الەۋمەتتىك مەديسينالىق ساقتاندىرۋ (ءمامس) اياسىنداعى بارلىق مەديسينالىق قىزمەتتەر مەن دارى-دارمەكتەر دە ققس-تان تولىق بوساتىلادى. قازىرگى تاڭدا باستى ماقسات — حالىق ءۇشىن ەڭ قاجەت دارى-دارمەكتەر مەن مەديسينالىق كومەكتىڭ قولجەتىمدىلىگىن ساقتاۋ"، — دەپ جازدى اسحات ايماعامبەتوۆ.