2025 جىلى قازاقستاندا 323 شاقىرىم جىلۋ جەلىسىن كۇردەلى جوندەۋ جانە رەكونسترۋكسيالاۋ جوسپارلانىپ وتىر. بۇل تۋرالى ۇكىمەت وتىرىسىندا ەنەرگەتيكا ۆيسە-مينيسترى سۇڭعات ەسىحانوۆ مالىمدەدى.

ونىڭ ايتۋىنشا، بۇل جۇمىستارعا جالپى كولەمى 89،7 ملرد تەڭگە ينۆەستيسيا تارتۋ كوزدەلگەن. سونىڭ ىشىندە 75،7 ملرد تەڭگەسى – بيۋدجەت قاراجاتى، ال 14 ملرد تەڭگە – كاسىپورىنداردىڭ تاريفتىك سمەتاسى شەڭبەرىندە قاراستىرىلادى.

بۇدان بولەك، بيىل قابىلدانعان “ەنەرگەتيكالىق جانە كوممۋنالدىق سەكتورلاردى جاڭعىرتۋ” ۇلتتىق جوباسى اياسىندا قوسىمشا 129 شاقىرىم جىلۋ جەلىسى جاڭعىرتىلماق. بۇل ماقساتقا 98،7 ملرد تەڭگە ينۆەستيسيا تارتۋ جوسپارلانعان.

سونداي-اق جىلۋ جەلىلەرىن قايتا قۇرۋ جانە جاڭعىرتۋدىڭ 56 جوباسىن ىسكە اسىرۋ ءۇشىن قوسىمشا 103،3 ملرد تەڭگە قاجەت. ونىڭ ىشىندە 28 جوبانى اياقتاۋعا – 37،3 ملرد تەڭگە، ال تاعى 28 جاڭا جوبانى ىسكە اسىرۋعا – 66 ملرد تەڭگە كەرەك، دەدى ۆيسە-مينيستر.