بۇگىن ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە مەدياداعى جاساندى ينتەللەكت زەرتحاناسى اشىلدى. «AI MediaLab» نەيروجەلىلەردى مەديا جانە كوممۋنيكاسيا سالاسىندا قولداناتىن ەلىمىزدەگى العاشقى زەرتحانا.

ۋنيۆەرسيتەت رەكتورى جانسەيىت تۇيمەبايەۆتىڭ ايتۋىنشا، بۇل — قازۇۋ-دىڭ ءبىلىم مەن تاجىريبەگە سۇيەنىپ، زاماناۋي ەكوجۇيە قالىپتاستىرۋعا باعىتتالعان ستراتەگيالىق قادامى. پرەزيدەنت قاسىم-جومارت توقايەۆ تا ءوز جولداۋلارىندا ەلىمىزدىڭ تەحنولوگيالىق جانە عىلىمي-يننوۆاسيالىق تاۋەلسىزدىگىن نىعايتۋ ءۇشىن جاساندى ينتەللەكتىنىڭ ماڭىزىن بىرنەشە رەت اتاپ وتكەن بولاتىن.

زەرتحانا ءال-فارابي اتىنداعى قازۇۋ-دىڭ جاساندى ينتەللەكت جانە Big Data كافەدراسىمەن بىرلەسىپ كەشەندى عىلىمي زەرتتەۋلەر جۇرگىزەدى. وندا دەرەكتەردى تالداۋ، ۆيزۋالدى ستوريتەللينگ، جوعارى ساپالى كەسكىندەرمەن جۇمىس ىستەۋ جانە LLM قۇرالدارىن قولدانۋ ارقىلى ءتۇرلى تەحنولوگيالىق شەشىمدەر ازىرلەنبەك. زەرتحانا زاماناۋي LG Ultra Gear مونيتورلارىمەن جابدىقتالعان.

«AI MediaLab» سيفرلىق تەحنولوگيالار مەن الەۋمەتتىك عىلىمداردىڭ توعىسىندا ءبىلىم بەرۋدى ماقسات ەتەدى. بۇل ءپانارالىق ءتاسىل ءبىلىم الۋشىلارعا مەدياسالاداعى جاساندى ينتەللەكت قۇرالدارىن مەڭگەرۋگە مۇمكىندىك بەرەدى.

2025 جىلدىڭ ءساۋىر ايىندا وتكەن «فارابي الەمى» حالىقارالىق فورۋمى اياسىندا مەدياسالاداعى جي تاقىرىبىنا ارنالعان حالىقارالىق كونفەرەنسيا ءوتتى. وندا ستۋدەنتتەردىڭ قاتىسۋىمەن جاسالعان العاشقى عىلىمي-كوگنيتيۆتى جانە ينكليۋزيۆتى گازەت — «AI-Tamyz» تانىستىرىلدى.

سونداي-اق، جۋرناليستيكا فاكۋلتەتىندە جاڭا «AI&Media» ماگيستراتۋرا باعدارلاماسى ىسكە قوسىلادى. باعدارلاما ماسس-مەديا، IT جانە ديزاين سالالارىنىڭ توعىسىندا جوعارى بىلىكتى ماماندار دايارلاۋدى كوزدەيدى.

ايتا كەتۋ كەرەك، وتكەن جىلى قازاقستان مەن جۇڭگو اراسىنداعى مەملەكەتارالىق كەلىسىم اياسىندا قازۇۋ بازاسىندا سۋپەركومپيۋتەر ورناتىلعان. قازىرگى ۋاقىتتا ونى ىسكە قوسۋ بويىنشا دايىندىق جۇمىستارى ءجۇرىپ جاتىر. بۇل قۇرىلعى سيفرلىق «ەگىزدەر» جاساۋ، جي دامىتۋ جانە كۇردەلى عىلىمي ماسەلەلەردى شەشۋ ءۇشىن قولدانىلماق. الداعى ۋاقىتتا «AI MediaLab» وسى سۋپەركومپيۋتەرمەن ورتاق دەرەكقورعا بىرىكتىرىلەدى.