سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى جۋالى اۋدانىنىڭ №4 مەكتەبى ديرەكتورىنىڭ اتىنا قوڭىراۋ شالىپ، ءوزىن اگەنتتىك ءتوراعاسى رەتىندە تانىستىرعان بەلگىسىز ازاماتقا قاتىستى تەرگەۋ جۇرگىزدى.

تەكسەرۋ ناتيجەسىندە قوڭىراۋ شالعان ادامنىڭ اتىراۋ وبلىسىندا تۇراتىنى جانە ونىڭ جەكە باسى انىقتالعان.

"ول ءوزىن سىبايلاس جەمقورلىققا قارسى قىزمەتتىڭ ءتوراعاسى رەتىندە كورسەتىپ، بۇعان دەيىن ەڭبەك ءتارتىبىن بۇزعانى ءۇشىن (جۇمىس ورنىندا ماس كۇيىندە بولعانى ءۇشىن) جۇمىستان بوساتىلعان قىزمەتكەردى قايتا جۇمىسقا قابىلداۋعا ىقپال ەتۋدى سۇراعان"، – دەلىنگەن رەسمي حابارلامادا.

اتالعان فاكتى بويىنشا 8 مامىردا پوليسيا دەپارتامەنتى ق ر اقبتك 73-3-بابى 2-بولىگىنە (جالا جابۋ) سايكەس اكىمشىلىك قۇقىق بۇزۋشىلىق تۋرالى حاتتاما تولتىرىپ، ءىستى اتىراۋ قالالىق اكىمشىلىك قۇقىق بۇزۋشىلىق جونىندەگى مامانداندىرىلعان سوتقا جولدادى.

سوت پروسەسى بارىسىندا ازامات كىناسىن تولىق مويىندادى جانە جاساعان ىسىنە وكىنىش ءبىلدىردى.

14 مامىردا سوت شەشىمى بويىنشا، س. ق ر اقبتك-نىڭ 73-3-بابى 2-بولىگى بويىنشا كىنالى دەپ تانىلدى جانە ايىپپۇل تۇرىندە اكىمشىلىك جاۋاپكەرشىلىككە تارتىلدى.