"التىن وردا" بازارىنىڭ بۇرىنعى باسشىلارى قانات المابەك پەن دانيار ءابدىعاپاروۆقا ىزدەۋ جاريالاندى. ەكەۋى دە 2025 جىلعى 23 مامىردان باستاپ ىزدەۋدە.

ق ر ىشكى ىستەر مينيسترلىگىنىڭ دەرەگىنشە، قانات المابەك — 1984 جىلعى 10 ساۋىردە تۋعان، قازاقستان ازاماتى، ۇلتى — قازاق. ىزدەۋ ءىسى الماتى وبلىسى بويىنشا تىركەلگەن. ىزدەۋدى باستاعان ورگان — ءىىم، ال تىكەلەي ىزدەستىرۋ شارالارىن قاراساي اۋداندىق پوليسيا باسقارماسى جۇرگىزۋدە.

سول سەكىلدى، دانيار امالبەك ۇلى ءابدىعاپاروۆ — 1982 جىلعى 1 ناۋرىزدا تۋعان، قازاقستان ازاماتى. ول دا ءۇش كۇننەن بەرى ىزدەۋدە. ىزدەۋ الماتى وبلىسى بويىنشا تىركەلىپ، ىزدەستىرۋدى قاراساي اۋدانىنىڭ پوليسياسى جۇرگىزىپ جاتىر.

ەكى ازاماتقا قاتىستى قۇقىق قورعاۋ ورگاندارى اسا ءىرى كولەمدە الاياقتىق جاسادى دەگەن كۇدىكپەن تەرگەۋ جۇرگىزىپ جاتىر. ولاردىڭ قىلمىستىق توپ قۇرامىندا ارەكەت ەتكەنى، سونداي-اق “التىن وردا” بازارىنداعى ساۋدا نۇكتەلەرىن رەيدەرلىك جولمەن تارتىپ الۋ، جەمقورلىق جانە مۇلىكتىك الاياقتىق فاكتىلەرىنە قاتىسى بولۋى مۇمكىن ەكەنى ايتىلۋدا.

ايتا كەتەيىك، “التىن وردا” بازارى — الماتى مەن الماتى وبلىسى اراسىنداعى ەڭ ءىرى ساۋدا حابتارىنىڭ ءبىرى. بۇل بازار توڭىرەگىندەگى ۇزاققا سوزىلعان ىقپال ءۇشىن كۇرەس قۇقىق قورعاۋ ورگاندارىنىڭ نازارىندا كەلە جاتىر.