شەرزات بولاتتىڭ ءولىمى بويىنشا ءوتىپ جاتقان سوت پروسەسىندە ايىپتالۋشى دارحان اسكەنتايدىڭ ادۆوكاتتارى سوتقا ءوتىنىشحات ءتۇسىردى.

الايدا سوت ادۆوكات ەرجانوۆتىڭ ءوتىنىشحاتتارىن اشىق قالدىردى. سۋديا الدىمەن دارحان اسكەنتايدان جاۋاپ الىناتىنىن جەتكىزدى.

ايىپتالۋشى دارحان اسكەنتايدىڭ ادۆوكاتى تەرگەۋ كەزىندە ونىڭ قىسىم كورگەنىن ايتىپ، وقيعا بولعاننان كەيىن وعان مەديسينالىق كومەك كورسەتكەن دارىگەرلەردى سوتقا شاقىرۋدى ءوتىندى.

شەرزات بولاتتىڭ بەت تۇسىنا سوققى جاساعانى تۋرالى دەرەك بويىنشا تالعار اۋداندىق اۋرۋحاناسىندا اسكەنتايعا مەديسينالىق تەكسەرىس جۇرگىزىلگەن. ءبىراق تەكسەرىس كەزىندە قاجەتتى مەديسينالىق كومەك كورسەتىلمەدى، سونىڭ سالدارىنان دارحان اسكەنتاي تەرگەۋ كەزىندە تولىققاندى جاۋاپ بەرە المادى. سونىمەن قاتار، ونىڭ دەنساۋلىعى ەسكەرىلمەي، بارلىق سوت تەرگەۋى زاڭسىز ءارى قىسىممەن وتكىزىلدى، - دەدى ادۆوكات.

ونىڭ ايتۋىنشا، 28 كۇن بويى اسكەنتايعا ەشقانداي ەم كورسەتىلمەگەن.

اسكەنتاي دارحاننىڭ كوزىنىڭ استىنداعى سۇيەگى سىنىپ، كوزى ىرىڭدەپ كەتكەن. ونىڭ دەنساۋلىق جاعدايىنا بايلانىستى، قونايەۆ قالاسىنداعى ۋاقىتشا ۇستاۋ يزولياتورىنا اۋىستىرىلعان كەزدە العاش بولىپ قونايەۆ اۋرۋحاناسىنا جەتكىزىلىپ، مەديسينالىق كومەك كورسەتىلدى. وسى ماسەلە بويىنشا ۋاقىتشا ۇستاۋ يزولياتورىنىڭ باسشىسىن كۋا رەتىندە سوتقا شاقىرۋدى سۇرايمىن، – دەدى ادۆوكات ەرجانوۆ.

سونىمەن قاتار ول جابىرلەنۋشىنىڭ زاڭدى وكىلى نۇرىموۆ قارجاۋبايدىڭ سوتتا بەرگەن جاۋاپتارىنان كەيىن اسكەنتاي دارحاننىڭ رينات ەسىمدى جەزدەسىن قوسىمشا كۋا رەتىندە جاۋاپ الۋعا، ونى سوتقا شاقىرۋدى وزىنە جۇكتەۋدى ءوتىندى.

ول سۋديادان جابىرلەنۋشىنىڭ زاڭدى وكىلى نۇرىموۆ قارجاۋبايعا قورعاۋ تاراپىنان قويىلماعان بىرنەشە سۇراق بار ەكەنىن ايتتى. وسىعان بايلانىستى نۇرىموۆ قارجاۋبايدان قايتا جاۋاپ الۋىن سۇرادى.