دەنساۋلىق ساقتاۋ مينيسترلىگى دارىلىك ساياسات دەپارتامەنتىنىڭ ديرەكتورى جاندوس ءادىلحان ەلدەگى دارى-دارمەك باعاسىنا قاتىستى جاۋاپ بەردى.

ايتۋىنشا، مينيسترلىك باعا ساياساتىنا قاتىستى ءبىرقاتار جۇمىس اتقارۋدا.

قازىرگى تاڭدا ەلىمىزدەگى دارىلىك زاتتاردىڭ باعاسىن تۇراقتاندىرۋ بويىنشا مينيسترلىك ءبىرقاتار جۇمىستار جۇرگىزىلدى. 2024 جىلدىڭ سوڭىندا دارىلىك زاتتار مەن مەديسينالىق بۇيىمداردىڭ باعاسىن بەلگىلەۋ بويىنشا ەرەجەلەرىنە ءتيىستى زاڭنامالىق وزگەرىستەر ەنگىزىلدى. اتاپ ايتقاندا، بۇرىندارى دارىلىك زاتتاردىڭ باعاسىن قالىپتاستىرۋ كەزىندە ارتىق پايىزدىق ۇستەماقىلار قوسىلاتىن. ياعني كەدەندىك سالىق، ماركەتينگتىك سالىق، تاسىمالداۋدى قوسقاندا، "پايىزدىڭ ۇستىنە پايىز" قاعيداتى قولدانىلىپ كەلگەن. قازىرگى تاڭدا مينيسترلىك بۇل ەسكەرتۋلەردى قولعا الىپ، الەمدىك حالىقارالىق تاجىريبە نەگىزىندە باعا ساياساتىن تۇراقتاندىرۋ بويىنشا مەحانيزمدى قالىپتاستىردى. بۇل دەگەنىمىز – ءدارىنىڭ نەگىزگى باعاسىنا ارتىق شىعىنداردى قوسۋ پايىزى الىنىپ تاستالدى. بۇل نەگە اكەلەدى؟ زاۋىتتان وندىرىلەتىن دارىلىك زاتتاردىڭ تۇتىنۋشىعا كەلگەنگە دەيىنگى باعاسىن كوتەرمەي، ءبىرقالىپتى ۇستاپ تۇرۋعا قول جەتكىزىلەدى، - دەپ اتاپ ءوتتى ۆەدومستۆو وكىلى.

سونىمەن قاتار ول تەك قانا ءديستريبيۋتوردىڭ، بولماسا وزىندىك شىعىننىڭ قۇنى عانا كورسەتىلەتىندىگىن العا تارتتى.

بىرىنشىدەن، حالىققا ءتيىمدى قولجەتىمدى ءارى ساپالى دارىگە قول جەتكىزۋ ماقساتى تۇر. ەكىنشىدەن، قازىرگى تاڭدا كوپتەگەن پرەپاراتتىڭ باعا ساياساتىن نەگىزسىز كوتەرۋىنە بايلانىستى قوسىمشا بۇيرىققا وزگەرىستەر ەنگىزىلىپ جاتىر. اتاپ ايتساق، بۇرىندارى فارمكومپانيانىڭ جانە زاۋىتتاردىڭ وكىلدەرىندە ديستريبيۋتورلەردىڭ باعاسىن بەلگىلەۋ بويىنشا تىركەۋ كەزىندە عانا باعا ۇسىنىلاتىن بولسا، ءقازىر ەكى جىلدا ءبىر رەت مىندەتتى تۇردە باعا ساياساتىن قايتا تىركەۋگە مىندەتتەيتىن بولامىز. جاڭا مەحانيزم قالىپتاستىرعان سايىن بۇرىنعى ەسكى باعامەن بەكىتىلگەن دارىلەر مىندەتتى تۇردە تۇسەدى دەپ بولجاپ وتىرمىز. بۇيرىققا وزگەرىس ەنگىزگەننەن كەيىن ءدارى ارزاندايدى دەپ كۇتۋدەمىز، - دەپ جاۋاپ بەردى دەپارتامەنت باسشىسى.

ال بيىلدان باستاپ قوسىمشا قۇن سالىعىنىڭ ارتۋى دارى-دارمەك باعاسىنا قالاي اسەر ەتەتىندىگىنە قاتىستى سۇراققا جاۋاپ بەردى.

قوسىمشا قۇن سالىعىنا قاتىستى دەنساۋلىق ساقتاۋ سالاسىندا ارنايى جۇمىس توبى بار. ولاردىڭ قۇرامىندا ءماجىلىس دەپۋتاتتارى، ارنايى بيزنەس وكىلدەرى قامتىلعان. دارىلىك زاتتاردىڭ باعاسىنا قوسىمشا قۇن سالىعىن قوسپاۋعا قاتىستى بىرنەشە رەت تالقىلاۋ ءوتتى. سايكەسىنشە، ول ءدارى باعاسىنىڭ قىمباتتاۋىنا اكەلۋىنە بايلانىستى ول قاعيداتتى (ققس قوسۋ – رەد.) ۇستانبايمىز، - دەيدى جاندوس ءادىلحان.