1 شىلدەدەن باستاپ ەلىمىزدە بارلىق مەديسينا ۇيىمدارىندا مكابج ەنگىزۋ باستالادى.
جۇيەنىڭ ەرەكشەلىگى تۋرالى الەۋمەتتىك مەديسينالىق ساقتاندىرۋ قورىنان سۇراپ كورگەن ەدىك.
مەملەكەت باسشىسىنىڭ مىندەتتى الەۋمەتتىك مەديسينالىق ساقتاندىرۋ جۇيەسىنىڭ تيىمدىلىگىن ارتتىرۋ جونىندەگى تاپسىرماسى اياسىندا دەنساۋلىق ساقتاۋ سالاسىندا مەديسينالىق كومەكتى تولەۋدىڭ ءبىرىڭعاي جۇيەسى (مكتبج) ەنگىزىلە باستادى. جاڭا سيفرلىق قۇرال تەگىن مەديسينالىق كومەكتىڭ كەپىلدىك بەرىلگەن كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) اياسىندا كورسەتىلەتىن مەديسينالىق قىزمەتتەردىڭ ساپاسى مەن قارجىلاندىرىلۋىن باقىلاۋعا مۇمكىندىك بەرەدى، - دەپ جاۋاپ بەردى الەۋمەتتىك مەديسينالىق ساقتاندىرۋ قورى رەداكسيانىڭ رەسمي ساۋالىنا.
بيىل ناۋرىز ايىندا ءبىرىڭعاي تولەم جۇيەسىنىڭ پيلوتتىق جوباسى اقمولا وبلىسىنداعى مەديسينالىق ۇيىمداردا ىسكە قوسىلدى.
ال 1 شىلدەدەن باستاپ بۇل جۇيە ەلىمىزدىڭ بارلىق مەديسينا ۇيىمدارىندا ەنگىزىلەدى.
جاڭا سيفرلىق جۇيە ارقىلى:
- كورسەتىلگەن مەديسينالىق كومەكتىڭ نەگىزدىلىگىن ۇزدىكسىز باقىلاۋ جانە دەربەس ەسەپكە الۋ نەگىزىندە مەديسينالىق قىزمەتتەردىڭ اشىقتىعى قامتاماسىز ەتىلەدى؛
- نەگىزسىز تولەمدەردى جويۋعا جانە مەديسينالىق قىزمەتتەردىڭ ساپاسىن باقىلاۋدى كۇشەيتۋگە بولادى؛
- مەديسينالىق كومەكتى كورسەتۋ كەزىندەگى قاتەلىكتەر مەن زاڭبۇزۋشىلىقتار، سونىڭ ىشىندە "جالعان كورسەتىلىمدەر" اۆتوماتتى تۇردە انىقتالادى؛
- مەديسينالىق قىزمەتتەر ءۇشىن تەك ناقتى كورسەتىلگەن كومەككە عانا تولەم جۇرگىزىلەتىنىنە كەپىلدىك بەرىلەدى.
اتالعان جۇيەلەر قارجىنى ءتيىمدى پايدالانۋ، جالعان مالىمەتتەردى بولدىرماۋ جانە سىبايلاس جەمقورلىق تاۋەكەلدەرىن ازايتۋعا باعىتتالعان.
مەديسينالىق قىزمەتتەردىڭ ساپاسىن باقىلاۋدىڭ اۆتوماتتاندىرىلعان جۇيەسى مەديسينا ۇيىمدارىن پاسيەنتتەردىڭ ناقتى قاجەتتىلىكتەرىنە بەيىمدەلۋگە ىنتالاندىرادى.
اقمولا وبلىسىنداعى پيلوتتىق جوبا ناتيجەلەرى جاڭا جۇيەنىڭ تيىمدىلىگىن راستادى. پيلوتتىق رەجيمنىڭ وزىندە-اق جۇيە 11 مىڭنان استام مەديسينالىق كومەكتىڭ بەكىتىلگەن ستاندارتتارعا سايكەس كەلمەيتىن دەرەگىن، سونىڭ ىشىندە جالعان جازبالاردى انىقتادى. انىقتالعان زاڭبۇزۋشىلىقتار بويىنشا ۇيىمداستىرۋشىلىق جانە قارجىلىق شارالار قابىلدانادى. بۇل جاڭاشىلدىقتىڭ ارقاسىندا مەديسينالىق قىزمەتتەردى قارجىلاندىرۋ ادىلەتتى ءارى تيىمدىرەك بولادى، ال پاسيەنتتەر ساپالى ءارى ۋاقتىلى ەم الۋعا ۇمىتتەنە الادى، - دەدى قور.
