وسكەمەن اۋەجايىنىڭ بۇرىنعى باسشىلىعىنا قاتىستى تەرگەۋ اياقتالدى. ولار سەنىپ تاپسىرىلعان مۇلىكتى اسا ءىرى كولەمدە يەمدەنۋ جانە قىلمىستىق جولمەن الىنعان قاراجاتتى زاڭداستىرۋ فاكتىلەرى بويىنشا ايىپتىلىپ وتىر، دەپ حابارلايدى قارجىلىق مونيتورينگ اگەنتتىگى.
اۋەجايدىڭ بۇرىنعى پرەزيدەنتى مەن وزگە دە لاۋازىمدى تۇلعالارى بەس جىل بويى ەڭبەكاقىنى نەگىزسىز كوبەيتىپ، جالعان سىياقىلار مەن جالعان شارتتار جاساۋ ارقىلى جۇيەلى تۇردە اقشا جىمقىرعان. ارتىنان ونى كاسسا ارقىلى قولما-قول اقشاعا اينالدىرىپ وتىرىپتى.
"بۇدان بولەك، اۋەجايعا تيەسىلى كولىك قۇرالدارى بۋحگالتەرلىك ەسەپتەن شىعارىلىپ، نارىقتاعى قۇنىنان بىرنەشە ەسە تومەن باعامەن سەنىمدى تۇلعالارعا ساتىلعان. ال اۋەجايدىڭ كوممەرسيالىق نىساندارى جەڭىلدەتىلگەن شارتتارمەن جالعا بەرىلگەن. وسىلايشا، جالداۋ اقىسى تومەندەتىلىپ، ناقتى جالعا بەرىلگەن اۋماق ازايتىلىپ كورسەتىلگەن"، - دەلىنگەن رەسمي حابارلامادا.
مەملەكەتكە كەلتىرىلگەن جالپى زالال 157 ملن تەڭگەنى قۇرادى. قازىرگى كەزدە سوت سانكسياسىمەن كۇدىكتىلەردىڭ 126 ملن تەڭگە كولەمىندەگى مۇلكىنە، سونىڭ ىشىندە 4 پاتەر، جەر ۋچاسكەسى جانە 2 اۆتوكولىككە تىيىم سالىندى.
كۇدىكتىلەردىڭ ءبارى قاماۋعا الىندى.
