اۆتور: مۇرات وتەباي ۇلى
تەڭدەسسىز جالعان ءسوز، ەكىجۇزدىلىك پەن جاعىمپازدىقتىڭ قوعامىمىزبەن بىتە قايناسقانىنا كوپ بولدى.
بيلىك تاراپىنان ەشقانداي قارسىلىق كورمەگەندىكتەن، ول ءورشىپ، جاعىمپازدىق تامىرىن تەرەڭگە جايىپ، قوعامنىڭ دەرتىنە اينالدى.
بيلىك دەسە ءبارىن ۇمىتىپ، بايلىق، مانساپ، اتاق دەسە ەستەن ايىرىلىپ، جەمە-جەمگە كەلگەندە ۇلتتىڭ مۇددەسىن ساتىپ، «ءماز بولادى بولىسىڭ» دەگەننىڭ كەبىن كيىپ ءجۇرمىز.
بۇگىندە جاعىمپازدىقتىڭ جۇيەسى ءالى جويىلعان جوق.
كەزىندە تۇڭعىش پرەزيدەنتتى جەر-كوككە سىيعىزباي ماقتاعاندار ەندى كەشەگى جۇيەنىڭ كەمشىلىكتەرىن ءتىزىپ، سىناۋعا كوشتى. ولار قازىرگى جۇيەگە بەيىمدەلۋگە جانە بۇرىنعى پرەزيدەنتتەن بويىن اۋلاق سالۋعا تىرىسۋدا. مۇنداي جاعىمپازدار بىزدە تەك دەپۋتاتتار اراسىندا عانا ەمەس، شەنەۋنىكتەردىڭ، زيالى قاۋىم وكىلدەرىنىڭ، بلوگەرلەر مەن جۋرناليستەردىڭ اراسىندا دا بار.
جارامساقتار مەن جاعىمپازدار ءۇشىن ولاردىڭ تىرەگى دە، سۇيەنىشى دە – بيلىككە دەگەن «سەنىم» عانا.
ولاردىڭ سەنىمى بيلىك اۋىسقان سايىن وزگەرەدى. جاڭا بيلىك كەلىسىمەن-اق ۇستانىمدارىن لەزدە وزگەرتىپ، ەش ويلانباستان تاعى ءبىر «جاڭا سەنىمگە» يە بولادى.
ونداي دەڭگەيگە تۇسكەن ادامداردان ەلگە جاقسىلىق كۇتۋ بەكەر-اۋ.
مۇنداي پيعىلداعى ادامدار حالىققا ەشقانداي الەۋمەتتىك وزگەرىس تە، جاقسىلىق تا اكەلمەيدى.
ولارعا ادىلەت پەن شىندىق اياقاستى بولىپ جاتسا دا – ءبارىبىر. ايتەۋىر جوعارىدا وتىرعان ىقپالدى ادامداردىڭ كوڭىلىنەن شىعىپ، ءوز مانسابىنىڭ جولىن تۇزەسە بولعانى. ولاردىڭ ومىرلىك ساياسي ماقساتىنىڭ ەڭ ۇلكەنى دە، نەگىزگىسى دە – جوعارىعا ۇناۋ، جوعارىعا جاعىنۋ.
جاعىمپازدىق جايلاعان جەردە وتانسۇيگىشتىكتىڭ ورنى ويسىراپ تۇرادى.
مۇنداي پيعىلداعى ادامداردا ادالدىق، ۇلتجاندىلىق، وتانشىلدىق، ادامگەرشىلىك قاسيەتتەر قايدان بولسىن؟!
ولار جىلدار بويى قاراپايىم حالىقتىڭ مۇڭ-مۇقتاجىنا، تۇيتكىلدى ماسەلەلەرىنە سوقىر دا، ساڭىراۋ دا بولدى.
ەل تۇرمىسىنىڭ ناشارلاۋىنا، وتىز جىل بويى حالىقتىڭ رۋحىن جانشىپ، رۋحاني جاڭعىرۋىنا كەدەرگى كەلتىرگەندەردىڭ قاتارىندا بيلىك باسىنداعىلاردى دارىپتەگەندەر دە بار.
كەزىندە ن. نازاربايەۆتى اسپانداتا جارىسا ماقتاپ، حالىقتىڭ قىزمەتشىسى ەمەس، قۇبىلىسقا اينالدىرىپ جىبەردىك.
پىرگە تەڭەپ، جارتى قۇدايعا اينالدىردىق. ءسويتىپ، ءوز ءقادىرىمىزدى كەتىردىك. قۇنىمىزدى تۇسىردىك.
ءتىپتى «پاتشا – قۇدايدىڭ جەردەگى كولەڭكەسى»، «پاتشاعا قارسى شىققان – قۇدايعا قارسى شىققان» دەگەن سوزدەردى ءدىن وكىلدەرى ايتقاننان كەيىن ەش نارسەگە تاڭعالمايتىن بولدىق.
كوردىڭىز بە، قولدان «قۇداي جاساۋ» تەحنولوگياسىنىڭ وپ-وڭاي ەكەنىن.
شىن مانىندە، مۇنىڭ شىن قۇدايعا ەشقانداي قاتىسى جوق. ول – مۇلدە بولەك ماسەلە.
وسىدان-اق بىزگە قۇلدىق سانانىڭ قايدان كەلگەنىن ءتۇسىنۋ قيىن ەمەس.
ول – ءوزىن جارتى قۇداي ساناعان ادىلەتسىز پاتشالاردىڭ ادامداردىڭ بويىنا ەككەن ۇرەيى مەن قورقىنىشى عانا.
«پاتشا – قۇدايدىڭ جەردەگى كولەڭكەسى» دەگەن ءسوز ەشبىر حاديستە ايتىلماعان.
دەمەك، بۇل – جالعان.
ەشبىر ءدىن مۇنى قولدامايدى.
بارلىق پايعامبارلار ءوز قاۋىمىن ەڭ اۋەلى اللاعا سەنۋگە جانە وعان ەشنارسەنى سەرىك قوسپاۋعا شاقىرعان.
كوپىرمە ءسوز بەن كورەگەندىكتىڭ، شىن زيالى مەن زياندىنىڭ اراجىگىن اجىراتا المايتىن زامانعا تاپ بولدىق دەگەن – وسى.
جاعىمپازدىق ادالدىقپەن سىيىسپايدى. كۇنى ءۇشىن جۇرگەندەر پاتريوت بولا المايدى.
ءبىر ماسەلە انىق: شىندىقتى ايتا الماعان ادام ءوز ەلىنىڭ پاتريوتى ەمەس.
ناعىز پاتريوت – ءوز ەلىن ورىنسىز ماقتايتىن ادام ەمەس، قايتا ونىڭ كەمشىلىكتەرىن كورىپ، ۇنامسىز تۇستارىن تۇزەتۋگە ىقپال ەتەتىن ادام.
بۇگىنگى اقيقات سول – جاعىنساق، ەڭ الدىمەن تۋعان حالقىمىزعا جاعىنۋىمىز كەرەك.
سەبەبى وسى حالىقتىڭ ارقاسىندا – پاتشامىز، وسى حالىقتىڭ ارقاسىندا – اكىمبىز، وسى حالىقتىڭ ارقاسىندا دەپۋتاتپىز، اقىنبىز، جازۋشىمىز.
بيلىك تە، بايلىق تا – كوشپەلى، ۋاقىتشا.
ال حالىق – ماڭگى.
سوندىقتان حالىق الدىنداعى پارىز ءبىر ادامنىڭ الدىنداعى قارىزدان الدەقايدا جاۋاپتى.
بيلىك دەگەن – حالىق سەنىمىنە يە بولۋ، حالىققا سۇيەنىپ ەل باسقارۋ.
ول – قۇلدىق پسيحولوگياعا، جاعىمپازدىق پەن جارامساقتىققا قاشاندا قاراما-قايشى ۇعىم.
پرەزيدەنت ق. توقايەۆ: «جاعىمپازدىققا قاتىستى ايتار بولساق، مەن وعان قارسىمىن. بىرەۋمەن جاقسى قارىم-قاتىناستان گورى مەن ءۇشىن ەلدىڭ مۇددەسى جوعارى»، – دەگەن ەدى.
ەگەر پرەزيدەنت ءوزى ايتقانداي، ماقتاي بەرگەندى جانى قالامايتىن بولسا، بۇل ماسەلەگە تۇبەگەيلى توقتاۋ قويۋى ءتيىس.
بۇگىنگى اقيقات – وسى.
ق. توقايەۆ ءوز ماڭايىنداعى جاعىمپازدارعا ەمەس، حالىققا ارقا سۇيەۋى كەرەك.
سوندا ءبارى وزگەرەدى.
