قازاقستان كينوگەرلەر وداعىنىڭ باسقارما مۇشەسى، ونەرتانۋشى ءارى كينودراماتۋرگ ەرلان تولەۋتاي پرەمەر-مينيستردىڭ ءبىرىنشى ورىنباسارى نۇرلىبەك نالىبايەۆقا شۇعىل حات جولدادى. ونىڭ ايتۋىنشا، الماتى اكىمدىگى كينوگەرلەرمەن كەلىسىمسىز شاكەن ايمانوۆ اتىنداعى «قازاقفيلم» اۋماعىنىڭ 5،5 گەكتارىنا «كينەماتوگرافيستەر پاركىن» سالۋ جوسپارلانعانىن كورسەتەتىن قۇرىلىس پاسپورتىن كينوستۋديا قاقپاسىنا ىلگەن.
كينوگەرلەر بۇل ارەكەتتى بۇرىنعى جىلدارداعى «جەردى يەمدەنۋ» ارەكەتتەرىنىڭ جالعاسى دەپ سانايدى. ولاردىڭ ايتۋىنشا، بۇعان دەيىن دە وسى اۋماققا قاتىستى داۋلار بولعان، ال پرەزيدەنت قاسىم-جومارت توقايەۆ بۇل ماسەلەگە توسقاۋىل قويىپ، جەردىڭ قايتارىلۋىنا ىقپال ەتۋ تۋرالى تاپسىرما بەرگەن ەدى. الايدا، «قاڭتار وقيعاسىنان» كەيىن بۇل ءىس سوڭىنا دەيىن جەتپەي قالعان.
ەرلان تولەۋتاي بۇل جاعدايدى كينوستۋديا جەرىنىڭ تاعدىرىنا قاتىستى الاڭداتارلىق ماسەلە دەپ باعالاپ، «قازاقفيلم» اۋماعىن قۇرىلىس نىساندارىنا بەرۋگە جول بەرمەۋدى سۇرادى.
«ءبىز – كينوگەرلەر قاۋىمى بۇعان قارسىمىز ءارى كينوستۋديانىڭ ءبىر سۇيەم جەرىن تالان-تاراجعا سالۋعا جول بەرمەيتىنىمىزدى مالىمدەيمىز!» – دەدى ول.
ول بۇعان دەيىن دە كينوستۋديانىڭ 5،5 گەكتار جەرىنە قاتىستى داۋ بولعانىن ەسكە سالىپ، ماسەلەنى تۇپكىلىكتى شەشۋ ءۇشىن نۇرلىبەك نالىبايەۆتان كينوگەرلەرمەن كەزدەسۋدى جانە جاعدايعا اراشا ءتۇسۋدى ءوتىندى.
«قازاقفيلم» توڭىرەگىندەگى داۋ-داماي بۇعان دەيىن دە بىرنەشە رەت كوتەرىلگەن بولاتىن. ايتا كەتەيىك، قازاقستان رەسپۋبليكاسىنىڭ مادەنيەت جانە اقپارات مينيسترلىگى ۇلتتىق «قازاقفيلم» كينوستۋدياسىنىڭ بارلىق نەگىزگى وندىرىستىك نىساندارى مەملەكەت مەنشىگىندە قالاتىنىن رەسمي تۇردە مالىمدەدى.
