حالىقارالىق جاستار كۇنىنە وراي الماتى وبلىسىنىڭ اكىمى مارات سۇلتانعازييەۆ تالعار اۋدانىنداعى «SAN Tyres Kazakhstan» كومپانياسىنىڭ لوگيستيكالىق ورتالىعىنا بارىپ، ونداعى مۇمكىندىكتەرمەن تانىستى. كاسىپورىن ەڭبەك جولىن ەندى باستاعان جاستارعا قولداۋ ءبىلدىرىپ، جۇمىسپەن قامتىپ وتىر. قازىرگى تاڭدا مۇندا 170-كە جۋىق ادام ەڭبەك ەتەدى. ونىڭ جارتىسىنان كوبى – جاستار. سونداي-اق الداعى ۋاقىتتا ءوڭىردىڭ NEET ساناتىنداعى 100 ازاماتىن ەڭبەككە تارتۋدى جوسپارلاۋدا. وسىعان وراي بۇگىن الماتى وبلىسىنىڭ اكىمدىگى مەن اتالمىش كومپانيا اراسىندا ءوزارا ىنتىماقتاستىق تۋرالى مەموراندۋمعا قول قويىلدى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.
جۇزدەسۋ بارىسىندا ايماق باسشىسى قاتىسۋشىلاردى 12 تامىز – حالىقارالىق جاستار كۇنىمەن قۇتتىقتادى. بۇگىندە الماتى وبلىسىنداعى جاستاردىڭ سانى 432 مىڭنان اسادى. بۇل – ءوڭىر حالقىنىڭ 28%-ى. مارات ەلەۋسىز ۇلىنىڭ ايتۋىنشا، سوڭعى جىلدارى جاستار ساياساتىن ىلگەرىلەتۋگە ەرەكشە كوڭىل بولىنگەن. ونىڭ ىشىندە شالعاي اۋىلدارداعى جاس بۋىن دا نازاردان تىس قالماعان. اتاپ ايتقاندا، سوڭعى 3 جىلدا كەگەن، بالقاش، رايىمبەك جانە قاراساي اۋداندارىندا جاستار رەسۋرستىق ورتالىعىنىڭ جاڭا عيماراتتارى پايدالانۋعا بەرىلدى. قونايەۆ قالاسىندا زاماناۋي كوۆوركينگ-ورتالىق اشىلدى. ىلە، ۇيعىر جانە تالعار اۋداندارىندا جاستارعا ارنالعان كوۆوركينگ كەڭىستىكتەر قۇرىلدى. مەملەكەت باسشىسى بەلگىلەگەن «زاڭ مەن ءتارتىپ»، «تازا قازاقستان» قاعيداتتارى اياسىنداعى جوبالارعا دا ەرەكشە كوڭىل بولىنۋدە. قازىرگى تاڭدا وبلىستا 3 مىڭنان استام بەلسەندى ەرىكتى بار. ولار قايىرىمدىلىق اكسيالارىنا، ەكولوگيالىق جۇمىستارعا، قوعامدىق باستامالارعا تۇراقتى قاتىسىپ كەلەدى.
مارات ەلەۋسىز ۇلى ءوز سوزىندە «SAN Tyres Kazakhstan» كومپانياسى جاس مامانداردىڭ كاسىبي دامۋىنا جان-جاقتى جاعداي جاساپ وتىرعانىن ەرەكشە اتاپ ءوتىپ، كاسىپورىن ۇجىمىنا العىس ايتتى.
«جاستارعا جاعداي جاساۋ – ءبىزدىڭ باستى باعىتتارىمىزدىڭ ءبىرى. ال كاسىپكەرلەردىڭ جاس مامانداردىڭ الەۋەتىن اشاتىن باستامالارعا قولداۋ ءبىلدىرۋى – ۇلكەن الەۋمەتتىك جاۋاپكەرشىلىك. ءبىز مۇنداي سەرىكتەستىكتى الداعى ۋاقىتتا دا نىعايتا تۇسۋگە مۇددەلىمىز. سەبەبى جاستاردى جۇمىسپەن قامتۋ ماسەلەسىن تەك مەملەكەتتىك باعدارلامالار ارقىلى شەشۋ مۇمكىن ەمەس. ءوندىرىس، بيزنەس، ءبىلىم بەرۋ ۇيىمدارى جانە مەملەكەتتىك ورگاندار ءبىر باعىتتا جۇمىس ىستەگەندە عانا ناقتى ناتيجە بولادى»، – دەدى ايماق باسشىسى.
«SAN Tyres» كومپانياسى قازاقستان نارىعىندا 20 جىل بويى تابىستى جۇمىس ىستەپ كەلەدى. جىل سايىن مەملەكەت بيۋدجەتىنە 10 ملرد تەڭگەدەن استام سالىق تولەيدى. تالعار اۋدانىندا ورنالاسقان «SAN Baiserke» لوگيستيكالىق قويماسى – تمد-داعى ەڭ ءىرى كەشەن. مۇندا جىلىنا 3،5 ميلليونعا دەيىن شينا قابىلداپ، ساقتاپ جانە جونەلتۋگە بولادى. ياعني الماتى وبلىسىنان ەلىمىزدىڭ تۇكپىر-تۇكپىرىنە، ورتا ازيا ەلدەرى مەن الىس-جاقىن شەتەلدەرگە كولىك دوڭگەلەگى ۇزدىكسىز جىبەرىلەدى.
لوگيستيكالىق حابتىڭ جالپى اۋماعى – 23 گەكتار. مۇندا زاماناۋي قويمالارمەن قاتار كەڭسەلەر، دوڭگەلەك اۋىستىرۋ جانە سەرۆيس ورتالىعى بار. قىزمەتكەرلەردىڭ الەۋمەتتىك جاعدايىنا دا ەرەكشە كوڭىل بولىنگەن. قويمانىڭ جانىندا 200 ورىندى جاتاقحانا، اسحانا، دەمالىس بولمەلەرى، كىتاپحانا مەن سپورت الاڭى بار. جۇمىسشىلاردىڭ دەنساۋلىعى مەن جايلى دەمالىسى ءۇشىن 130 سوتىق جەرگە ساياباق تا قاراستىرىلعان. بولاشاقتا قىزمەتكەرلەر مەن ولاردىڭ وتباسىنا ارنالعان SAN Village تۇرعىن ءۇي كەشەنى سالىنىپ، بالاباقشا اشۋ كوزدەلىپ وتىر.
«الماتى وبلىسىندا بۇعان دەيىن دە جۇمىس ىستەگەنبىز. ءدال تالعار اۋدانىندا العاش رەت ىسكە كىرىستىك. «SAN Tyres»-تە 300-دەن استام ادام ەڭبەك ەتەدى. 2028 جىلعا قاراي ولاردىڭ سانىن 1000-نان اسىرامىز دەپ جوسپارلاپ وتىرمىز. كومپانيامىز جاستاردان قۇرالعان. ەلىمىزدىڭ كوركەيۋى مەن دامۋى جاس ۇرپاقتىڭ قولىندا. سوندىقتان ولارعا ارنالعان الەۋمەتتىك قولداۋ شارالارى كوپ. سونىڭ ءبىرى – «مەنىڭ ارمانىم» جوباسى. بۇل باستاما بويىنشا جاستار ءوز ارمانىن جازىپ، بىزگە جولدايدى. قازىرگە دەيىن 150-دەن استام جاستىڭ ارمانى ورىندالدى»، – دەيدى «SAN Tyres Kazakhstan» كاسىپورنىنىڭ باسشىسى سىرىمبەك تاۋ.
شارا بارىسىندا كاسىپورىننىڭ ۇزدىك قىزمەتكەرلەرى مەن ءوڭىردىڭ وركەندەۋىنە ۇلەس قوسىپ جۇرگەن جاس ماماندار ماراپاتتالدى. سونداي-اق ولار وبلىس اكىمىمەن جانە كومپانيا باسشىسىمەن «تازا قازاقستان» ەكولوگيالىق باعدارلاماسى اياسىندا كاسىپورىن اۋماعىنداعى ساياباققا اعاش كوشەتتەرىن وتىرعىزدى. وسىلايشا، ايتۋلى كۇن قارساڭىندا جۇمىسشى جاستاردىڭ ەڭبەگى دارىپتەلىپ، ايتۋلى كۇننىڭ ءمان-ماڭىزى دا ايقىندالا ءتۇستى.
ايتا كەتەيىك، حالىقارالىق جاستار كۇنى الماتى وبلىسىندا كەڭ اۋقىمدا اتالىپ وتۋدە. ءوڭىردىڭ تۇكپىر-تۇكپىرىندە جاس بۋىننىڭ باستامالارى مەن جەتىستىكتەرىن قولداپ، زياتكەرلىك الەۋەتى مەن ەكولوگيالىق مادەنيەتىن ارتتىرۋعا ارنالعان 30-دان استام شارا وتۋدە. وعان 20 مىڭعا جۋىق جاس قاتىسۋدا. شارالار لەگى تامىز ايىنىڭ سوڭىنا دەيىن جالعاسادى.
