ينتەرنەت دامىعان، الەۋمەتتىك جەلىلەر ءومىرىمىزدىڭ اجىراماس بولىگىنە اينالعان زاماندا جاڭا ماماندىقتارمەن بىرگە جاڭا قاۋىپتەر دە پايدا بولدى. سولاردىڭ ىشىندە بۇگىنگى قوعامنىڭ دەرتىنە اينالعانى – پسيەۆدوكوۋچتار.

نەگىزىندە، كوۋچينگ (ادامنىڭ الەۋەتىن اشۋعا كومەكتەسەتىن كاسىبي باعىت) مەن پسيحولوگيا – ۇلكەن عىلىم. الايدا، قازىرگى نارىقتا بۇل ۇعىمدار قۇنسىزداندى. بۇگىنگى «پسيەۆدوكوۋچ» – پسيحولوگيالىق كىتاپتاردان ۇزىندىلەر وقىپ الىپ، ونى ادەمى ماركەتينگتىك قاپتامادا (ۋادە، موتيۆاسيا، ءساندى ءومىر سالتى) قايتا ساتاتىن مانيپۋلياتور.

ولاردىڭ ترەندكە شىعۋىنىڭ نەگىزگى سەبەبى – «تەز ءارى وڭاي تابىسقا جەتۋ» يلليۋزياسى. قازىرگى ينفلياسيا، ەكونوميكالىق تۇراقسىزدىق جانە سترەسس زامانىندا ادامدار ۇزاق جىلدار بويى ەڭبەك ەتكىسى كەلمەيدى. ولارعا «مىنا مەديتاسيانى جاساساڭ، ەرتەڭ باييسىڭ» نەمەسە «ءبارى ءوز ويىڭدا، ماعان اقشا تولەسەڭ، بلوكتى اشامىن» دەگەن جەڭىل ۋادەلەر تارتىمدى كورىنەدى.

پسيەۆدوكوۋچتاردىڭ ايلا-تاسىلدەرى: 

·        «ساتتىلىك كەيسى» (ۋسپەشنىي ۋسپەح): ولار الەۋمەتتىك جەلىدە قىمبات كولىكتەردى جالعا الىپ، دۋبايداعى قوناقۇيلەردى كورسەتىپ، «مەنىڭ قولىمنان كەلدى، سەنىڭ دە قولىڭنان كەلەدى» دەگەن بەينەروليكتەر تۇسىرەدى.

·        جالعان قۇندىلىق قالىپتاستىرۋ: «ەگەر سەن بۇل كۋرستى قارىزعا نەمەسە نەسيەگە الساڭ، دەمەك سەن وزىڭە ينۆەستيسيا جاسادىڭ، اقشا ساعان ەسەلەنىپ قايتادى» دەگەن ابسۋرد يدەيالاردى ميعا سىڭىرەدى.

·        ەموسيالىق مانيپۋلياسيا: ادامنىڭ ەڭ اۋىر نۇكتەلەرىن (جالعىزدىق، اقشاسىزدىق، وتباسىلىق جانجال) تاۋىپ الىپ، «ماسەلەنىڭ شەشىمى تەك مەنىڭ مارافونىمدا» دەپ سەندىرەدى.

الەۋمەتتىك زارداپ: نەسيەگە باتقاندار مەن بۇزىلعان وتباسىلار

بۇل ماسەلەنىڭ ارتىندا ۇلكەن الەۋمەتتىك تراگەديا جاتىر. جۋرناليستىك زەرتتەۋلەر كورسەتكەندەي، پسيەۆدوكوۋچتاردىڭ قۇربانى بولعان مىڭداعان ازاماتتار:

1.     قارجىلىق تىعىرىققا تىرەلەدى: كۋرستىڭ اقشاسىن تولەۋ ءۇشىن ميلليونداپ نەسيە الىپ، سوڭىندا بانكروت بولادى.

2.     پسيحيكالىق دەپرەسسياعا ۇشىرايدى: مارافون بىتكەن سوڭ، ۋادە ەتىلگەن بايلىق پەن باقىت كەلمەگەن كەزدە، ادامدار «كىنرات وزىمدە ەكەن» دەپ، ىشتەي وزدەرىن جەگىدەي جەپ، اۋىر دەپرەسسياعا تۇسەدى.

3.     وتباسىلىق اجىراسۋلار كوبەيەدى: كەيبىر كوۋچتاردىڭ «ساعان دامۋعا كەدەرگى كەلتىرەتىن ادامداردان قۇتىل، ولار توكسيندى» دەگەن جەڭىلتەك كەڭەستەرىنىڭ كەسىرىنەن قانشاما شاڭىراق ورتاسىنا ءتۇسىپ جاتىر.

پسيەۆدوكوۋچتاردىڭ وركەندەۋى – قوعامنىڭ ساۋاتسىزدىعى مەن جەڭىل دۇنيەگە اۋەستىگىنىڭ ايناسى. ولار زاڭنىڭ وسال تۇستارىن شەبەر پايدالانىپ وتىر، سەبەبى ءبىزدىڭ ەلدە ينفوبيزنەس پەن زاڭسىز پسيحولوگيالىق قىزمەتتى رەتتەيتىن قاتاڭ قۇقىقتىق تەتىكتەر ءالى تولىق قالىپتاسقان جوق.

«اۋا ساتىپ» بايىعانداردىڭ داۋرەنى ءجۇرىپ تۇرعاندا، حالىققا تەك ءبىر عانا قارۋ قالادى – كريتيكالىق ويلاۋ. كەز كەلگەن ادامعا قارجىڭىزدى ۇستاتپاس بۇرىن ونىڭ ديپلومىن، عىلىمي نەگىزىن جانە شىنايى بەدەلىن تەكسەرىڭىز. ەسىڭىزدە بولسىن: ءسىزدىڭ ءومىرىڭىزدىڭ كىلتى ەشقانداي كوۋچتىڭ مارافونىندا ەمەس، تەك ءوز قولىڭىزدا.