الماتى قالاسى اكىمىنىڭ ورىنباسارى ابزال نۇكەنوۆ مەملەكەت باسشىسىنىڭ اتىنان اقىن، قازاقستاننىڭ حالىق جازۋشىسى مارفۋعا ايتقوجينانى 90 جاسقا تولعان مەرەيتويىمەن قۇتتىقتادى.
ابزال نۇكەنوۆ قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قۇتتىقتاۋ حاتىن تابىستادى.
«كورنەكتى اقىن، قوعام قايراتكەرى ءارى ەرەكشە دارىن يەسى رەتىندە ءسىز حالقىمىزدىڭ زور قۇرمەتىنە بولەندىڭىز. مازمۇندى دا ونەگەلى عۇمىرىڭىزدى ۇلتتىق ادەبيەت پەن مادەنيەتتى دامىتۋعا، قازاق پوەزياسىنىڭ كوكجيەگىن كەڭەيتۋگە ارنادىڭىز. ۇزدىكسىز ىزدەنىس پەن شابىتقا تولى كوپجىلدىق شىعارماشىلىق ەڭبەگىڭىز مول جەمىسىن بەرىپ، ءار جىلدارى جارىق كورگەن كىتاپتارىڭىز ۇلتتىڭ رۋحاني مۇراسىنىڭ التىن قورىن تولىقتىردى»، — دەلىنگەن مەملەكەت باسشىسىنىڭ قۇتتىقتاۋىندا.
قالا باسشىلىعىنىڭ اتىنان ابزال نۇكەنوۆ مەرەيتوي يەسىنە كوپجىلدىق ەڭبەگى ءۇشىن شىنايى ريزاشىلىق ءبىلدىردى. ول مارفۋعا ايتقوجينانىڭ شىعارماشىلىعى ۇلتتىق قۇندىلىقتارعا قىزمەت ەتۋدىڭ ۇلگىسىنە اينالعانىن، ال پوەزياسى اقىننىڭ ازاماتتىق ۇستانىمىن ايقىن تانىتاتىنىن اتاپ ءوتتى.
مارفۋعا ايتقوجينانىڭ ەسىمى قازاق ادەبيەتىنىڭ تاريحىندا ايرىقشا ورىن الادى. ونىڭ شىعارمالارى ۇلتتىق پوەزيانىڭ التىن قورىنا ەنىپ، وقىرمان سۇيىسپەنشىلىگىنە بولەندى جانە بىرنەشە بۋىن ءۇشىن رۋحاني باعدارعا اينالدى. ول ونداعان جىل بويى قازاق پوەزياسىنىڭ دامۋىنا، مادەني مۇرانى ساقتاۋعا جانە قوعامنىڭ رۋحاني قۇندىلىقتارىن نىعايتۋعا زور ۇلەس قوسىپ كەلەدى.
