بۇگىن اباي ۋنيۆەرسيتەتىندە «مەكتەپ جانە جوعارى وقۋ ورنىنداعى ءبىلىم بەرۋدەگى التىن وردا تاريحى» اتتى حالىقارالىق عىلىمي دوڭگەلەك ۇستەل ءوتتى. وتاندىق جانە شەتەلدىك جەتەكشى عالىمدار، تاريحشىلار مەن پەداگوگتار جوشى ۇلىسىنىڭ مۇراسىن زاماناۋي ءبىلىم جۇيەسىنە ينتەگراسيالاۋدىڭ جاڭا تۇجىرىمداماسىن تالقىلاپ، مەكتەپ وقۋلىقتارى مەن جوو ءبىلىم بەرۋ باعدارلامالارىن جاڭعىرتۋعا باعىتتالعان ماڭىزدى قارار قابىلدادى.
حالىقارالىق باسقوسۋ التىن وردانىڭ ورتاعاسىرلىق ەۋرازيا تاريحىنداعى، سونىڭ ىشىندە قازاق مەملەكەتتىلىگىنىڭ قالىپتاسۋى مەن دامۋىنداعى ىرگەلى ءرولىن زاماناۋي عىلىمي جەتىستىكتەر تۇرعىسىنان زەردەلەۋدى ماقسات ەتتى. جيىندا ۋنيۆەرسيتەتتىڭ زەرتتەۋ قىزمەتى جانە يننوۆاسيا جونىندەگى پرورەكتورى ەرتاي سۇلتان، تۇركيانىڭ انكارا ۋنيۆەرسيتەتىنىڭ پروفەسسورى ابدۋللاح گيۋندوگدۋ، بەلگىلى تاريحشى قانات وسكەنباي، اباي اتىنداعى قازۇپۋ دوسەنتى فاكيا شامشيدەنوۆا، سونداي-اق تاريح ءپانىنىڭمۇعالىمدەرى مەن دوكتورانتتار بايانداما جاسادى. سپيكەرلەر جوشى ۇلىسىنىڭ تاريحناماسى مەن ونى بۇگىنگى بۋىنعا وقىتۋدىڭ ادىستەمەلىك ەرەكشەلىكتەرىن جان-جاقتى تالدادى.
عىلىمي جيىندا قابىلدانعان قاراردىڭ باستى باعىتتارىنىڭ ءبىرى – تاريح ءپانىنىڭ وقىتۋدىڭجۇيەسىن جاڭعىرتۋ. عالىمدار مەن مۇعالىمدەر «قازاقستان تاريحى» جانە «دۇنيەجۇزى تاريحى» وقۋلىقتارىنداعى التىن وردا تاريحىنا قاتىستى تاراۋلاردى تۇبەگەيلى قايتا قاراۋدى ۇسىندى. جاڭا تۇجىرىمداماعا سايكەس ۇلىق ۇلىس تەك جاۋلاۋشى اسكەري مەملەكەت ەمەس، دامىعان قالا مادەنيەتى، وركەندەگەن ساۋدا جۇيەسى، وزىق ديپلوماتياسى مەن بىرەگەي قۇقىقتىق ينستيتۋتى قالىپتاسقان ورتاعاسىرلىق وركەنيەت وشاعى رەتىندە سيپاتتالۋى ءتيىس. وقۋ ۇدەرىسىن زامان تالابىنا ساي سيفرلاندىرۋ ءۇشىن ينتەراكتيۆتى كارتالار، ماڭىزدى تاريحي نىسانداردىڭ 3D مودەلدەرى مەن دەرەكتى-تانىمدىق انيماسيالىق ماتەريالداردى ەنگىزۋ دە قاراستىرىلدى.
سونىمەن قاتار، جوعارى ءبىلىم بەرۋ باعدارلامالارىنىڭ مازمۇنىن تەرەڭدەتۋ ماقساتىندا ماڭىزدى قادامدار جاسالماق. جيىندا ەۋرازيا كەڭىستىگىندەگى تاريحي پروسەستەردى تەرەڭ ءتۇسىندىرۋ ءۇشىن جوعارى وقۋ ورىندارىندا «التىن وردا: مەملەكەت، قوعام، مادەنيەت» اتتى مىندەتتى بازالىق ءپان ەنگىزۋ تۋرالى باستاما كوتەرىلدى. وعانقوسا، تاريح باعىتىندا باكالاۆريات جانە ماگيستراتۋرا دەڭگەيىندە جوشى ۇلىسىنىڭ تاريحناماسى، دەرەكتانۋى مەن ارحەولوگياسىنا ارنالعان ەلەكتيۆتى پاندىك باعدارلاما ازىرلەنەدى. ستۋدەنتتەر مەن جاس زەرتتەۋشىلەردىڭ ورتاعاسىرلىق جازبا دەرەككوزدەرىمەن تىكەلەي جۇمىس ىستەۋ داعدىلارىن ارتتىرۋ ءۇشىن عىلىمي-پراكتيكالىق سەمينارلاردى تۇراقتى ۇيىمداستىرۋ دا جوسپارلانعان.
اتالعان ستراتەگيالىق مىندەتتەردى ۇيلەستىرۋ جانە حالىقارالىق عىلىمي-ساراپتامالىق حاب قالىپتاستىرۋ ماقساتىندا اباي اتىنداعى قازۇپۋ-دىڭ تاريح جانە قۇقىق فاكۋلتەتى جانىنان «التىن وردا وركەنيەتى جانە شىعىس قولجازبا مۇراسى» عىلىمي-زەرتتەۋ ورتالىعى قۇرىلادى. بۇل ورتالىق تالانتتى جاس عالىمدارعا قولداۋ كورسەتىپ، ارحەولوگيالىق ەكسپەديسيالارعا، شەتەلدىك مۇراعاتتارداعى زەرتتەۋ جۇمىستارىنا تارتۋمەن جانە اكادەميالىق ۇتقىرلىقتى قامتاماسىز ەتۋمەن اينالىسادى.
اباي ۋنيۆەرسيتەتى اتالعان بارلىق ماڭىزدى باستامالاردىڭ ورىندالۋىن باقىلايتىن جانە ۇيلەستىرەتىن نەگىزگى ورتالىق رەتىندە جۇمىس ىستەيدى. دوڭگەلەك ۇستەلدە قابىلدانعان قورىتىندى قارار قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگىنە، وقۋ-اعارتۋ مينيسترلىگىنە جانە ۇلتتىق ءبىلىم اكادەمياسىنا قاراۋعا جانە ىس-تاجىريبەگە ەنگىزۋگە جولدانادى.
«Abai University» مەديا ورتالىعى
