بۇگىن ورتالىق سايلاۋ كوميسسياسىنىڭ وتىرىسىندا قازاقستاندا قۇرىلتاي دەپۋتاتتارىنىڭ سايلاۋىنا بايقاۋ جۇرگىزۋگە قانشا حالىقارالىق بايقاۋشىنىڭ اككرەديتتەلگەنى تۋرالى ايتىلدى.

وسك ءتوراعاسىنىڭ ورىنباسارى مۇحتار ەرمان اعىمداعى جىلدىڭ 1 شىلدەسىندە قازاقستان رەسپۋبليكاسىنىڭ قۇرىلتايى دەپۋتاتتارىنىڭ سايلاۋىنا حالىقارالىق بايقاۋ ينستيتۋتىن اشۋ تۋرالى شەشىم قابىلدانعانىن اتاپ ءوتتى. سىرتقى ىستەر مينيسترلىگى مەن ورتالىق سايلاۋ كوميسسياسى سايلاۋدى بايقاۋعا قاتىسۋ ءۇشىن ءبىرقاتار مەملەكەتتەر مەن حالىقارالىق ۇيىمدارعا ءتيىستى شاقىرۋلار جولداعان.

«بۇگىنگى تاڭدا ورتالىق سايلاۋ كوميسسياسىنا اككرەديتتەۋ ءۇشىن 3 حالىقارالىق ۇيىم مەن 4 شەت مەملەكەتتىڭ 60 بايقاۋشىسىنىڭ كانديداتۋراسى ۇسىنىلدى. اتاپ ايتقاندا، تمد بايقاۋشىلار ميسسياسىنان - 4 ادام، تمد-عا قاتىسۋشى مەملەكەتتەردىڭ پارلامەنتارالىق اسسامبلەياسىنان - 19 ادام، ەقىۇ دياقب بايقاۋشىلار ميسسياسىنان - 32 بايقاۋشى، سونداي-اق مالديۆ رەسپۋبليكاسى تاراپىنان 2كانديداتۋرا، ونىڭ ىشىندە وسى ەلدىڭ سايلاۋ كوميسسياسى ءتوراعاسىنىڭ ورىنباسارى ۇسىنىلدى. بۇدان بولەك، استانادا اككرەديتتەلگەن ديپلوماتيالىق كورپۋستىڭ دۋايەنى بولىپ تابىلاتىن پالەستينانىڭ قازاقستانداعى ەلشىسى، ۆەنەسۋەلانىڭ قازاقستانداعى ەلشىسى جانە ۆەنگريانىڭ قازاقستانداعى ۋاقىتشا سەنىمدى وكىلى دە اككرەديتتەلدى. اككرەديتتەۋگە قاتىستى ۇسىنىستار كەلىپ تۇسۋىنە قاراي بايقاۋشىلار تۋرالى مالىمەتتەر جاڭارتىلىپ وتىرادى»، - دەدى مۇحتار ەرمان.

وتىرىس قورىتىندىسى بويىنشا ورتالىق سايلاۋ كوميسسياسىنىڭ مۇشەلەرى شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ تۋرالى قاۋلى قابىلدادى.