الماتىدا ۇلى وتان سوعىسىنداعى جەڭىستىڭ 81 جىلدىعىنا وراي ەسكە الۋ جانە مەرەكەلىك ءىس-شارالار ءوتتى.

نەگىزگى باعدارلاما ءداستۇرلى تۇردە 28 گۆاردياشى-پانفيلوۆشىلار اتىنداعى ساياباقتا ۇيىمداستىرىلدى. مۇندا قالا اكىمى دارحان ساتىبالدىنىڭ قاتىسۋىمەن داڭق مەموريالىنداعى ماڭگىلىك الاۋىنا گۇل شوقتارىن قويۋ ءراسىمى ءوتتى. مايداندا قازا تاپقان قازاقستاندىق جاۋىنگەرلەردىڭ رۋحىنا ۇلى وتان سوعىسىنىڭ ارداگەرلەرى، تىل ەڭبەككەرلەرى، اسكەري قىزمەتشىلەر، قۇقىق قورعاۋ ورگاندارىنىڭ وكىلدەرى، قوعام قايراتكەرلەرى مەن قالا تۇرعىندارى ءبىر مينۋت ۇنسىزدىكپەن تاعزىم ەتتى.

ساياباقتا قالا تۇرعىندارى مەن قوناقتارى ءۇشىن دالا اسحاناسى ۇيىمداستىرىلىپ، قازاقستاندىق ارتيستەر مەن شىعارماشىلىق ۇجىمداردىڭ قاتىسۋىمەن مەرەكەلىك كونسەرت ءوتتى. باعدارلاما بارىسىندا مايدان اندەرى مەن سوعىستان كەيىنگى جىلداردىڭ تانىمال كومپوزيسيالارى ورىندالدى.

ايتا كەتەيىك، جەڭىس كۇنىنە وراي ۇلى وتان سوعىسىنىڭ ارداگەرلەرىنە جانە ازاماتتاردىڭ وزگە دە ساناتتارىنا ءبىرجولعى الەۋمەتتىك كومەك كورسەتىلدى. اتاپ ايتقاندا، 15 ۇوس ارداگەرىنە 5 ملن تەڭگەدەن تولەم بەرىلدى. سونداي-اق، اسكەري ءىس-قيمىلدارعا قاتىسۋشىلارعا، تىل ەڭبەككەرلەرىنە، ارداگەرلەرگە تەڭەستىرىلگەن تۇلعالارعا جانە قايتىس بولعان ارداگەرلەردىڭ جۇبايىنا ماتەريالدىق قولداۋ كورسەتىلدى.