حالىقارالىق بالالاردى قورعاۋ كۇنىنە وراي الماتىداعى بارلىق مەديسينالىق مەكەمەدە بالالار مەن جاسوسپىرىمدەردىڭ دەنساۋلىعىن نىعايتۋعا، سالاۋاتتى ءومىر سالتىن ناسيحاتتاۋعا جانە ءتۇرلى اۋرۋلاردىڭ الدىن الۋعا ارنالعان اشىق ەسىك كۇندەرى وتەدى. بۇل تۋرالى الماتى قالالىق قوعامدىق دەنساۋلىق ساقتاۋ باسقارماسىنىڭ وكىلدەرى حابارلادى.
بۇلدىرشىندەر مەن ولاردىڭ اتا-انالارىنا پەدياتر، ستوماتولوگ، تراۆماتولوگ، ينفەكسيونيست، نيەۆروپاتولوگ، لور دارىگەرى، اكۋشەر-گينەكولوگ جانە وزگە دە سالالىق ماماندار تەگىن كەڭەس بەرەدى. ءىس-شارالارعا جەتەكشى ساراپشىلار، عىلىمي قىزمەتكەرلەر جانە شتاتتان تىس باس ماماندار قاتىسادى.
سونىمەن قاتار، قالاداعى مەديسينالىق ۇيىمداردا پروفيلاكتيكالىق جانە ءاقپاراتتىق-تۇسىندىرۋ شارالارى، اتا-انالار مەن جاسوسپىرىمدەرگە ارنالعان پىكىر الماسۋ الاڭدارى، سۋرەت بايقاۋلارى مەن مادەني-كوپشىلىك باعدارلامالار ۇيىمداستىرىلادى. بۇل باستاماعا سالاۋاتتى ءومىر سالتىن قالىپتاستىرۋ ورتالىقتارى مەن جاستار دەنساۋلىق ورتالىقتارى دا اتسالىسادى.
اسىرەسە، ەرەكشە قاجەتتىلىگى بار بالالار مەن ديسپانسەرلىك ەسەپتە تۇرعان بالالارعا ەرەكشە كوڭىل بولىنەدى. ولار ءۇشىن كەڭەستىك كومەكتىڭ قولجەتىمدىلىگى كەڭەيتىلىپ، ەرەكشە قاجەتتىلىگى بار بالالارعا ءۇي جاعدايىندا كوشپەلى مەديسينالىق تەكسەرۋلەر جۇرگىزىلەدى.
ءىس-شارالاردىڭ باستى ماقساتى — بالالار مەن جاستار اراسىندا فيزيكالىق، پسيحيكالىق جانە رەپرودۋكتيۆتىك دەنساۋلىققا قاراۋ مادەنيەتىن قالىپتاستىرۋ.
اشىق ەسىك كۇندەرىنىڭ تولىق باعدارلاماسىمەن تۇرعىندار الماتىداعى مەديسينالىق ۇيىمداردىڭ رەسمي سايتتارى مەن الەۋمەتتىك جەلىدەگى پاراقشالارىنان، سونداي-اق ەمدەۋشى دارىگەرلەرىنەن بىلە الادى.
