جاڭا وقۋ جىلى قارساڭىندا ءداستۇرلى تۇردە ۇيىمداستىرىلاتىن تامىز كونفەرەنسياسى بيىل الماتى وبلىسىندا «كونستيتۋسيالىق قۇندىلىقتار: كاسىبيلىك، ساپا، ناتيجە» تاقىرىبىنا ارنالدى. جيىندا ءبىلىم بەرۋ سالاسىندا وتكەن وقۋ جىلىندا اتقارىلعان جۇمىستار سارالانىپ، جاڭا وقۋ جىلىنداعى باسىم باعىتتار ايقىندالدى. كونفەرەنسياعا وبلىس اكىمى مارات سۇلتانعازييەۆ، ق ر وقۋ-اعارتۋ مينيسترلىگىنىڭ ينۆەستيسيالىق ساياسات جانە ينفراقۇرىلىمدى دامىتۋ دەپارتامەنتىنىڭ ديرەكتورى ايقوجا ءابسادىقوۆ، مەملەكەتتىك قىزمەت ىستەرى اگەنتتىگىنىڭ وكىلدەرى، ارداگەر ۇستازدار، ءبىلىم بەرۋ ۇيىمدارىنىڭ باسشىلارى، جوعارى وقۋ ورىندارىنىڭ رەكتورلارى، اۋدان-قالا اكىمدەرى، قۇقىق قورعاۋ ورگاندارىنىڭ وكىلدەرى جانە پەداگوگتەر قاتىستى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.
كونفەرەنسيا بارىسىندا ءبىلىم ساپاسى مەن پەداگوگتەردىڭ كاسىبي بىلىكتىلىگىن ارتتىرۋ، ينفراقۇرىلىمدى دامىتۋ، وقۋشى ورىندارىنىڭ تاپشىلىعىن ازايتۋ، سيفرلاندىرۋ جانە تاربيە جۇمىسى سياقتى ماڭىزدى ماسەلەلەر تالقىلاندى.
الماتى وبلىسىنىڭ اكىمى مارات سۇلتانعازييەۆ وڭىردە ءبىلىم بەرۋ سالاسىن دامىتۋدىڭ ءۇش نەگىزگى باعىتى بار ەكەنىن ايتتى. بىرىنشىدەن، جاڭا كونستيتۋسيالىق تالاپتارعا ساي ءۇش اۋىسىمدى مەكتەپتەردى جويۋ، زاماناۋي مەكتەپتەر سالۋ جانە سيفرلىق ساۋاتتىلىقتى دامىتۋ. ەكىنشى باعىت – وسكەلەڭ ۇرپاقتىڭ قۇقىقتىق ساۋاتتىلىعىن كوتەرىپ، جاۋاپتى ازاماتتىق ۇستانىمىن قالىپتاستىرۋ. ءۇشىنشى باعىت – ەڭبەك نارىعىنا قاجەتتى، باسەكەگە قابىلەتتى ماماندار دايارلاۋ.
سونداي-اق مارات ەلەۋسىز ۇلى ءبىلىم سالاسىنا كورسەتىلىپ وتىرعان مەملەكەتتىك قولداۋ جىلدان-جىلعا ارتىپ كەلە جاتقانىن جەتكىزدى. ماسەلەن، بيىل وبلىستا ءبىلىم سالاسىن قارجىلاندىرۋ 458،2 ملرد تەڭگەگە جەتتى. وقۋشىلار سانىنىڭ جىل سايىن 7-10 مىڭعا ارتۋىنا بايلانىستى پەداگوگتەرگە دە سۇرانىس ءوسىپ وتىر. وسىعان بايلانىستى جالاقى قورىنا جىل سايىن قوسىمشا 7 ملرد تەڭگە بولىنۋدە.
الماتى وبلىستىق ءبىلىم باسقارماسىنىڭ باسشىسى قايرات جۇمانوۆتىڭ ايتۋىنشا، مەكتەپكە دەيىنگى ءبىلىم بەرۋ باعىتى بويىنشا وتكەن جىلعى ماۋسىمنان باستاپ قونايەۆ قالاسىندا 24 مەكتەپكە دەيىنگى ۇيىمدا 2 951 ورىنعا ۆاۋچەرلىك قارجىلاندىرۋ پيلوتتىق جوباسى ىسكە قوسىلدى. ناتيجەسىندە بالاباقشا كەزەگىندەگى بالالار سانى 963-تەن 470-كە دەيىن ازايدى. سونىمەن قاتار اتا-انالارعا قولداۋ كورسەتۋ ءۇشىن 365 كەڭەس بەرۋ ورتالىعى جۇمىس ىستەپ، «بالاقايلار مەكتەبى» جوباسى اياسىندا 7 223 بالا مەكتەپكە دەيىنگى دايارلىقتان ءوتتى.
بۇگىندە وڭىردەگى 5 مەكتەپ قازاقستاننىڭ ەڭ ۇزدىك 100 مەكتەبىنىڭ قاتارىنا ەنگەن. ال دارىندى بالالاردىڭ 3 جىلداعى جۇلدەلى ورىندارعا يە بولۋداعى ساپا كورسەتكىشى 54 پايىزعا ارتتى. 2025-2026 وقۋ جىلىندا پاندىك وليمپيادالارعا 541 وقۋشى قاتىسىپ، 303 جۇلدەلى ورىن يەلەندى. حالىقارالىق بايقاۋلاردا 29 وقۋشى جەڭىمپاز اتاندى. ەكى جىل قاتارىنان وبلىس تۇلەكتەرى ۇبت-دان ەڭ جوعارى 140 بالل جينادى. ال وتكەن وقۋ جىلىنىڭ قورىتىندىسى بويىنشا وبلىستا ءبىلىم ساپاسى 68،9 پايىزدان 69،5 پايىزعا ءوستى.
وڭىردە 34767 پەداگوگ جۇمىس ىستەيدى. ونىڭ ىشىندە بىلىكتىلىك ساناتى بار پەداگوگتاردىڭ ۇلەسى – 74،8%. ال جاڭا فورماتتاعى بىلىكتىلىك ساناتىنا يە مۇعالىمدەر سانى بيىل 28،2%-دى قۇراپ 7،1%-عا وسكەن.
ءبىلىم وشاقتارىندا «تازا قازاقستان» تۇجىرىمداماسى اياسىنداعى جۇمىستار دا قارقىندى جۇرگىزىلۋدە. بيىل 350 مىڭ وقۋشىنىڭ قاتىسۋىمەن «بولاشاقتى بىرگە وتىرعىزايىق» اكسياسى، مەكتەپ تۇلەكتەرى مەن تانىمال تۇلعالاردىڭ قاتىسۋىمەن «بۇگىنگى كۇن – ەرتەڭگىنىڭ وركەنى» جانە «جاينا، تۋعان ولكەم!» چەللەندجدەرى ۇيىمداستىرىلعان.
بيىل وڭىردە ەڭبەك نارىعىنا قاجەتتى جاڭا ماماندىقتاردى اشۋعا 500 ملن تەڭگە ءبولىندى. كوللەدجدەردىڭ ماتەريالدىق-تەحنيكالىق بازاسى دا جاڭارتىلۋدا. ستۋدەنتتەر ءتۇرلى سايىستاردا توپ جارىپ، ۇزدىك ناتيجە كورسەتۋدە. مىسالى، «WorldSkills Kazakhstan» رەسپۋبليكالىق چەمپيوناتىندا وبلىسىمىزدىڭ 12 ستۋدەنتى جۇلدەلى ورىندارعا يە بولعان. كوللەدجدەردىڭ جۇڭگو، وڭتۇستىك كورەيا، فرانسيا، تۇركيا جانە باسقا دا مەملەكەتتەردىڭ ءبىلىم بەرۋ ۇيىمدارىمەن حالىقارالىق بايلانىس ورناتۋى ستۋدەنتتەر مەن پەداگوگتەردىڭ تاجىريبە الماسۋىنا جاڭا مۇمكىندىك بەرىپ وتىر.
وبلىستا جاستاردىڭ ءبىلىمىن جەتىلدىرۋ – ماڭىزدى باعىتتارىنىڭ ءبىرى. سوڭعى ءتورت جىلدا جەرگىلىكتى بيۋدجەت ەسەبىنەن 239 گرانت ءبولىندى. بيىل تاعى 35 گرانت قاراستىرىلعان. سونىمەن قاتار قحر ۇسىنعان ءبىلىم گرانتتارى ارقىلى 2024 جىلدان بەرى 65 تۇلەك قىتايدا وقىپ جاتىر.
كونفەرەنسيادا بالانىڭ قاۋىپسىزدىگى ماسەلەسىنە ەرەكشە كوڭىل ءبولىندى. تالعار اۋدانى پروكۋراتۋراسىنىڭ اعا پروكۋرورى دياس سۇلتاننىڭ مالىمدەۋىنشە، تالعار اۋدانىندا كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ جانە جاسوسپىرىمدەردىڭ قۇقىقتىق ساۋاتتىلىعىن ارتتىرۋ ماقساتىندا «زاڭ مەن ءتارتىپ» ازاماتتىق تالىمگەرلىك پيلوتتىق جوباسى ىسكە اسىرىلعان.
«جوباعا 10 مەكتەپ پەن 3 كوللەدج قاتىسىپ، پروكۋراتۋرا، پوليسيا جانە ادۆوكاتۋرا ورگاندارىنىڭ 13 ارداگەرى تالىمگەر رەتىندە تارتىلدى. ولار 7-10 سىنىپ وقۋشىلارى مەن كوللەدج ستۋدەنتتەرىمەن قۇقىقتىق تاقىرىپتاردا پىكىرتالاس، ترەنينگ جانە پروفيلاكتيكالىق كەزدەسۋلەر وتكىزدى. ناتيجەسىندە وقۋشىلاردىڭ قۇقىقتىق ءبىلىمدى مەڭگەرۋ دەڭگەيى 90 پايىزدان استى»، – دەدى اعا پروكۋرور.
بيىل بۇل باستاماعا تاعى 35 ۇيىم قوسىلماق. جوبا سونداي-اق بۋللينگ پەن كيبەربۋللينگتىڭ، زورلىق-زومبىلىقتىڭ جانە باسقا دا كەلەڭسىز جاعدايلاردىڭ الدىن الۋعا باعىتتالعان. وسىعان بايلانىستى مارات ەلەۋسىز ۇلى ءبىلىم، پوليسيا جانە دەنساۋلىق ساقتاۋ سالالارى بىرىگىپ ارەكەت ەتۋ كەرەگىن ايتىپ، بۇل باعىتتاعى جۇمىستى كۇشەيتۋدى تاپسىردى.
سيفرلاندىرۋ تاقىرىبى دا كۇن تارتىبىنەن تىس قالعان جوق. ءبىلىم سالاسىنداعى قارجىنىڭ اشىق ءارى ءتيىمدى جۇمسالۋىن قامتاماسىز ەتۋ ماقساتىندا «ەسەپ» ءبىرىڭعاي اقپاراتتىق جۇيەسىن ەنگىزۋ كوزدەلىپ وتىر.
جيىن بارىسىندا ايقوجا ءابسادىقوۆ ەلىمىزدەگى ءبىلىم سالاسىندا ەنگىزىلگەن وزگەرىستەر جايلى باياندادى. ايتۋىنشا، بالالاردىڭ جاس ەرەكشەلىكتەرى ەسكەرىلىپ، وقۋ باعدارلامالارى كەشەندى تۇردە قايتا قارالعان. بيىلعى 1 قىركۇيەكتەن باستاپ باستاۋىش سىنىپتاردا بجب مەن تجب الىنىپ تاستالادى. 5-9 سىنىپتاردا ىرگەلى عىلىمداردى تەرەڭدەتىپ وقىتۋعا باسىمدىق بەرىلىپ، 8-9 سىنىپتارعا «قازاقستان گەوگرافياسى» ءپانىن اپتاسىنا 2 ساعات كولەمىندە ەنگىزۋ قاراستىرىلۋدا.
جيىن سوڭىندا وتكەن وقۋ جىلىنىڭ قورىتىندىلارى مەن جاڭا وقۋ جىلىنا ارنالعان مىندەتتەر سارالانىپ، كونفەرەنسيانىڭ قارارى قابىلداندى. سونداي-اق ءبىلىم بەرۋ سالاسىندا ەسەلى ەڭبەك ەتىپ، ءوز ىسىنە ادالدىعىمەن دارالانعان ۇستازدار «ەڭبەك ارداگەرى»، «ى.التىنسارين»، «ءبىلىم بەرۋ سالاسىنىڭ ۇزدىگى» توسبەلگىلەرىمەن جانە الماتى وبلىسى اكىمىنىڭ قۇرمەت گراموتاسىمەن، العىس حاتىمەن ماراپاتتالدى.
