«قازاقمىس» توبى ءۇشىن مينەرالدىق-شيكىزات قورىن دامىتۋ باستى ستراتەگيالىق باسىمدىقتاردىڭ ءبىرى بولىپ قالا بەرەدى. بۇگىندە گەولوگيالىق بارلاۋ جۇمىسىنىڭ باسىم بولىگى قازاقستاننىڭ مىس ونەركاسىبىنىڭ تاريحي ورتالىعى جانە كومپانيانىڭ قىزمەت ەتەتىن نەگىزگى ءوڭىرى — ۇلىتاۋ وبلىسىندا شوعىرلانعان.

2026 جىلى «قازاقمىس» جەزقازعان وڭىرىندەگى گەولوگيالىق بارلاۋ جۇمىسىن قارجىلاندىرۋدى ايتارلىقتاي ۇلعايتتى. بۇعان دەيىن بۇل ماقساتقا جىل سايىن شامامەن 5 ملن اقش دوللارى باعىتتالسا، بۇگىندە ينۆەستيسيا كولەمى جىلىنا 40 ملن  دوللارعا دەيىن جەتتى. قاراجات جەزقازعان كەن الابىنىڭ تەرەڭ قاباتىن زەرتتەۋگە، جاڭا پەرسپەكتيۆالى ۋچاسكەلەردى ىزدەۋگە جانە ءوڭىردىڭ مينەرالدىق-شيكىزات قورىن كەڭەيتۋگە باعىتتالۋدا.

سونىمەن قاتار كومپانيا بۇرعىلاۋ جۇمىسىنىڭ كولەمىن ايتارلىقتاي ارتتىرۋدا. ەگەر الدىڭعى جىلدارى پايدالانۋ ماقساتىنداعى بۇرعىلاۋدىڭ كولەمى جىلىنا شامامەن 63 مىڭ قۋما مەتردى قۇراسا، 2026 جىلى تەك جەزقازعان باعىتى بويىنشا 62،4 مىڭ قۋما مەتر گەولوگيالىق بارلاۋ ءۇشىن بۇرعىلاۋ جۇرگىزۋ جوسپارلانعان. بۇل رەتتە ايتا كەتەرلىگى، جەزقازعان كومپانيانىڭ گەولوگيالىق بارلاۋ باعدارلاماسىنداعى ءۇش وڭىرلىك باعىتتىڭ ءبىرى بولىپ سانالادى. وسىعان وراي گەولوگيالىق بارلاۋ جۇمىسىنىڭ جالپى اۋقىمى شامامەن ەكى ەسەگە ۇلعايدى.

باعدارلامانى ىسكە اسىرۋ ءۇشىن ۇلىتاۋ وبلىسىندا ءقازىردىڭ وزىندە التى زاماناۋي جەرۇستى بۇرعىلاۋ قوندىرعىسى ىسكە قوسىلدى. بۇعان قوسا جالپى قۇنى 1،3 ملرد تەڭگەنى قۇرايتىن ءۇش جەراستى بۇرعىلاۋ اگرەگاتى مەن قوسالقى تەحنيكانى ساتىپ الۋ جۇمىسى جۇرگىزىلۋدە. جەرۇستى بۇرعىلاۋ جۇمىسىنا ارنالعان ەكى بۇرعىلاۋ قوندىرعىسى كۇردەلى جوندەۋدەن ءوتتى. سونداي-اق بۇرعىلاۋ بريگادالارىنىڭ جۇمىسىنا قولايلى جاعداي جاساۋ جانە ينفراقۇرىلىمدى جاڭارتۋ جۇمىسى جالعاسۋدا.

2025 جىلى جۇرگىزىلگەن گەوفيزيكالىق زەرتتەۋدىڭ قورىتىندىسى بويىنشا ءۇش پەرسپەكتيۆالى ۋچاسكەدە بۇرعىلاۋ جۇمىسى باستالدى. وڭتۇستىك يتاۋىز، سوركۇدىق–جارتاس ۋچاسكەلەرىندە جانە جىلاندى كەن ورىندارى توبىندا قوسىمشا جۇمىس اتقارۋ جوسپارلانعان. تەرەڭ قاباتتاردا جۇرگىزىلىپ جاتقان زەرتتەۋلەر جەزقازعان كەن

ورنىنىڭ گەولوگيالىق قۇرىلىمى تۋرالى جاڭا دەرەك الۋعا، سونداي-اق تەرەڭدە جاتقان كەن دەنەلەرىنىڭ الەۋەتىن باعالاۋعا مۇمكىندىك بەرەدى.

كەن ورىندارىنىڭ تەرەڭ قاباتى مەن قاپتالدارىن زەرتتەۋ جوبالارىنا سالىنعان جالپى ينۆەستيسيا كولەمى تەحنيكا ساتىپ الۋدى قوسپاعاندا 2،27 ملرد تەڭگەنى قۇرايدى. مامىر ايىنان باستاپ قوسىمشا بۇرعىلاۋ كۇشى جۇمىلدىرىلىپ، شىلدە ايىنا قاراي وندىرىستىك الاڭداردا ونعا جۋىق بۇرعىلاۋ قوندىرعىسىن پايدالانۋ جوسپارلانۋدا.

جۇرگىزىلگەن جۇيەلى گەولوگيالىق بارلاۋ جۇمىسىنىڭ ناتيجەسىندە كولەمى 63،5 ملن توننا كەندى قۇرايتىن رەزەرۆتىك كەن ورىندارىنىڭ پورتفەلى قالىپتاستىرىلدى. ونىڭ قۇرامىندا 620،3 مىڭ توننا مىس جانە 12،9 توننا التىن بار. بۇل قوردىڭ ەلەۋلى بولىگى مەملەكەتتىك بالانسقا ەنگىزىلدى.

سونىمەن قاتار كومپانيا زاماناۋي سيفرلىق تەحنولوگيالاردى بەلسەندى تۇردە قولدانۋدا. گەولوگيالىق بولىمشەلەردە كەن ورىندارىنىڭ ۇشولشەمدى مودەلىن قۇرۋعا جانە گەولوگيالىق دەرەكتى ينتەرپرەتاسيالاۋ دالدىگىن ارتتىرۋعا مۇمكىندىك بەرەتىن Micromine جۇيەسى ەنگىزىلۋدە. باعدارلاما بويىنشا 177 مامان وقىتۋدان ءوتتى، بولاشاقتا جۇيەنى پايدالانۋشىلار سانىن 401 قىزمەتكەرگە دەيىن ارتتىرۋ جوسپارلانۋدا.

كومپانيادا اتاپ وتىلگەندەي، ۇلىتاۋ وبلىسىنداعى گەولوگيالىق بارلاۋ جۇمىسىن كەڭەيتۋ ءوڭىردىڭ بولاشاعىنا سالىنعان ينۆەستيسيا بولىپ تابىلادى. جاڭا قورلار قولدانىستاعى وندىرىستىك قۋاتتى تۇراقتى جۇكتەمەمەن قامتاماسىز ەتىپ، جۇمىسكەرلەردىڭ ۇزاق مەرزىمدى جۇمىسپەن قامتىلۋىنا ءارى جەزقازعان وڭىرىندەگى تاۋ-كەن مەتاللۋرگيا كەشەنىنىڭ ودان ءارى دامۋىنا جول اشادى.