استانادا م. اۋەزوۆ اتىنداعى ورتالىق قالالىق كىتاپحاناسىندا جەڭىس كۇنى مەن وتان قورعاۋشىلار كۇنىنە وراي «ماڭگى وشپەس ۇلى ەرلىك» تاقىرىبىندا پاتريوتتىق كەزدەسۋ ءوتتى، دەپ حابارلايدى ەلوردا اكىمدىگىنىڭ رەسمي سايتى.
ءىس-شارانى استانا قالاسى ورتالىقتاندىرىلعان كىتاپحانالار جۇيەسىنە قاراستى كىتاپحانا ۇجىمى ۇيىمداستىردى. كەزدەسۋگە گەنەرال-لەيتەنانت، تاريح عىلىمدارىنىڭ دوكتورى، پروفەسسور، قازاقستان رەسپۋبليكاسى ۇلتتىق جاراتىلىستانۋ عىلىمدارى اكادەمياسىنىڭ اكادەميگى اباي تاسبولاتوۆ قاتىسىپ، جاستارمەن مازمۇندى سۇحبات قۇردى.
جيىنعا ۇلتتىق ۇلاننىڭ 6636 اسكەري ءبولىمىنىڭ ساربازدارى مەن «تۇران» كوللەدجىنىڭ ستۋدەنتتەرى قاتىسىپ، بەلسەندىلىك تانىتتى.
كەزدەسۋدىڭ نەگىزگى ماقساتى – جاستار اراسىندا وتانسۇيگىشتىك قۇندىلىقتاردى دارىپتەۋ، جەڭىس كۇنى مەن وتان قورعاۋشىلار كۇنىنىڭ تاريحي ماڭىزىن ناسيحاتتاۋ، جاس ۇرپاقتىڭ ەل تاريحىنا قىزىعۋشىلىعىن ارتتىرۋ جانە ەرلىك پەن ازاماتتىق جاۋاپكەرشىلىكتىڭ ءمانىن ءتۇسىندىرۋ بولدى.
ءىس-شارا بارىسىندا «ماڭگى وشپەس ۇلى ەرلىك» تاقىرىبىنداعى كىتاپ كورمەسى تانىستىرىلىپ، مەرەكەلىك بەينەبايان كورسەتىلدى. سونىمەن قاتار كەش قوناعىمەن سۇحبات ۇيىمداستىرىلىپ، قاتىسۋشىلار وزدەرىن تولعاندىرعان سۇراقتارىن قويدى.
كەزدەسۋ بارىسىندا اباي تاسبولاتوۆ تاۋەلسىزدىكتىڭ العاشقى جىلدارىنداعى قارۋلى كۇشتەردىڭ قالىپتاسۋ كەزەڭى تۋرالى ەستەلىكتەرىمەن ءبولىستى. ول اسكەري كادر تاپشىلىعى، سول كەزەڭدەگى الەۋمەتتىك-ەكونوميكالىق قيىندىقتار جانە اسكەري ءبىلىم بەرۋ جۇيەسىن قالىپتاستىرۋ جولىنداعى ەڭبەكتەر تۋرالى ايتىپ ءوتتى.
«پاتريوتتىق تاربيە – وزدىگىنەن قالىپتاسپايدى. «مەن وتاندى سۇيەمىن» دەپ ايتۋ عانا جەتكىلىكسىز. ونىڭ ناقتى ءىسى، جاۋاپكەرشىلىگى بولۋى كەرەك. سونىڭ ءبىر ماڭىزدى باعىتى – تاريحتى ءبىلۋ. وتكەندى دە، بۇگىندى دە تەرەڭ ءتۇسىنۋ قاجەت. ءبىز كوپۇلتتى مەملەكەتپىز، ءبىزدىڭ كۇشىمىز – بىرلىگىمىزدە»، – دەدى سپيكەر.
سونىمەن قاتار ول جاستاردى ەل تاريحىن قۇرمەتتەۋگە، ءبىلىم الۋعا، ءتارتىپتى بولۋعا جانە وتانعا ادال قىزمەت ەتۋگە شاقىردى.
