استانادا وتان قورعاۋشىلار كۇنىنە وراي ونەر مۋزەيى بازاسىندا ساعادات نۇرماعامبەتوۆ اتىنداعى اسكەري كوللەدج كۋرسانتتارىنا تانىمدىق كەزدەسۋ ۇيىمداستىرىلدى. ءىس-شارا بارىسىندا ولارعا سيرەك كەزدەسەتىن ۇلتتىق مۋزىكالىق اسپاپتار تۋرالى مالىمەت ايتىلدى، دەپ حابارلايدى استانا اكىمدىگىنىڭ رەسمي سايتى.
كۋرسانتتارعا قايتا قالپىنا كەلتىرىلگەن جانە سيرەك مۋزىكالىق اسپاپتاردىڭ ءتۇپنۇسقاسى قويىلعان كورمە كورسەتىلدى. ونىڭ ىشىندە اسكەري جورىقتاردا قولدانىلعان «جورىقتىق» اسپاپتار دا بار.
قوناقتارعا ولاردىڭ اۋەنى تىڭداتىلىپ، مۋزىكانىڭ اسكەري ارەكەتتەر مەن سالت-جورالعىلاردا قالاي پايدالانىلعانى ءتۇسىندىرىلدى.
كورمەنىڭ نەگىزگى ەكسپوناتتارىنىڭ ءبىرى – كەرنەي. بۇل ەجەلگى ۇرمەلى اسپاپ تۇركى حالىقتارى اراسىندا كەڭ تارالعان.
ەجەلدە كەرنەي تەك مۋزىكالىق قۇرال عانا ەمەس، سونىمەن قاتار بەلگى بەرۋ قىزمەتىن اتقارعان: ونىڭ كومەگىمەن اسكەري بۇيرىقتار جەتكىزىلىپ، ساربازدار جينالعان، سونداي-اق حاندار مەن قولباسشىلاردى قارسى الۋ، بايگەلەر مەن شەرۋلەر سياقتى سالتاناتتى راسىمدەر سۇيەمەلدەنگەن.
ءىس-شارا اياسىندا كونە اسپاپتاردا مۋزىكالىق شىعارمالار ورىندالىپ، كۋرسانتتارعا ولاردىڭ شىعۋ تەگى، قولدانىلۋ ەرەكشەلىكتەرى مەن مادەني ءرولى تۋرالى ايتىلدى.
ۇيىمداستىرۋشىلار مۇنداي كەزدەسۋلەر بولاشاق اسكەري قىزمەتشىلەردىڭ پاتريوتتىق رۋحىن نىعايتۋعا جانە تاريحي-مادەني تانىمىن كەڭەيتۋگە باعىتتالعانىن اتاپ ءوتتى.
سونىمەن قاتار، مۇنداي ءىس-شارالار اسكەري ءداستۇر مەن مادەني مۇرانىڭ بايلانىسىن كورسەتىپ، جاستاردىڭ ەل تاريحى مەن ۇلتتىق قۇندىلىقتارعا دەگەن قۇرمەتىن قالىپتاستىرادى.
