بۇگىن اقوردادا مەملەكەت باسشىسى قاسىم-جومارت توقايەۆ ءبىر توپ ونەر مايتالماندارىنا مەملەكەتتىك اتاق پەن جوعارى ناگرادالاردى سالتاناتتى تۇردە تابىستاعان بولاتىن. ماراپاتتالعانداردىڭ قاتارىندا قازاقستاننىڭ حالىق ءارتىسى ماقپال ءجۇنىسوۆا دا بار. ول ەكىنشى دارەجەلى «بارىس» وردەنىمەن يەلەندى. الايدا، بەلگىلى بولعانداي، ەسترادا جۇلدىزى اقورداعا قۇر قول كەلمەگەن بولىپ شىقتى، دەپ حابارلايدى Qamshy.kz اقپارات اگەنتتىگى.

«اقوردا» باعدارلاماسىنىڭ جۇرگىزۋشىسى، جۋرناليست اقداريعا مۇحادداس سالتاناتتى شارانىڭ ەڭ اسەرلى ءساتىن ۆيدەوعا ءتۇسىرىپ العان.

https://www.instagram.com/reel/DYmWj4ZM-ou/؟igsh=ZDJzZjB0NHR4cGg1

بەينەجازبادان بايقاعانىمىزداي، رەسمي ءبولىم اياقتالعان سوڭ ماقپال ءجۇنىسوۆا پرەزيدەنت قاسىم-جومارت توقايەۆقا جاقىنداپ، قولىنداعى سىيلىعىن ۇسىنعان.

«اعا، مىنانى سىزگە بەرە سالسام بولا ما؟» – دەدى ءانشى اعىنان جارىلىپ.
پرەزيدەنت ءوز كەزەگىندە جىلى شىراي تانىتىپ: «ارينە، ارينە، بولادى!» – دەپ جاۋاپ بەردى. مەملەكەت باسشىسى سىيلىقتى ىقىلاسپەن قابىل الىپ، ونەر يەسىنە شىعارماشىلىعى ءۇشىن العىس ايتتى.

ءجۋرناليستىڭ مالىمەتىنشە، حالىق ءارتىسى پرەزيدەنتكە ءوزىنىڭ اندەرى جازىلعان ءۇنتاسپاسىن (ديسكىسىن) تارتۋ ەتكەن.

«اپايدىڭ ايتۋىنشا، بۇل – ونىڭ اقورداعا العاش كەلۋى. ءارى اراعا شيرەك عاسىر سالىپ، مەملەكەت تاراپىنان العان العاشقى ماراپاتى ەكەن. سوندىقتان، كوڭىلدە تولقىنىس بارىن جاسىرمادى. اندەرى جازىلعان ءۇنتاسپاسىن دا الا كەلىپتى. سالتاناتتى ءراسىم اياقتالعان سوڭ پرەزيدەنتكە ارنايى ۇسىنىپ، وتكەن كۇندەردىڭ ەستەلىگىندەي ىقىلاسىن ءبىلدىردى»، – دەپ جازدى جۋرناليست اقداريعا مۇحادداس.

جەلى قولدانۋشىلارى بۇل ۆيدەونى وتە جىلى قابىلداپ، ماقپال ءجۇنىسوۆا مەن پرەزيدەنتتىڭ قاراپايىمدىلىعىنا ريزاشىلىقتارىن ءبىلدىرىپ جاتىر.