«زاڭ مەن ءتارتىپ» قاعيداتى اياسىندا وڭىردە ءداستۇرلى تۇردە ۇيىمداستىرىلاتىن «اباي ءسوزى – ادىلدىك تەمىرقازىعى» اتتى رەسپۋبليكالىق زياتكەرلىك ويىن ءوتتى. بيىل بۇل جوبا ءۇشىنشى رەت ۇيىمداستىرىلىپ وتىر. اۋقىمدى شاراعا ەلىمىزدىڭ 5 وبلىسىنان كەلگەن 11 كوماندا قاتىستى. اتاپ ايتقاندا، اقتوبە، ماڭعىستاۋ، قاراعاندى، شىعىس قازاقستان، الماتى جانە اباي وبلىستارىنىڭ ستۋدەنت جاستارى باس قوستى.

جوبا اباي مۇراسى ارقىلى جاستار اراسىندا ادىلدىك، ادالدىق، پاراساتتىلىق سەكىلدى قۇندىلىقتاردى دارىپتەۋگە باعىتتالعان. سونىمەن قاتار، شارا اياسىندا جاستاردىڭ قۇقىقتىق ساناسىن قالىپتاستىرىپ، سىبايلاس جەمقورلىققا قارسى مادەنيەتتى نىعايتۋعا باسىمدىق بەرىلدى.

زياتكەرلىك ويىن ادەبي Quest جانە Quiz فورماتىندا ۇيىمداستىرىلدى. ادەبي Quest بارىسىندا قاتىسۋشىلار سەمەي قالاسى مەن «اباي – شاكارىم» مەموريالدىق كەشەنى ارالىعىنداعى تاريحي-مادەني ورىنداردى ارالاپ، اباي قۇنانباي ۇلىنىڭ ءومىرى مەن شىعارماشىلىعىنا قاتىستى تاپسىرمالاردى ورىندادى.

ماڭعىستاۋ ەنەرگەتيكالىق كوللەدجىنىڭ ستۋدەنتى نۇربولات بوقايەۆتىڭ ايتۋىنشا، مۇنداي جوبالار جاستاردىڭ ادىلدىككە دەگەن كوزقاراسىن قالىپتاستىرۋدا ماڭىزدى ءرول اتقارادى.

— ماڭعاز ماڭعىستاۋدان اباي وبلىسىنا ارنايى كەلدىك. ءبىز بۇل شاراعا قاتىسۋشى ءارى قوناق رەتىندە كەلدىك. ءدال ءقازىر مۇحتار اۋەزوۆ مۋزەيىن ارالاپ، ەرەكشە اسەر الىپ جاتىرمىز. كوپتەگەن سۇراقتارىمىزعا جاۋاپ تاۋىپ، جاڭا مالىمەتتەرمەن تانىستىق. «زاڭ مەن ءتارتىپ» يدەولوگياسىنىڭ جاستارعا بەرەرى مول دەپ ويلايمىن. سەبەبى بولاشاقتا جاستار ءادىل، ادال ءارى جاۋاپكەرشىلىگى جوعارى ازامات بولۋى كەرەك. وسىنداي جوبالار جاس بۋىندى ادىلدىككە تاربيەلەيدى. بۇگىنگى جارىستىڭ ءوزى جوعارى دەڭگەيدە ءارى ءادىل ۇيىمداستىرىلعان، — دەيدى قاتىسۋشى.

ال الماتى وبلىسىنان كەلگەن ەسىك گۋمانيتارلىق-پەداگوگيكالىق كوللەدجىنىڭ ستۋدەنتى لۋيزا ۇزاق بۇل ساپاردىڭ وزىنە ەرەكشە اسەر سىيلاعانىن ايتادى.

— ءبىز ەسىك قالاسىنان «زاڭ مەن ءتارتىپ» يدەولوگياسى اياسىندا ۇيىمداستىرىلعان رەسپۋبليكالىق زياتكەرلىك جارىسقا قاتىسۋ ءۇشىن ارنايى كەلدىك. سەمەي وڭىرىنە العاش رەت كەلۋىم. بۇل مەن ءۇشىن ۇلكەن مۇمكىندىك بولدى. وسى ۋاقىتقا دەيىن ابايدى تەك كىتاپتار مەن ءتۇرلى اقپاراتتار ارقىلى تانىپ كەلسەك، بۇگىن ونىڭ تۇلعاسىن مۇلدە جاڭا قىرىنان تانىدىم. اباي جۇرگەن جەرلەردى كورىپ، ءومىر سۇرگەن ورتاسىمەن جاقىنىراق تانىسۋ ەرەكشە اسەر سىيلادى. ويىن وتە قىزىقتى ءارى جوعارى دەڭگەيدە ۇيىمداستىرىلعان. اسىرەسە، كۆەستتىڭ مۋزەيلەر اراسىندا وتكەنى قاتتى ۇنادى. مۇنداي فورمات قاتىسۋشىلاردىڭ توپپەن جۇمىس ىستەۋ قابىلەتىن دامىتىپ، بىرلەسىپ شەشىم قابىلداۋعا ۇيرەتەدى، — دەيدى ول.

شارانىڭ ەكىنشى جارتىسىندا قاتىسۋشىلار «قازاقشا Quiz» ينتەللەكتۋالدىق ويىنىندا ب ا ق سىنادى. Quiz سۇراقتارى ۇلى ابايدىڭ ءومىرى، اباي ءوڭىرىنىڭ كيەلى ورىندارى جانە سىبايلاس جەمقورلىقتىڭ الدىن الۋ باعىتىنداعى حالىقارالىق تاجىريبەلەردى قامتىدى.

جارىس بارىسىندا كوماندالار جوعارى دايىندىق دەڭگەيىن كورسەتىپ، لوگيكالىق ويلاۋ مەن جىلدام شەشىم قابىلداۋ قابىلەتتەرىن سىناقتان وتكىزدى.

ماراپاتتاۋ راسىمىندە ءسوز العان اباي وبلىسى ىشكى ساياسات باسقارماسىنىڭ باسشىسى جارقىن ءجۇمادىلوۆ قاتىسۋشىلاردى قۇتتىقتاپ، جوبانىڭ ماڭىزدىلىعىنا توقتالدى.

— سىبايلاس جەمقورلىققا قارسى مادەنيەت ەڭ الدىمەن زاڭنان ەمەس، سانا مەن تاربيەدەن باستالادى. بۇل ۇلى ۇستانىمدى حاكىم اباي ءوز شىعارمالارىندا تەرەڭ تولعاپ، كەيىنگى ۇرپاققا امانات ەتتى. ابايدىڭ «ادال ءجۇرىپ، ادال تۇر» دەگەن تاعىلىمدى ءسوزى – تۇتاس ءبىر ومىرلىك قاعيدا، ادىلەتتى قوعامنىڭ تەمىرقازىعى. مەملەكەت باسشىسى قاسىم-جومارت كەمەل ۇلى توقايەۆ «ادىلەتتى قازاقستان» قۇرۋ جولىندا زاڭ ۇستەمدىگى مەن ادالدىق قاعيداتىنا ەرەكشە ءمان بەرىپ كەلەدى. بۇل باعىتتاعى جۇمىستاردىڭ ناتيجەلى بولۋى – ەڭ الدىمەن جاس ۇرپاقتىڭ ساناسىنا بايلانىستى. بۇگىنگى دودادا قاتىسۋشىلار وزدەرىنىڭ ءبىلىمىن عانا ەمەس، بيىك مادەنيەتىن، تەرەڭ تانىمىن جانە ۇلت قۇندىلىقتارىنا دەگەن قۇرمەتىن كورسەتتى، — دەپ اتاپ ءوتتى باسقارما باسشىسى.

رەسپۋبليكالىق زياتكەرلىك ويىن قورىتىندىسىندا بارلىق كەزەڭ بويىنشا جيناعان ۇپايلار ەسەپتەلىپ، جۇلدەلى ورىن يەگەرلەرى انىقتالدى. اتاپ ايتقاندا، اباي وبلىسىنىڭ جاستار ءماسليحاتى كومانداسى I ورىندى يەلەنسە، II ورىن شىعىس قازاقستان وبلىسىنان كەلگەن سارسەن امانجولوۆ ۋنيۆەرسيتەتىنىڭ ستۋدەنتتەرىنە بۇيىردى. ال III ورىندى سەمەي مەديسينا ۋنيۆەرسيتەتى كومانداسى قانجىعاسىنا بايلادى.