اباي وبلىسىندا «زاڭ مەن ءتارتىپ» يدەولوگياسى اياسىندا جۇزەگە اسىرىلىپ جاتقان «زاڭ كەرۋەنى» جوباسى بۇل جولى اباي اۋدانىنا باردى. جوبا اياسىندا قاراۋىل جانە كەگىرباي بي اۋىلدارىندا تۇرعىندارمەن كەزدەسۋلەر ۇيىمداستىرىلىپ، ازاماتتارعا قۇقىقتىق كومەك كورسەتۋ جانە قۇقىقتىق ساۋاتتىلىقتى ارتتىرۋ باعىتىندا ءتۇسىندىرۋ جۇمىستارى جۇرگىزىلدى.
كەزدەسۋلەرگە قۇقىق قورعاۋ ورگاندارىنىڭ، مەملەكەتتىك مەكەمەلەر مەن سالالىق قىزمەتتەردىڭ وكىلدەرى قاتىسىپ، تۇرعىنداردى تولعاندىرعان وزەكتى ماسەلەلەر بويىنشا كەڭەس بەردى. اشىق فورماتتا وتكەن قابىلداۋلار بارىسىندا اۋىل تۇرعىندارى ءوز سۇراقتارىن تىكەلەي قويىپ، زاڭ تالاپتارى مەن مەملەكەتتىك قىزمەتتەرگە قاتىستى ناقتى جاۋاپتار الدى.
«زاڭ كەرۋەنى» جوباسى حالىق پەن مەملەكەتتىك ورگاندار اراسىنداعى ءوزارا بايلانىستى ءنىعايتىپ، ازاماتتاردىڭ قۇقىقتىق مادەنيەتىن قالىپتاستىرۋعا جانە شالعاي ەلدى مەكەن تۇرعىندارىنا قولجەتىمدى قۇقىقتىق كومەك كورسەتۋگە باعىتتالعان ماڭىزدى باستاما رەتىندە ءوز جۇمىسىن جالعاستىرۋدا.
