الماتى وبلىسىندا «تازا قازاقستان» ەكولوگيالىق باعدارلاماسى اياسىنداعى شارالار جالعاسۋدا. بۇگىن وڭىردە ادەتتەگىدەي «تازا بەيسەنبى» اكسياسى وتكىزىلىپ، 22 مىڭنان استام تۇرعىن تاڭمەن تالاسا تازالىق جۇمىسىنا اتسالىستى. يگى شارادا ازاماتتار قورشاعان ورتاعا قامقورلىق پەن جاۋاپكەرشىلىك سەزىمىنىڭ ۇلگىسىن كورسەتتى. ولاردىڭ قاتارىندا قوعام بەلسەندىلەرى، وبلىس اكىمدىگى مەن مەملەكەتتىك ورگان قىزمەتكەرلەرى، كاسىپكەرلەر، جاستار مەن ەرىكتىلەر، تۇرعىندار بار. ناتيجەسىندە 510 توننا قوقىس شىعارىلىپ، 282 گەكتار اۋماق تازارتىلدى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

اكسيا بارىسىندا قوعامدىق ورىندار مەن اۋلالارداعى قوقىس جينالىپ، اباتتاندىرۋ جۇمىسى جۇرگىزىلدى. قايتا وڭدەلەتىن قالدىق بولەك سۇرىپتالىپ، قالعان قوقىس ارنايى پوليگونعا جىبەرىلدى.

سەنبىلىككە الماتى وبلىسىنىڭ اكىمى مارات سۇلتانعازييەۆ تە قاتىسىپ، قورشاعان ورتانىڭ تازالىعى بارشانىڭ ورتاق قۇندىلىعى ەكەنىن اتاپ ءوتتى.

«ءوزىمىز ءومىر سۇرەتىن ەلدى مەكەندەردىڭ، قالالاردىڭ، تۋريستىك ورىنداردىڭ تازا ءارى جايلى بولۋى ءارقايسىمىزدىڭ جاناشىرلىعىمىز بەن جاۋاپكەرشىلىگىمىزگە تىكەلەي بايلانىستى. بۇگىندە «تازا قازاقستان» باعدارلاماسى اياسىندا وبلىسىمىزدا ەلدى مەكەندەردى اباتتاندىرۋ، كوگالداندىرۋ جانە ەكولوگيالىق مادەنيەتتى قالىپتاستىرۋ باعىتىندا جۇيەلى جۇمىستار جۇرگىزىلۋدە.

جاقىندا اۋماقتاردى كۇتىپ ۇستاۋعا قاتىستى قولدانىستاعى تالاپتار جاڭارتىلدى. سوعان سايكەس اۋماقتىڭ سانيتارلىق تازالىعىن ساقتاۋ جانە تۇرعىن ءۇيدىڭ ىرگەلەس 5 مەتر اۋماعىن كۇتىپ-ۇستاۋ مىندەتى زاڭدى تۇلعالارمەن قاتار جەكە تۇرعىندارعا دا جۇكتەلەدى. وسىعان بايلانىستى اكسيا بۇرىنعىدان دا بەلسەندى تۇردە جۇزەگە اسىرىلىپ جاتىر. بۇگىن ءبىز ءداستۇرلى «تازا بەيسەنبى» اكسياسىن وتكىزدىك. وبلىستىڭ تۇكپىر-تۇكپىنىدەگى تۇرعىندار بۇل شاراعا بەيجاي قاراماي، بەلسەندىلىك تانىتۋدا»، – دەدى مارات ەلەۋسىز ۇلى.

ەكولوگيالىق اكسياعا ۇلەس قوسقانداردىڭ ءبىرى – جاستار رەسۋرستىق ورتالىعىنىڭ مامانى سانجار سۇلتان. «ءار ازاماتتىڭ تازالىق شارالارىنا اتسالىسۋى ماڭىزدى. سەبەبى ءتارتىپ پەن تازالىق ەڭ اۋەلى وزىمىزدەن باستالادى. ءقازىر جاستار ءار سەنبىلىككە ۇلكەن جاۋاپكەرشىلىكپەن كىرىسەدى. وزدەرى دە ءتۇرلى ەكولوگيالىق شارالار ۇيىمداستىرىپ، جۇمىلا جۇمىس ىستەيدى. ماسەلەن، «ءقاۋىپسىز جاعالاۋ»، «تازا جاعالاۋ» سياقتى اكسيالار سونىڭ ايقىن دالەلى. بۇل «زاڭ مەن ءتارتىپ» تۇجىرىمداماسىمەن دە استاسىپ جاتىر. قازىرگى جاستاردىڭ كوزقاراسى وزگەشە، سوندىقتان ولاردى قوعامدىق ءتارتىپ پەن ەكولوگيالىق مادەنيەتتى ساقتاۋعا جاڭا تاسىلدەر ارقىلى باۋلۋ ماڭىزدى دەپ ويلايمىن»، – دەدى ول.

ايتا كەتەيىك، جىل باسىنان بەرى وڭىردە 25 وبلىستىق سەنبىلىك وتكىزىلىپ، وعان 567 مىڭنان استام ادام قاتىستى. ناتيجەسىندە 13 مىڭ توننا قوقىس شىعارىلىپ، 7701 گەكتار اۋماق تازارتىلدى. 103 مىڭنان استىم كوشەت وتىرعىزىلىپ، 3500-گە جۋىق تەحنيكا جۇمىلدىرىلدى. بۇل باعىتتاعى شارالار الداعى ۋاقىتتا دا ءداستۇرلى تۇردە جالعاسادى.