ماسەلەن، «ءمولدىر بۇلاق» اپتالىعىنىڭ بەسىنشى كۇنى وزەن، كولدەردىڭ، بۇلاقتار مەن سۋ ايدىندارىنىڭ ايماقتارىن قوقىستان تازارتۋ ءۇشىن 101 ءىس-شارا ۇيىمداستىرىلدى. 139 اۋماق تازارتىلدى.

جەتىسۋ وبلىسىندا 2000 قاتىسۋشى 19 وزەن ماڭىن جانە كوكسۋ، قورا، شاجا، بىجى، قاراسۋ، قاراتال جاعالاۋىن تازارتىپ، 31 توننادان استام قوقىس شىعاردى.

الماتى وبلىسىنىڭ جانە ىلە الاتاۋىنىڭ ءىنجۋ-مارجانى – ەسىك كولىنىڭ جاعاسىندا تازالىق شاراسى ءوتتى. «ءمولدىر بۇلاق» اپتالىعىنىڭ العاشقى كۇنى وبلىستىڭ بارلىق اۋدانداردا مارافون، كونكۋرس جانە فلەشموبتار فورماتىندا 50-دەن استام سەنبىلىك ءوتتى. اكسياعا قاتىسۋشىلار ۇزىنقارعالى، تالعار، قارقارا، شارىن، قاسكەلەڭ، ۇلكەن الماتى وزەندەرىنىڭ جاعالاۋلارىن تازالادى.

اتالمىش جۇمىستار قازاقستاننىڭ باسقا وبلىستارىندا جۇرگىزىلدى. جالپى، «تازا قازاقستان» اياسىندا 8 ءساۋىر مەن 11 مامىر ارالىعىندا وڭىرلەردە 6500-دەن استام ءىس-شارا ءوتتى، وعان شامامەن 1،13 ملن ادام قاتىستى.

ق ر مادەنيەت جانە اقپارات مينيسترلىگىنىڭ باسپا ءسوز قىزمەتى