ورتالىق كوممۋنيكاسيالار قىزمەتىندەگى بريفينگ بارىسىندا مينيستردەن جاڭا زاڭعا حيدجاب، نيكاب جانە شولاق شالبار كيۋگە تىيىم سالۋ ەنگىزىلە مە دەگەن سۇراق قويىلدى. بالايەۆا جاڭا زاڭعا بۇل نورمالار ۇسىنىلاتىنىن ايتتى.
"مىندەتتى تۇردە تىيىمدار بولادى. قوعامدىق ورىنداردا ءدىني كيىمدەر كيۋگە شەكتەۋ قويىلادى. مەن بۇكىل الەمدىك تاجىريبەنى زەرتتەدىم، ويتكەنى بۇل - ۇلتتىق قاۋىپسىزدىككە قاتىستى ماسەلە. قوعامدىق ورىنداردا بەتىن جاۋىپ جۇرەتىندەردى تانۋ وتە قيىن. بۇل ماسەلە قوعاممەن بىرگە تالقىلاناتىن بولادى. ءبىز ۋاكىلەتتى ورگان رەتىندە وسى باعىتتاعى جۇمىستى كۇشەيتۋ جانە وسى باعىتتاعى زاڭنامالىق نورمالاردى قاتاڭداتۋ بويىنشا جۇمىس ىستەيتىن بولامىز"، - دەدى مينيستر.
ول قازاقستاندا ءدىن ماسەلەلەرى وزەكتى بولىپ وتىرعانىن اتاپ ءوتتى. ءمينيستردىڭ ايتۋىنشا، ءقازىر بيلىكتىڭ مىندەتى – حالىقتىڭ ءدىني ساۋاتىن ارتتىرۋ.
مادەنيەت مينيسترلىگىنىڭ باسشىسى وسى جىلدىڭ 1 قاڭتارىنان قىركۇيەك ايىنىڭ سوڭىنا دەيىن ينتەرنەتتە تەرروريزم جانە ءدىني ەكسترەميزمدى ناسيحاتتايتىن 14 860 ماتەريال انىقتالعانىن حابارلادى. بۇل، بالايەۆانىڭ ايتۋىنشا، ءدىني اعىمداردىڭ جۇمىسى كۇشەيگەنىن كورسەتەدى.
"ءبىز "ءدىن تۋرالى" زاڭنىڭ جەكەلەگەن نورمالارىن قايتا قاراۋ باعىتىندا جۇمىس ىستەيتىن بولامىز. ءبىزدىڭ قولدانىستاعى زاڭىمىزدا "دەسترۋكتيۆتى ءدىني اعىمدار" دەگەن ۇعىم جوق. سوندىقتان مۇندا ءبىز بارلىق تارماقتار بويىنشا جۇمىس جۇرگىزۋىمىز كەرەك. ارينە، جۇرتشىلىقتىڭ پىكىرىن مۇقيات زەردەلەۋ قاجەت"، - دەپ قوستى ول.
“ءدىن تۋرالى زاڭنىڭ نورمالارى قاشان قايتا قارالادى؟” دەگەن سۇراققا بالايەۆا جاقىن ارادا قولعا الىناتىنىن ايتتى، ويتكەنى ءدىن تۋرالى زاڭدى قايتا قاراۋ – دەپۋتاتتاردىڭ ءوز باستاماسى.
ايتا كەتەيىك، بۇدان بۇرىن ءماجىلىس دەپۋتاتى ەرمۇرات باپي قازاقستاندا ۋاحابشىلارعا جاعداي جاساپ وتىرعان بيلىك وكىلدەرى بارىن ايتقان. ونىڭ پىكىرىنشە، 12 جىل بۇرىن – 2011 جىلدىڭ 11 قازانىندا قابىلدانعان «ءدىني قىزمەت جانە ءدىني بىرلەستىكتەر تۋرالى» زاڭعا ءتيىستى وزگەرىستەر مەن تولىقتىرۋلار ەنگىزۋدىڭ قوعامدىق قاجەتتىلىگىن كوتەرەتىن كەز كەلدى.
سونداي-اق، ماجىلىسمەن ەكس-پرەزيدەنت نۇرسۇلتان نازاربايەۆ ءۋاحابيزمدى بيلىكتى ۇستاپ تۇرۋ ءۇشىن پايدالانعانىن مالىمدەدى.
