الاتاۋ اۋدانى سايالى شاعىناۋدانىندا «جىگەر» يننوۆاسيالىق شىعارماشىلىق جانە وقۋشىلاردى دامىتۋ ورتالىعى جۇمىسىن باستادى. حالىقارالىق بالالاردى قورعاۋ كۇنىنە وراي ۇيىمداستىرىلعان سالتاناتتى اشىلۋ راسىمىنە الماتى اكىمى دارحان ساتىبالدى قاتىستى.

قوسىمشا ءبىلىم بەرۋگە ارنالعان جاڭا نىسان قالاداعى بالالاردىڭ ءبىلىم الۋىنا، شىعارماشىلىقپەن اينالىسۋىنا، سپورتپەن شۇعىلدانۋىنا جانە جان-جاقتى دامۋىنا مۇمكىندىك بەرەتىن ەڭ ءىرى زاماناۋي ورتالىقتاردىڭ بىرىنە اينالدى. جوبا جەرگىلىكتى بيۋدجەت قاراجاتى ەسەبىنەن جۇزەگە اسىرىلدى. كەشەننىڭ جالپى اۋماعى 10،6 مىڭ شارشى مەتردەن اسادى، ال جوبالىق قۋاتتىلىعى ەكى اۋىسىمدا كۇنىنە 1350 بالاعا دەيىن قابىلداۋعا مۇمكىندىك بەرەدى.

ورتالىقتا قوسىمشا ءبىلىم بەرۋدىڭ سۇرانىسقا يە باعىتتارى بويىنشا بارلىق جاعداي جاسالعان. مۇندا وقۋشىلار روبوتوتەحنيكا، ەلەكترونيكا، راديوبايلانىس، 3D مودەلدەۋ جانە پروتوتيپتەۋ كابينەتتەرىندە ءبىلىم الا الادى. سونىمەن قاتار FABLAB زەرتحاناسى، بەينەلەۋ ونەرى، مۋزىكا، حورەوگرافيا جانە مەديا شىعارماشىلىق ستۋديالارى جۇمىس ىستەيدى.

بالالاردىڭ زياتكەرلىك دامۋىنا دا ەرەكشە كوڭىل بولىنگەن. ورتالىقتا پلانەتاريي، وقۋ زالى، شاحمات، دويبى جانە توعىزقۇمالاق سەكىلدى ۇستەل ويىندارىنا ارنالعان كابينەتتەر، سونداي-اق جوبالىق جانە زەرتتەۋ جۇمىستارىنا بەيىمدەلگەن زاماناۋي ءبىلىم بەرۋ كەڭىستىكتەرى قاراستىرىلعان.

سپورتتىق جانە ينكليۋزيۆتى باعىتتار دا كەشەننىڭ ماڭىزدى بولىگىنە اينالدى. مۇندا باسسەين، بوكس، كۇرەس، دزيۋدو، تاەكۆوندو جانە كاراتە زالدارى جابدىقتالعان. ەرەكشە ءبىلىم بەرۋ قاجەتتىلىگى بار بالالار ءۇشىن سەنسورلىق بولمە، پسيحولوگ، لوگوپەد جانە دەفەكتولوگ كابينەتتەرى، ارنايى باسسەين مەن پسيحولوگيالىق-پەداگوگيكالىق قولداۋ كورسەتۋ كەڭىستىكتەرى اشىلعان.

ورتالىقتاعى تاعى ءبىر ماڭىزدى باعىت — ەكولوگيالىق جانە اگروتەحنولوگيالىق ءبىلىم بەرۋ. وسى ماقساتتا جىلىجاي، اگرومادەنيەت، باعباندىق جانە اكۆاپونيكا كابينەتتەرى جاساقتالىپ، وقۋشىلار تۇراقتى دامۋدىڭ زاماناۋي تەحنولوگياسىمەن تانىسا الادى.

جاڭا ورتالىقتىڭ اشىلۋى الاتاۋ اۋدانى تۇرعىندارى ءۇشىن كوپتەن كۇتكەن قۋانىشتى وقيعا بولدى. قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ومارقازى بولاتبايەۆتىڭ ايتۋىنشا، «جىگەر» بالالاردىڭ دامۋى مەن ءوزىن-وزى تانىتۋىنا جاڭا مۇمكىندىك بەرەدى.

«مەن وسى شاعىناۋداندا كوپ جىلدان بەرى تۇرامىن. بۇگىن بارلىق تۇرعىن سەكىلدى بالالارعا ارنالعان ۇلكەن شىعارماشىلىق ورتالىعىنىڭ اشىلعانىنا ەرەكشە قۋانىپ وتىرمىن. مۇندا سپورتپەن اينالىسۋعا، شىعارماشىلىقتى دامىتۋعا جانە جاڭا داعدىلاردى مەڭگەرۋگە تولىق جاعداي جاسالعان. بۇل بۇكىل اۋدان ءۇشىن ماڭىزدى ءارى كوپتەن كۇتكەن وقيعا»، — دەدى ول.

كوپبالالى انا نۇرجامال تۇمەنبايەۆا دا جاڭا ورتالىقتىڭ وتباسىلار ءۇشىن اسا قاجەت ەكەنىن ايتتى.

«ءبىزدىڭ اۋداندا وسىنداي ورتالىقتىڭ اشىلعانىنا وتە قۋانىشتىمىز. بالالارىمىز ءۇشىن وسىنداي مۇمكىندىك جاساعاندارىڭىزعا العىس ايتامىن. بۇل جەر بالالاردىڭ جاڭا ءبىلىم الىپ، قابىلەتىن دامىتىپ، ۋاقىتىن ءتيىمدى وتكىزەتىن ماڭىزدى ورتالىققا اينالاتىنىنا سەنەمىن»، — دەدى ول.

جاڭا نىسانعا وقۋشىلاردىڭ وزدەرى دە وڭ باعاسىن بەردى. وقۋشى اقنيەت توقسامباي ورتالىقتىڭ العاشقى كۇننەن ەرەكشە اسەر قالدىرعانىن ايتتى.

«بۇگىن ءبىزدى ورتالىقتىڭ اشىلۋىنا شاقىردى. العاشقى ساتتەن-اق ونىڭ زاماناۋي، جارىق ءارى وتە ادەمى ەكەنىن بايقادىم. مۇندا ءتۇرلى باعىتتاعى ۇيىرمەلەر كوپ جانە قابىلەتىمىزدى دامىتۋعا بارلىق جاعداي جاسالعان»، — دەدى ول.

ال ايشا توقسامبايەۆا جاڭا ورتالىقتاعى ەرەكشە اتموسفەرانى اتاپ ءوتتى.

«بۇگىن ورتالىقتىڭ اشىلۋىنا قاتىسىپ، ەرەكشە اسەر الدىم. ەسىكتەن كىرگەننەن-اق جىلى اتموسفەرا سەزىلەدى. بارلىعى ۇقىپتى ءارى ادەمى جاسالعان. ءار بولمە وزىنشە قىزىقتى، نازاردى بىردەن اۋداردى»، — دەدى وقۋشى.

التىنشى سىنىپ وقۋشىسى ايالا ورالباي ورتالىقتىڭ اشىلۋ كۇنى ۇيىمداستىرىلعان كورمەگە قاتىسقانىن ايتتى.

«بۇگىن كورمەدە ءوزىم جاساعان الماتى قالاسىنىڭ ماكەتىن تانىستىردىم. بولاشاقتا «جىگەر»ورتالىعىندا ءبىلىم الىپ، ۇلكەن تاجىريبە جيناعىم كەلەدى»، — دەدى ول.

«جىگەر» ورتالىعىنىڭ اشىلۋى الماتىداعى ءبىلىم بەرۋ ينفراقۇرىلىمىن دامىتۋ جانە جاس ۇرپاقتىڭ جان-جاقتى دامۋىنا جاعداي جاساۋ باعىتىنداعى ماڭىزدى قادامداردىڭ ءبىرى بولدى. سوڭعى ءبىر جىل ىشىندە الماتى اكىمىنىڭ تاپسىرماسىمەن قالادا 40 مىڭعا جۋىق ورىنعا ارنالعان 37 ءبىلىم بەرۋ نىسانى پايدالانۋعا بەرىلدى. ولاردىڭ قاتارىندا جاڭا مەكتەپتەر، بالاباقشالار، قوسىمشا ءبىلىم بەرۋ ورتالىقتارى مەن كوللەدجدەر بار.