قونايەۆتا 1 ماۋسىمنان باستاپ شومىلۋ ماۋسىمى رەسمي تۇردە اشىلدى. بيىل جاعاجايلاردا قاۋىپسىزدىك شارالارى كۇشەيتىلىپ، جاڭا دەمالىس ورىندارى ىسكە قوسىلدى.
قالا اكىمى اسحات بەردىحانوۆتىڭ ايتۋىنشا، كوممۋنالدىق جاعاجايلار دەمالۋشىلاردى قابىلداۋعا دايىن. اسىرەسە №5 جاعاجايدا قاۋىپسىزدىك ماسەلەسىنە ەرەكشە كوڭىل بولىنگەن. مۇندا 12 قۇتقارۋ مۇناراسى ورناتىلىپ، 26 قۇتقارۋشى جۇمىس ىستەۋدە. سونىمەن قاتار جاعاجاي اۋماعىنا 21 بەينەباقىلاۋ كامەراسى قويىلعان. ونىڭ ىشىندە جاساندى ينتەللەكت جۇيەسىمەن جۇمىس ىستەيتىن كامەرالار دا بار. بارلىق قۇرىلعىلار جەدەل باسقارۋ ورتالىعىنا قوسىلعان.
جاعاجاي اۋماعىندا سانيتارلىق توراپتار مەن تاماقتانۋ ورىندارى جۇمىس ىستەيدى. كۇن سايىن ارنايى قىزمەتكەرلەر جاعالاۋدى بىرنەشە رەت قوقىستان تازارتادى. ال جاياۋ جۇرگىنشىلەر ءۇشىن كىرۋ تەگىن.
بيىل №5 جاعاجايدا جاڭا 9D كينوتەاترى اشىلدى. زاماناۋي اتتراكسيون فورماتىنداعى كينوتەاتردا كورەرمەندەر ءفيلمدى ارنايى دىبىس، قوزعالىس جانە وزگە دە ەففەكتىلەر ارقىلى شىنايى سەزىنە الادى.
سونىمەن قاتار قالادا جاڭا ويىن-ساۋىق ورىندارى كوبەيىپ كەلەدى. قالا اكىمىنىڭ مالىمەتىنشە، «جىبەك جولى» ج ش س سالىپ جاتقان اتتراكسيوندار پاركى 10 ماۋسىمعا قاراي كەلۋشىلەرگە ەسىگىن اشادى.
«بۇل پارك بىرنەشە جىلدان بەرى سالىنىپ جاتىر. ءقازىر سوڭعى دايىندىق جۇمىستارى اياقتالۋدا. جاقىن كۇندەرى دەمالۋشىلاردى قابىلداي باستايدى»، – دەدى اسحات بەردىحانوۆ.
قالادا بيىل جاڭا فورماتتاعى دەمالىس ورىندارى دا اشىلۋدا. سونىڭ ءبىرى – «VE RICCI» دەمالىس ايماعى. كەشەن وتباسىلىق دەمالىسقا ارنالعان. مۇندا جايلى ۆيللالار، باسسەيندەر جانە تىنىعۋعا ارنالعان ارنايى اۋماقتار قاراستىرىلعان.
اكىمنىڭ ايتۋىنشا، تۋريستىك باعىتتا 11 ينۆەستيسيالىق جوبانى جۇزەگە اسىرۋ جوسپارلانىپ وتىر. ونىڭ ىشىندە قوناق ۇيلەر، دەمالىس ورىندارى مەن گولف-كلۋب قۇرىلىسى بار.
قاۋىپسىزدىك ماسەلەسى دە باستى نازاردا. قالالىق توتەنشە جاعدايلار باسقارماسى جاعاجايلاردا كەشكى ساعات 20:00-دەن كەيىن شومىلۋعا تىيىم سالىناتىنىن حابارلادى. كۇن سايىن پاترۋلدەۋ ۇيىمداستىرىلىپ، كەشكى ۋاقىتتا ارنايى رەيدتەر جۇرگىزىلەدى.
قالا تۇرعىندارى مەن تۋريستەر دە شومىلۋ ماۋسىمىنىڭ اشىلۋىن وڭ قابىلداۋدا. اشىق سۋدا جۇزۋدەن قازاقستان جانە الەم چەمپيونى امينا ءشىنادىل قاپشاعاي سۋ قويماسى سۋ سپورتى ءۇشىن قولايلى ورىنداردىڭ بىرىنە اينالىپ كەلە جاتقانىن ايتتى.
«قاپشاعاي سۋ قويماسى – تەك دەمالىس ورنى ەمەس، سۋ سپورتى دامىپ جاتقان ماڭىزدى ايماق»، – دەدى سپورتشى.
ايتا كەتەيىك، قونايەۆتا الداعى ۋاقىتتا 5 شاقىرىمنان استام جاعاجايدى اباتتاندىرۋ جوسپارلانعان. جۇمىستار كەزەڭ-كەزەڭىمەن جۇزەگە اسادى.