الماتى وبلىسىندا ەكولوگيالىق ءتۋريزمدى دامىتۋ جانە جاسىل ايماقتاردىڭ كولەمىن ۇلعايتۋ باعىتىندا بىرنەشە ءىرى ەكوپارك جوباسى جۇزەگە اسىرىلۋدا. جاڭا نىساندارعا تارتىلاتىن ينۆەستيسيا كولەمى 22 ملرد تەڭگەدەن اسادى.
قازىرگى تاڭدا وبلىس اۋماعىندا جالپى كولەمى 69 مىڭ گەكتاردان اساتىن 20-دان استام ەكوپارك جۇمىس ىستەيدى. الداعى جىلدارى ولاردىڭ قاتارى جاڭا دەمالىس جانە رەكرەاسيالىق ايماقتارمەن تولىقپاق.
ءىرى جوبالاردىڭ ءبىرى – اۋماعى 10 گەكتار بولاتىن «بارىس» ەكوپاركى. جوبانىڭ قۇنى شامامەن 1،5 ملرد تەڭگەنى قۇرايدى. بولاشاقتا پارك اۋماعىندا 7 مىڭنان استام اعاش وتىرعىزۋ جوسپارلانعان.
سونىمەن قاتار جەكە ينۆەستيسيالار ەسەبىنەن تاعى ەكى ءىرى جوبا ىسكە اسىرىلۋدا. اۋماعى 5،5 گەكتار بولاتىن «Tal Resort» ەكوپاركىنىڭ قۇنى شامامەن 5 ملرد تەڭگەنى قۇرايدى. قۇرىلىس جۇمىستارى ەكى كەزەڭمەن جۇرگىزىلەدى. جوبانىڭ ءبىرىنشى كەزەڭىن 2026 جىلدىڭ سوڭىندا اياقتاۋ، ال نىساندى تولىق پايدالانۋعا بەرۋدى 2027 جىلعا جوسپارلانعان.
سونداي-اق قۇنى 5 ملرد تەڭگە بولاتىن «Aykan Resort» ەكوپاركىنىڭ قۇرىلىسى دا جۇرگىزىلۋدە. جوبانىڭ جالپى اۋماعى 8،5 گەكتاردى قۇرايدى. نىساندى 2027 جىلى پايدالانۋعا بەرۋ كوزدەلگەن.
بۇدان بولەك، 2027–2028 جىلدارى وبلىستا تاعى ەكى جوبا جۇزەگە اسىرىلادى. اتاپ ايتقاندا، «كوشپەندىلەر» ەكوپاركىنە شامامەن 700 ملن تەڭگە، ال «ورتالىق ساياباق» جوباسىنا شامامەن 10 ملرد تەڭگە ينۆەستيسيا تارتۋ جوسپارلانىپ وتىر.
الماتى وبلىسى تۇرعىن ۇي-كوممۋنالدىق شارۋاشىلىق جانە اباتتاندىرۋ باسقارماسىنىڭ مالىمەتىنشە، اتالعان جوبالار ءوڭىردىڭ تۋريستىك الەۋەتىن ارتتىرىپ، جاسىل ايماقتاردى كەڭەيتۋگە جانە حالىق ءۇشىن قولايلى دەمالىس ينفراقۇرىلىمىن قالىپتاستىرۋعا مۇمكىندىك بەرەدى.