الماتى وبلىسىندا جەدەل مەديسينالىق جاردەم قىزمەتىنىڭ اۆتوپاركى اۋقىمدى جاڭارتۋدان وتۋدە. مەديسينا قىزمەتكەرلەرى كۇنى قارساڭىندا ءوڭىردىڭ جەدەل مەديسينالىق جاردەم ستانسياسىنا 70 جاڭا سانيتاريالىق اۆتوكولىكتىڭ كىلتى تابىستالادى. قازىرگى ۋاقىتتا اۆتوكولىكتەردىڭ قۇجاتتارىن راسىمدەۋ جۇمىستارى جۇرگىزىلۋدە.
جاڭا تەحنيكالار 2025 جىلى ليزينگ شارتى نەگىزىندە ساتىپ الىنعان. ونىڭ ىشىندە 30-ى «س» كلاسىنداعى رەانيموبيل، ال 40-ى «ۆ» كلاسىنداعى سانيتاريالىق اۆتوكولىك. بارلىعى زاماناۋي مەديسينالىق جابدىقتارمەن تولىق قامتاماسىز ەتىلگەن جانە شۇعىل كومەك كورسەتۋگە بەيىمدەلگەن.
وسىلايشا، بيىل الماتى وبلىسىنىڭ جەدەل مەديسينالىق جاردەم قىزمەتى ءۇشىن ساتىپ الىنعان 90 سانيتاريالىق اۆتوكولىكتىڭ بارلىعى پايدالانۋعا بەرىلەدى. ونىڭ 20-سى جىل باسىندا مەديسينالىق ۇيىمدارعا تاپسىرىلسا، قالعان 70 كولىك جاقىن كۇندەرى قىزمەتكە كىرىسەدى.
الماتى وبلىسى دەنساۋلىق ساقتاۋ باسقارماسىنىڭ باسشىسى ەرجان سۇلەيمەنوۆتىڭ ايتۋىنشا، اۆتوپاركتى جاڭارتۋ تۇرعىندارعا كورسەتىلەتىن جەدەل مەديسينالىق كومەكتىڭ ساپاسى مەن قولجەتىمدىلىگىن ارتتىرۋعا مۇمكىندىك بەرەدى.
«جەدەل مەديسينالىق جاردەم قىزمەتىنىڭ ماتەريالدىق-تەحنيكالىق بازاسىن جاڭارتۋ جۇمىستارى كەزەڭ-كەزەڭىمەن جالعاسۋدا. جاڭا سانيتاريالىق اۆتوكولىكتەر شالعاي ەلدى مەكەندەرگە دەر كەزىندە جەتۋگە، شاقىرتۋلارعا جەدەل ارەكەت ەتۋگە جانە مەديسينالىق كومەكتىڭ ساپاسىن جاقسارتۋعا مۇمكىندىك بەرەدى. بۇل — تۇرعىنداردىڭ قاۋىپسىزدىگى ءۇشىن جاسالىپ جاتقان ماڭىزدى جۇمىس»، — دەدى ەرجان سۇلەيمەنوۆ.
جەدەل جاردەم قىزمەتىنىڭ اۆتوپاركىن جاڭارتۋعا بيزنەس وكىلدەرى دە قولداۋ كورسەتىپ كەلەدى. وتكەن جىلى الەۋمەتتىك جاۋاپكەرشىلىك اياسىندا «Mareven Food» ج ش س جەدەل مەديسينالىق جاردەم قىزمەتىنە گۋمانيتارلىق كومەك رەتىندە «ۆ» كلاسىنداعى 10 Foton ماركالى سانيتاريالىق اۆتوكولىكتى تابىستاعان بولاتىن.
قازىرگى تاڭدا الماتى وبلىسىندا جەدەل مەديسينالىق كومەكتى 1 ستانسيا، 12 قوسالقى ستانسيا، اۋىلدىق ەلدى مەكەندەردەگى 66 ديسلوكاسيالىق پۋنكت جانە 1 سانيتاريالىق اۆياسيا بولىمشەسى كورسەتەدى. وڭىردە 147 جەدەل مەديسينالىق جاردەم بريگاداسى جۇمىس ىستەيدى. ونىڭ ىشىندە 20 دارىگەرلىك جانە 127 فەلدشەرلىك بريگادا بار.