ءماجىلىس كۋلۋارىندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەڭ تومەنگى جالاقىنى كوتەرۋ جونىندە پىكىر ءبىلدىردى.

ءمينيستردىڭ ايتۋىنشا، بۇل ماسەلە كۇن تارتىبىندە تۇر. 2024 جىلى العاش رەت ەڭ تومەنگى جالاقىنى ەسەپتەۋدىڭ جاڭا ادىستەمەسى قابىلدانعان. قازىرگى ۋاقىتتا ءۇش عىلىمي-زەرتتەۋ ينستيتۋتى ەڭبەك ونىمدىلىگى، وڭىرلىك جانە سالالىق مەديانالىق جالاقى كورسەتكىشتەرى بويىنشا زەرتتەۋ جۇرگىزىپ جاتىر. بۇل دەرەكتەر ەڭ تومەنگى جالاقى مولشەرىن ەسەپتەۋگە نەگىز بولادى.

– "ءبىز ادىستەمەنى قابىلدادىق. ءقازىر ناقتى تالداۋ ءجۇرىپ جاتىر. سونىڭ ناتيجەسىندە ەڭ تومەنگى جالاقى مولشەرى انىقتالادى. ەگەر زەرتتەۋ ناتيجەلەرى وڭ بولسا، ەڭ تومەنگى جالاقى 2026 جىلدىڭ 1 قاڭتارىنان باستاپ كوتەرىلۋى مۇمكىن"، – دەدى مينيستر.

مينيسترلىك بۇعان دەيىن دۇنيەجۇزىلىك بانك ساراپشىلارىمەن بىرلەسىپ، ادىستەمە جوباسىن ازىرلەگەن بولاتىن.

ايتا كەتەيىك، حالىقارالىق ەڭبەك ۇيىمى ەلدەرگە كەيتس يندەكسىن قولدانۋدى ۇسىنادى. بۇل يندەكس بويىنشا ەڭ تومەنگى جالاقى مەديانالىق جالاقىنىڭ كەمىندە 50%-ىنا تەڭ بولۋى ءتيىس. دامىعان ەلدەردە بۇل كورسەتكىش ورتا ەسەپپەن 55%-دى قۇرايدى. ال قازاقستاندا 2023 جىلى كەيتس يندەكسى نەبارى 34% دەڭگەيىندە بولعان.