ۇلتتىق ەكونوميكا ءمينيسترى – پرەمەر-مينيستردىڭ ورىنباسارى سەرىك جۇمانعارين تۇتىنۋشىلىق كرەديتتەردىڭ ءوسۋى قازاقستاندىقتاردىڭ ءال-اۋقاتىنا قالاي اسەر ەتەتىنى تۋرالى پىكىر ءبىلدىردى.

كۋلۋاردا ب ا ق وكىلدەرى مينيستردەن:
— تۇتىنۋشىلىق كرەديتتەر كولەمىنىڭ ارتۋى حالىقتىڭ الەۋمەتتىك جاعدايىنىڭ ناشارلاعانىن بىلدىرمەي مە؟ — دەپ سۇرادى.

سەرىك جۇمانعارين بۇل پىكىرمەن كەلىسپەيتىنىن جەتكىزدى:

— كرەديت كولەمىنىڭ ءوسۋى كەرىسىنشە، حالىقتىڭ بەلگىلى ءبىر دەڭگەيدە قارجى مۇمكىندىگى بار ەكەنىن كورسەتەدى. ءيا، كەيبىر ازاماتتار "ەرتەڭ قالاي قايتارامىن؟" دەپ ويلانباستان نەسيە الىپ جاتادى. وسى سەبەپتى قارجى رەتتەۋشىسى نەسيە الماس بۇرىن ادامعا ويلانىپ-تولۋ ءۇشىن ءبىر تاۋلىك ۋاقىت بەرەدى. سونداي-اق "رۇقسات ەتىلگەن جۇكتەمە كوەففيسيەنتى" دەگەن تۇسىنىك بار. قازىرگى تاڭدا ول 50 پايىزدى قۇرايدى. ياعني ازاماتتىڭ جالپى قارىزى ونىڭ تابىسىنىڭ جارتىسىنان اسپاۋى كەرەك. ەگەر بۇل شەكتەۋدەن اسسا، بانك نەسيە بەرمەيدى. ءبىزدىڭ ۇسىنىسىمىز — بۇل كورسەتكىشتى 35 پايىزعا دەيىن تومەندەتۋ، — دەدى ول.

ءمينيستردىڭ ايتۋىنشا، نەسيە العان ادام ءوزىنىڭ قارجىلىق مۇمكىندىكتەرىن باعامداي بىلەدى.

— ەگەر ادام نەسيە السا، بۇل ونىڭ بەلگىلى ءبىر ەسەپپەن ارەكەت ەتىپ وتىرعانىن بىلدىرەدى. ياعني تابىسى قارىزدى قايتارۋعا جەتەدى دەگەن ءسوز. ال ەندى Kaspi Red ارقىلى دارى-دارمەك الۋ ماسەلەسىنە كەلسەك، بۇل — بولەك اڭگىمە. قازاقستاندا شامامەن 12 ميلليون ادامعا تەگىن مەديسينالىق كومەك كورسەتىلەدى، ونىڭ ىشىندە تەگىن دارىلەر دە بار. سوندىقتان كەيبىر ازاماتتار نەگە ءدارىنى ءبولىپ تولەۋگە ساتىپ الادى دەگەن سۇراق تۋادى. كوپ جاعدايدا دارىگەردەن رەسەپت الۋ ارقىلى قاجەتتى دارىلەردى تەگىن الۋعا بولادى. ءبىراق بۇل جەردە، بالكىم، باسقا ءدارى تۇرلەرى جايلى ءسوز بولىپ وتىرعان شىعار، — دەپ تۇيىندەدى جۇمانعارين.